އާރްޓީއެލްގެ ހިދުމަތް އަރިއަތޮޅުގައި ފަށަން މަސައްކަތް ކުރަނީ

އައިމިނަތު ޝިޔާޒާ

15 ޑިސެމްބަރ 2024 - 17:22

0 comments

މުޅި ރާއްޖެ ހައި ސްޕީޑް ފެރީން ގުޅައިލުމަށް ސަރުކާރުން ފަށާފައިވާ އާރްޓީއެލް ފެރީގެ ހިދުމަތް އދ. އަތޮޅުގައި ފަށަން ނިންމައިފި އެވެ.

މިހާރު އާރުޓީއެލް ހިދުމަތް ދެމުން އަންނަނީ ހއ. ހދ. ށ. ނ. ރ. ބ. ޅ. ގއ. ގދ އަދި ސ. އަތޮޅުގަ އެވެ. އެ ހިދުމަތް ދިނުމަށް 25 އަށް ވުރެ ގިނަ އުޅަނދު ބޭނުންކުރެ އެވެ.

އދ އަތޮޅުގެ ތިން ރަށަކަށް ރައީސް ޑރ. މުހައްމަދު މުއިއްޒު މިހާރު ކުރައްވާ ދަތުރުފުޅުގައި މިއަދު ހެނދުނު ކުރިއަށްދިޔަ މި ބައްދަލުވުމުގައި ކައުންސިލުން ވަނީ ސުކޫލުގައި ސޯލާ ހަރުކުރުމާ ގުޅޭގޮތުން މަޝްވަރާކުރައްވާފަ އެވެ. އަދި އަތޮޅު ކައުންސިލަށް އާމްދަނީ ހޯދުމަށް މަގުފަހިވާނެ ގޮތަކަށް އދ ލޮނުބޯ، ބޭނުންކުރެވޭނެ ގޮތް ހައްދަވައިދެއްވުމަށާއި އަތޮޅުގެ ޞިއްޙީ ޚިދުމަތް ތަރައްޤީކުރުމަށާއި ދަތުރުފަތުރުގެ ނިޒާމު ހަރުދަނާކުރުމަށާއި ފަތުރުވެރިކަން ފުޅާކުރުމަށް ބޭނުންވާކަން ފާހަގަކުރެއްވި އެވެ.

މީގެ އިތުރުން އަތޮޅު ކައުންސިލުން ވަނީ އަތޮޅުގައި ޕިކްނިކް ދާނެ ރަށްތައް މަދުކަން ފާހަގަކުރައްވައި އެކަން ފަހިކޮށްދެއްވުމަށް އެދިވަޑައިގެންފަ އެވެ.

ރައީސް ވަނީ ދަތުރުފަތުރުގެ ޚިދުމަތް ފުޅާކުރުމަށް އާރްޓީއެލްގެ ޚިދުމަތް ކުރިއަށް ގެންދިއުމަށް މަސައްކަތް ކުރައްވާކަން ފާހަގަކުރައްވާފަ އެވެ. އަދި ދެންވެސް ކައުންސިލުން ފާހަގަކުރެއްވި ކަންކަން ބައްލަވާނެ ކަމަށް ވިދާޅުވެފަ އެވެ.