މަސްވެރިންގެ މަސައްކަތް ބަލައިގަތުމަކީ ގައުމީ ވާޖިބެއް: ރައީސް

މަރިޔަމް އަނާ

10 ޑިސެމްބަރ 2024 - 12:58

0 comments

މަސްވެރިންގެ ބުރަ މަސައްކަތް ބަލައިގަތުމަކީ ގައުމީ ވާޖިބެއް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް ޑރ. މުއިއްޒު އެގޮތަށް ވިދާޅުވީ މަސްވެރިންގެ ދުވަހުގެ ތަހުނިޔާ ފޮނުއްވައި "އެކްސް" ގައި ކުރެއްވި ޕޯސްޓެއްގައެވެ.

ރައީސް ވިދާޅުވެފައިވަނީ، އަތްވާއި ވާރޭގައި، ދުވާލާއި ރޭގަނޑު، ބިޔަ ކަނޑުތަކުގައި، ދިވެހި މަސްވެރިން ކުރާ ހިތްމަތުގެ އަގު އިހުތިރާމާއިއެކު ވަޒަންކުރުމަކީ ގައުމީ ވާޖިބެއް ކަމަށެވެ.

ކޮންމެ އަހަރެއްގެ ޑިސެމްބަރު މަހުގެ 10 ވަނަ ދުވަސް ފާހަގަކުރަނީ ރާއްޖޭގެ މަސްވެރިކަމުގެ ދުވަހުގެ ގޮތުގަ އެވެ.

މަސްވެރިންގެ މިހާރުގެ އެންމެ ބޮޑު އެއް ކަންބޮޑުވުމަކީ ކިރާ މަހަށް ވާ ފައިސާ ލިބުން ލަސްވުމެވެ.

ރައީސް އިއްޔެ ކ. ގާފަރަށް ކުރެއްވި ދަތުރުފުޅުގައި ބޭއްވި ޖަލްސާއެއްގައި ވިދާޅުވި ގޮތުގައި، އެމަނިކުފާނުގެ ރިޔާސީ ވައުދާ އެއްގޮތަށް 48 ގަޑިއިރު ތެރޭގައި މަސްވެރިންނަށް މިއަދުން ފެށިގެން ފައިސާ ދޫކުރަން ފަށާނެ އެވެ. މަސްވެރިންނަށް ދޭން ޖެހޭ ފައިސާގެ ބެކްލޮގް މިހާރު ހުސްކުރެވިފައި ވާތީ، ބީއެމްއެލްގައި އެކައުންޓު ހުރި ކޮންމެ މަސްވެރިއަކަށް އެ އުސޫލުން ދެން ފައިސާ ޖަމާކުރާނެ އެވެ.

އަދި އެމްއައިބީގައި އެކައުންޓް ގެންގުޅޭ މަސްވެރިންނަށް ވެސް އެ އިންތިޒާމު ހަމަޖެއްސުމުގެ މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ.