މަންމޯހަން ސިންގް އަވަހާރަވުމާ ގުޅިގެން، ރައީސް ތައުޒިޔާގެ މެސެޖެއް ފޮނުއްވައިފި

އަލީ ރާޒީ

27 ޑިސެމްބަރ 2024 - 14:38

0 comments

އިންޑިއާގެ ކުރީގެ ބޮޑުވަޒީރު ޑރ މަންމޯހަން ސިންގް އަވަހާރަވުމާ ގުޅިގެން، ރައީސް ޑރ މުޙައްމަދު މުޢިއްޒު ތައުޒިޔާގެ މެސެޖެއް ފޮނުއްވައިފި އެވެ.

އެމަނިކުފާނުގެ ރަސްމީ "އެކްސް" އެކައުންޓުން ހިއްސާކުރެއްވި މެސެޖުގައި ވަނީ، 2011 ވަނަ އަހަރުގެ ނޮވެމްބަރު މަހު، ކުރީގެ ބޮޑުވަޒީރު މަންމޯހަން ސިންގް ރާއްޖެއަށް ކުރެއްވި ތާރީހީ ޒިޔާރަތުގެ ހަނދާން އާކުރައްވައި، އެ ޒިޔާރަތްވެގެންދިޔައީ ރާއްޖޭގެ އިގުތިޞާދީ އަދި އިޖުތިމާޢީ ކުރިއެރުމުގެ މުހިންމު ނިޝާނަކަށް ކަމަށް ވިދާޅުވެފަ އެވެ.

މީގެ އިތުރުން، ތަމައްދުނު ހާސިލްކުރެއްވުމުގައި ޑޮކްޓަރ ސިންގް ދެއްކެވި ސާބިތުކަމާއި، ދެކުނު އޭޝިޔާގައި އެއްބާރުލުމާއި ތަރައްޤީ ފަހިކުރުމުގައި މުހިންމު ދައުރެއް އަދާކުރާ "ލުކް އީސްޓް ޕޮލިސީ" ހަރުދަނާކުރެއްވުމުގައި އެމަނިކުފާނު އަދާކުރެއްވި އިސް ދައުރުވެސް ރައީސް ފާހަގަކުރެއްވާފައިވެ އެވެ.

ރައީސްގެ މެސެޖު ނިންމަވާލައްވާފައިވަނީ، ފުން ހިތާމައިގެ މިދަނޑިވަޅުގައި ޑޮކްޓަރ ސިންގްގެ ޢާއިލާއަށާއި އިންޑިއާގެ ރައްޔިތުންނަށް ތައުޒިޔާ ވިދާޅުވަމުންނެވެ.