ރާއްޖޭގައި ވޭޕް މަނާކުރީ ރައްޔިތުން އެކަމަށް އެދޭތީ: ރައީސް

އަލީ ރާޒީ

15 ޑިސެމްބަރ 2024 - 13:45

0 comments

ރާއްޖޭގައި ވޭޕް މަނާކުރަން ނިންމީ ރައްޔިތުން އެކަމަށް އެދޭތީ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އދ. މަހިބަދޫގައި އެ ރަށުގެ ރައްޔިތުންނާ ބައްދަލުކުރައްވާ ރައީސް މުއިއްޒު ވަނީ ރޭ 12:00 އިން ފެށިގެން ރާއްޖޭގައި ވޭޕްގެ ވިޔަފާރި ކުރުމާއި ބޭނުންކުރުން ގާނޫނީ ގޮތުން މަނާކޮށްފައިވާކަން ފާހަގަކުރައްވާފަ އެވެ.

ރާއްޖޭގައި މީގެ ކުރިން އިލެކްޓްރޯނިކް ސިނގިރޭޓުގެ ނުވަތަ ވޭޕްގެ ވިޔަފާރި ކުރަމުން ގެންދިޔައީ ގާނޫނީ އިމުގެ ތެރެއިން ހުއްދަ އޮވެގެން ނަމަވެސް އެކަމުގެ ސަބަބުން ގައުމަށް ބޮޑެތި ގެއްލުންތަކެއް ކުރިމަތިވަމުންދިޔަ ކަމަށް ރައީސް މުއިއްޒު ވިދާޅުވި އެވެ.

"ހާލުގެ ދުލުން އެދެމުން ދިޔައީ ގައުމުގެ ދަރިން، ވޭޕްގެ ވަބާއިން ސަލާމަތް ކޮށްދިނުމަށް،" ރައީސް ވިދާޅުވި އެވެ.

ރައީސް މުއިއްޒު ވިދާޅުވީ ދިވެހި މުޖުތަމައަކީ ވޭޕާއި މަސްތުގެ ވަބާތަކުން ސަލާމަތްކުރެވިފައި ވާ މުޖުތަމައުތަކަކަށް ހަދަންޖެހޭ ކަމަށެވެ. އަދި ސިއްހީ ގޮތުން ޒުވާނުންނާއި އާންމުން ސަލާމަތްތެރިކަމާއެކު ތިބެގެން މެނުވީ ހަޤީޤަތުގައި ޤައުމަށްވެސް ކޮށްދެވޭނެ ކަމެއް ނޯންނާނެ ކަމަށް ވިދާޅުވި އެވެ.

ދަރިންނަށްޓަކައި ހެޔޮ މުސްތަޤުބަލެއް ފޯރުކޮށްދެވެން އޮތީ ޒަމާނުއްސުރެ އާދަވެ، އަށަގަނެފައިވާ ނުރަނގަޅު އާދަތަކުން ސަލާމަތްވެގެން ހޯދޭ ތަރައްޤީވެސް ހާސިލުކޮށްގެން ކަމަށްވެސް ރައީސް ވިދާޅުވި އެވެ.

ބަޔަކު ކުށްވެރި ކުރުމަކީ ސަރުކާރުން އެދޭ ގޮތް ނޫން ކަމަށާއި ބޭނުންވަނީ މަސްތުގެ ބަވާއާއި އެ ނޫންވެސް ގޮތްގޮތުން ކުށުގެވެށީގައި ބަނދެވިފައިވާ މީހުން އެކަންކަމުން ސަލާމަތްކުރުން ކަމުގައި ރައީސް ވިދާޅުވި އެވެ.