މޫކޭ އާއި ޔާސިރުގެ އިލެކްޓްރޯނިކް ސާމާނުތަކެއް ފުލުހުން ގެންގޮސްފި

އަލީ ރާޒީ

27 ޑިސެމްބަރ 2024 - 14:34

0 comments

އާރުޑީސީގެ ކުރީގެ އެމްޑީ މޫކޭ(ކ) އާއި އެ ކުންފުނީގެ ސީއެފްއޯގެ މަގާމުގައި ހުރި ޔާސިރު

ކުރީ ސަރުކާރުގައި ރޯޑް ޑިވެލޮޕްމެންޓު ކޯޕަރޭޝަން (އާރްޑީސީ)ގެ ތެރޭގައި ހިންގި ކަމަށް ބުނާ ހިޔާނާތުގެ މައްސަލަތަކުގެ ތަހުގީގަށް އެ ކުންފުނީގެ ކުރީގެ ވެރިންގެ އިލްޓްރޯނިކް ސާމާނުތައް ފުލުހުން ހިފަހައްޓައިފި އެވެ.

މިތަކެތި ފުލުހުން ގެންގޮސްފައިވަނީ ކުރީ ސަރުކާރުގެ ދުވަސްވަރު އާރުޑީސީގައި ހިންގި ކަމަށް ބެލެވޭ ޚިޔާނާތުގެ މައްސަލައެއްގެ ތަހުގީގަށެވެ. މި ތަހުގީގުގެ ތެރެއިން ފުލުހުން ވަނީ ރޭގެ ވަގުތެއްގައި މޫސާ އަލިމަނިކާއި ޔާސިރު ދިރިއުޅޭ ތަންތަން ބަލައި ފާސްކޮށްފަ އެވެ.

ދިވެހި ފުލުހުންގެ ޚިދުމަތުން ވިދާޅުވީ އާރުޑީސީއާ ގުޅޭގޮތުން ފުލުހުން ތަހުގީގު ކުރަމުންގެންދާ މައްސަލައެއްގައި ތަހުގީގުގެ ބޭނުމަށް މޫސާ އަލިމަނިކު ދިރިއުޅޭ ތަނާއި ޔާސިރުއަށް ނިސްބަތްވާ ދެތަނެއް ބަލައި ފާސްކޮށްފައިވާ ކަމަށެވެ. އަދި އެތަންތަނުން އިލެކްޓްރޯނިކް ސާމާނުތަކެއް ސީޒްކުރެވިފައިވާ ކަމަށްވެސް ވިދާޅުވި އެވެ.

އިލެކްޓްރޯނިކް ސާމާނުތަކެއް ފުލުހުންގެ ބެލުމުގެ ދަށަށް ގެންދިޔަކަމަށް ވިދާޅުވި ނަމަވެސް ގެންދިޔަ ތަކެތީގެ ތަފްސީލެއް ފުލުހުން ނުދެއްވައެވެ.

ފުލުހުންނާއި އޭސީސީ ގުޅިގެން މީގެކުރިން ބޭއްވި ނޫސްވެރީންގެ ބައްދަލްވުމުގައި ފުލުހުން ބުނީ އާރުޑީސީއާ ގުޅޭ ހިޔާނާތުގެ ބޮޑު މައްސަލަ ތަހުގީގު ކުރަނީ އޭސީސީއާ ގުޅިގެން ކަމަށާއި 2022 ސެޕްޓެންބަރު މަހު ހުށަހެޅުނު މި މައްސަލާގައި އާރުޑީސީގެ ގިނަ މުވައްޒިފުންތަކެއް ބައިވެރިވެފައިވާ ކަމަށް މިހާތަނަށް ތަހުގީގަށް ފާހަގަ ކުރެވިފައިވާ ކަަމަށެވެ.

އެގޮތުން އާރުޑީސީގެ ތިން މީހެއްގެ އެކައުންޓަށް އެކި ފަހަރުމަތިން 14 މިލިއަނެއްހާ ރުފިޔާ ޖަމާކޮށްފައިވާ ކަމަށާއި އެކެއްގެ އެކައުންޓަށް 216 ޓްރާންސެކްޝަން ހަދާފައިވާ ކަމަށް ފުލުހުން ބުނެ އެވެ.

"އެއީ 11 މިލިއަން ރުފިޔާގެ ވާހަކަ މިދައްކަނީ. އެހެންވެ، ގިނަ ޓްރާންސެކްޝަންތަކެއްގެ ވާހަކަ މި ދެއްކެނީ. މިއީ ވަރަށް ގިނަ ބަޔަކު ބައިވެރިވާ ކަމެއް މިއީ،" ފުލުހުން ބުންޏެވެ.

ފުލުހުން ބުނީ އެ ތިން މީހުންގެ އެކައުންޓަށް ޖަމާކޮށްފައިވާ އެތައް މިލިއަން ރުފިޔާއެެއް އެހެން އެކައުންޓްތަކަށް ވެސް ފޮނުވާފައިވާ ކަމަށެވެ. މި ހިޔާނާތުގައި ގާތްގަނޑަކަށް 15 މީހަކު ބައިވެރިވާ ކަމަށްވެސް ފުލުހުން ވަނީ ބުނެފަ އެވެ.