ޑަބްލިއުޑީސީތައް އުވައެއް ނުލާނެ، އިތުރަށް ބާރުވެރި ކުރުވާނަން: ރައީސް

އިސްމާއިލް ރިޒާ

08 ޑިސެމްބަރ 2024 - 20:21

0 comments

އަންހެނުންގެ ތަރައްގީ އަށް މަސައްކަތް ކުރާ ކޮމިޓީތައް އުވާނުލައްވާނެ ކަމަށާއި އެ ކޮމިޓީތައް ބާރުވެރި ކުރުވުމަށް ގިނަ މަސައްކަތްތަކެއް މި ސަރުކާރުން ކުރައްވާނެ ކަމުގައި ރައީސް ޑރ. މުހައްމަދު މުއިއްޒު، ވިދާޅުވެއްޖެ އެވެ.

ރައީސް މިހެން އއ. އުކުޅަހަށް މިއަދު ވަޑައިގެން އެ ރަށު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއާ އެކު ބޭއްވެވި ބައްދަލުވުމުގައި ކޮމިޓީގެ މެންބަރަކު ރައީސްއަށް ކުރިމަތި ކުރެއްވި ސުވާލެއްގެ ޖަވާބު ގައެވެ.

ރައީސް ވިދާޅުވީ ޑަބްލިއުޑީސީތައް އުވާލުމުގެ ބަދަލުގައި ސަރުކާރުގެ ވިސްނުން ހުރީ އެ ކޮމިޓީތައް އިތުރަށް ބާރުވެރިކުރުވުމަށް ގިނަ މަސައްކަތްތަކެއް ކުރުމަށް ކަމަށެވެ. ނަމަވެސް އެކަމުގެ ތަފްސީލްތައް ރައީސް ހިއްސާކުރައްވާފައެއް ނުވެ އެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ އަރިއަތޮޅު އުތުރުބުރީ އުކުޅަހު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ އާ ބައްދަލުކުރައްވައި އެރަށު ރައްޔިތުންނަށް އެންމެ ބޭނުންޖެހިފައިވާ ކަންކަމާ ގުޅޭގޮތުން މަޝްވަރާ ކުރައްވައިފައެވެ.

މި ބައްދަލުކުރެއްވުމުގައި ކައުންސިލުން ފާހަގަކުރެއްވި ކަންކަމުގެ ތެރޭގައި ބޯހިޔާވަހިކަމުގެ ދަތިކަން ފާހަގަ ކުރެއްވި އެވެ. އަދި ކައުންސިލް އިދާރާ އާއި ސުކޫލުގެ ޖާގައިގެ ދަތިކަން ވެސް ފާހަގަކުރެއްވިއެވެ. މީގެ އިތުރުން ގިރާ ސަރަހައްދު ހިމާޔަތްކުރުމަށް ބޭނުންވާކަންވެސް ކައުންސިލުން ފާހަގަކުރެއްވިއެވެ.

މިއަދުގެ ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން ފާހަގަ ކުރެއްވި ކަންކަމުގައި މަގުފަހި ކޮށްދެއްވުމަށް ސަރުކާރުން ކަމާގުޅޭ މުވައްސަސާތަކާއެކު ކުރައްވާ މަސައްކަތްތައް ކައުންސިލާއި ހިއްސާކުރައްވާފަ އެވެ.