މޯލްޑިވިއަން އިން ޗައިނާގެ ހަތަރު ސިޓީއަކަށް ދަތުރުތައް ފަށަނީ

ހަސަން ހަލީމް

10 ޑިސެމްބަރ 2024 - 22:49

0 comments

ގައުމީ އެއާލައިން، މޯލްޑިވިއަނަށް ވައިޑް ބޮޑީ އެއާކްރާފްޓް ގެނެސް އަންނަ ޖެނުއަރީ މަހު، ޗައިނާގެ ވެރިރަށް ބެއިޖިން ހިމެނޭ ގޮތަށް އެ ގައުމުގެ ޖުމްލް ހަތަރު ސިޓީއަކަށް ދަތުރުތައް ފަށާނެ ކަމަށް، ޓްރާންސްޕޯޓް އަދި ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެ އެވެ.

ޓްރާންސްޕޯޓް މިނިސްޓަރު މުހައްމަދު އަމީން އެކްސްގައި ކުރެއްވި ޕޯސްޓެއްގައި ވިދާޅުވީ ދަތުރުތައް ފަށަން ނިންމާފައިވަނީ ޗައިނާގެ ވެރިރަށް ބެއިޖިން، ޝަންގްހާއީ އަދި ޗެންދޫގެ އިތުރުން ޒިއާން އަށް ކަމަށެވެ.

އެ ދަތުރުތައް ފަށާނީ ވައިޑް ބޮޑީ އެއާކްރާފާޓާ އެކު ކަމަށް އަމީން ވިދާޅުވި އެވެ.

މޯލްޑިވިއަންގެ ދަރުތުތައް ރާއްޖެ އިން ބޭރަށް ފުޅާކުރުމަށް ހޯދި ވައިޑް ބޮޑީ ބޯޓާ އެކު އަންނަ މަހުގެ 17 ވަނަ ދުވަހު ދަތުރުތައް ފެށުމަށް ވަނީ ނިންމާފަ އެވެ. މިނިސްޓަރު އަމީން ވިދާޅުވީ ސަރުކާރުގެ އަމާޒަކީ މިފަދަ ދެވަނަ ބޯޓެއް ވެސް އަންނަ އަހަރުގެ މެދުތެރޭ ރާއްޖެ ގެނައުން ކަމަށެވެ.

އައިލޭންޑް އޭވިއޭޝަން ސާވިސެސް (އައިއޭއެސް) އިން އޮޕަރޭޓްކުރާ މޯލްޑިވިއަނަށް ވައިޑް ބޮޑީ ބޯޓް ހޯދަން ޓްރޫނޯޑާ އެކީ އެއްބަސްވުމެއްގައި ސޮއިކުރީ ޖުލައި 26 ގަ އެވެ.

ވައިޑް ބޮޑީ ބޯޓްގެ ދަތުރުތަކަށް މޯލްޑިވިއަނުން ތައްޔާރުވަމުން އަންނަ އިރު، ބޭރުގެ ބައެއް ގައުމުތަކުން ސޭލްސް އޭޖެންޓުން ހޯދަން ވެސް އައިއޭއެސް އިން ދާދި ފަހުން އިއުލާންކުރި އެވެ. އެއީ ދެކުނު އެފްރިކާ އާއި އިނގިރޭސިވިލާތާއި ޖަރުމަނަށެވެ.

ޗައިނާއަކީ މިހާރު އެންމެ ގިނަ އަދަދެއްގެ ފަތުރުވެރިން ރާއްޖެ އަންނަ ގައުމެވެ. އެގޮތުން މި އަހަރުގެ މިހާތަނަށް 1.88 މިލިއަން ފަތުރުވެރިން ރާއްޖެ އައިސްފައިވާއިރު، އޭގެ 13.5 އިންސައްތަ ހިއްސާ ކުރަނީ އެގައުމުންނެވެ.

ޗައިނާގެ އިތުރުން ރާއްޖެއަށް އެންމެ ގިނަ ފަތުރުވެރިން އަންނަނީ ރަޝިޔާ، އިނގިރޭސިވިލާތް، ޖަރުމަނުވިލާތް އަދި އިޓަލީންނެވެ.