މާދަމާއިން ފެށިގެން މަސްވެރިންނަށް 48 ގަޑިއިރު ތެރޭގައި ފައިސާ ޖަމާވާނެ: ރައީސް

އައިމިނަތު ޝިޔާޒާ

09 ޑިސެމްބަރ 2024 - 11:31

0 comments

މަސްވެރިންނަށް ދޭންޖެހޭ ހުރިހާ ފައިސާއެއް ދީ ޚަލާސްކޮށްފައިވާކަަމަށާއި، މާދަމާއިން ފެށިގެން މަސްވެރިންނަށް 48 ގަޑިއިރުގެތެރޭގައި ފައިސާ ލިބެމުންދާނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މަސްވެރިން މިފްކޯއަށް ކިރާ މަހަށް ގިނަވެގެން 48 ގަޑިއިރުގެ ތެރޭގައި ފައިސާ ޖަމާކޮށްދިނުމަކީ ރައީސް މުއިއްޒުގެ ރިޔާސީ ވައުދެކެވެ.

ކ. އަތޮޅަށަށް މިއަދު ފެއްޓެވި ދަތުރުފުޅުގައި ގާފަރަށް ވަޑައިގެން ރައްޔިތުންނާ ވާހަކަފުޅު ދައްކަވަމުން ރައީސް ވިދާޅުވީ ކުރީގެ ސަރުކާރުން މަސްވެރިންނަށް ދައްކަން ޖެހޭ ފައިސާގެ ތެރެއިން ނުދައްކައި އޮތް 38 މިލިއަން ރުފިޔާ މިއަދު ދައްކައި ނިންމާފައިވާ ކަމަށެވެ.

އެއީ ބީއެމްއެލްގައި އެކައުންޓު ގެންގުޅޭ 196 މަސްވެރިއަކާއި އެމްއައިބީގައި އެކައުންޓު އޮޕަރޭޓްކުރާ 20 މަސްވެރިންނަށް ދޫކުރި ފައިސާ އެވެ.

މަސްވެރިންނަށް ދޭން ޖެހޭ ފައިސާގެ ބެކްލޮގް މިހާރު ހުސްކުރެވިފައި ވާތީ، ބީއެމްއެލްގައި އެކައުންޓު ހުރި ކޮންމެ މަސްވެރިއަކަށް މާދަމާ އިން ފެށިގެން 48 ގަޑިއިރު ތެރޭ ފައިސާ ދޫކުރަން ފަށާނެ ކަމަށް ރައީސް މުއިއްޒު މިއަދު ވިދާޅުވި އެވެ. އެމްއައިބީގައި އެކައުންޓު ހުރި މަސްވެރިންނަށް 48 ގަޑިއިރު ތެރޭ ފައިސާ ހަމަޖެއްސުމުގެ މަސައްކަތް ކުރަމުން އަންނަ ކަމަށް ވެސް ރައީސް ވިދާޅުވި އެވެ.

ރައީސް މުއިއްޒުގެ ވައުދާ އެއްގޮތަށް މަސްވެރިންނަށް 48 ގަޑިއިރުގެ ތެރޭގައި މާދަމާއިން ފެށިގެން ފައިސާ ދޫކުރަން ފަށާނެކަން އެ މަނިކުފާނު އިއުލާން ކުރެއްވިއިރު މާދަމާއަކީ މި އަހަރުގެ މަސްވެރިންގެ ދުވަހެވެ.