އާރުޑީސީ: 837 މިލިއަން ރުފިޔާއިން ދަރާފައި

އަހުމަދު ނިހާން

05 އޯގަސްޓް 2024 - 18:58

0 comments

އާރްޑީސީން މަޖިލީހުގެ އެސްއޯއީ ކޮމިޓީ ބައްދަލުވުމުގައި

ކުރީގެ ސަރުކާރުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ވަރަށް ބޮޑެތި ބޭކާރު ހަރަދުތަކެއްކޮށް، ކުންފުނި އޮތީ 837 މިލިއަން ރުފިޔާ އިން ދަރާފައި ކަމަށް އެ ކުންފުނީގެ މެނޭޖިން ޑިރެކްޓަރު އަލީ ޒުހެއިރު މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ސްޓޭޓް އެންޑް އެންޓަޕްރައިޒަސް (އެސްއޯއީ) ކޮމިޓީގައި ވާހަކަދައްކަމުން ޒުހޭރު ވިދާޅުވީ މިދިޔަ އަހަރުގެ ނޮވެމްބަރު މަހުގެ ތެރޭގައި ފިނޭންސް މިނިސްޓްރީން އާރްޑީސީ އަށް 90 މިލިއަން ރުފިޔާ ދޫކޮށްފައިވާ ކަމަށާއި ނަމަވެސް އާ މެނޭޖްމެންޓް ކުންފުންޏާއި ހަވާލުވިއިރު ބަޖެޓުގައި އޮތީ ހަތަރު މިލިއަން ރުފިޔާ ކަމަށެވެ.

"ކުންފުނީގައި ނެތް އެއްވެސް ކަހަލަ އިންވޮއިސެއް ފިނޭންސް މިނިސްޓްރީ އަށް ވެސް ކުރެވިފައެއް،" ޒުހޭރު ވިދާޅުވި އެވެ.

އާރްޑީސީގެ ޑެޕިއުޓީ މެނޭޖިން ޑިރެކްޓަރު މުހައްމަދު އަސްބާހު އަލީ ނަސީރު ވަނީ މިއީ ނިޒާމުގެ ތެރެއިން ވަކި ކުންފުނިތަކަށް ފައިސާ ދޭން ކޮށްފައި ހުރި މަސައްކަތެއް ކަމަށް ތުހުމަތު ކުރައްވާފަ އެވެ. އެ މައްސަލަ މިހާރު ފުލުހުންނާއި އޭސީސީން ތަހުގީގު ކުރަމުން އަންނަ ކަމަށްވެސް ވިދާޅުވި އެވެ.

ހަމައެއާއެކު މިހާތަނަށް ބެލި ބެލުމުން އެއްވެސް ބާރުދޭ ލިޔެކިޔުމެއް ނެތި އާރުޑީސީން ގިނަ އަދަދެއްގެ ފައިސާ ދޫކޮށްފައިވާކަމަށް އޭނާ ވިދާޅުވިއެވެ. އެގޮތުން ފާއިތުވީ ދެ އަހަރުގެ މުއްދަތުގައި އެކި ފަރާތްތަކަށް 161 މިލިއަން ރުފިޔާ ދޫކޮށްފައިވާ ކަމަށް އޭނާ ވިދާޅުވިއެވެ.

އެގޮތުން 2022 ވަނަ އަހަރު އެގޮތަށް ދޫކޮށްފައިވަނީ 65 މިލިއަނެއްހާ ރުފިޔާ ކަމަށާއި 2023 ވަނަ އަހަރު ދޫކޮށްފައި ވަނީ 95 މިލިއަނެއްހާ ރުފިޔާ ކަމަށް އަސްބާސް ވިދާޅުވި އެވެ.

ޒުހެއިރު ވަނީ އާރްޑީސީގެ ކުރީގެ މެނޭޖްމަންޓުން ހިންގާފައިވާ ކޮރަޕްޝަން ކަމަށް ތުހުމަތުވާ ބައެއް މައްސަލަތައް ވެސް ކޮމިޓީގައި ހިއްސާކުރައްވައިފަ އެވެ. އެގޮތުން އެއްވެސް ލިޔެކިޔުމަކާ ނުލައި 161 މިލިއަން ރުފިޔާ އިންޓަނެޓް ބެންކިން މެދުވެރިކޮށް ޓްރާންސްފާ ކޮށްފައިވާ މައްސަލައަކާއި އެ ކުންފުނީގެ ސީއެފްއޯ އެކައުންޓަށް 90 މިލިއަން ރުފިޔާ ޖަމާވެ އެ ފައިސާ ވެސް އެފަދަ ގޮތަކަށް ދޫކޮށްފައިވާ މައްސަލަ ފާހަގަކުރެއްވި އެވެ.

އާރްޑީސީއަކީ ކޮރަޕްޝަންގެ ބޮޑެތި ތުހުމަތު އަމާޒުވާ ކުންފުންޏެކެވެ. މީގެ ކުރިން ވެސް އެ އޮފީހުގެ ފައިސާ ތިޖޫރީ ގެއްލުމާއި، އާރްޑީސީގެ އޮފީހުން ވައްކަން ކުރުން ފަދަ އެތައް މައްސަލައެއް ވެސް ވަނީ ހިނގައިފައެވެ.

ކޮރަޕްޝަންގެ މައްސަލާގައި ތަހުގީގުކުރުމަށްޓަކައި މިދިޔަ އަހަރުގެ ނޮވެމްބަރު 15 ގައި ފުލުހުން ވަނީ އާރްޑީސީ އޮފީސްތެރެއަށް ވަދެ، ގިނަ އަދަދެއްގެ ލިޔެކިޔުންތައް ގެންގޮސްފައެވެ.

މިވަގުތު ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ) އިން ވެސް ގެންދަނީ އާރްޑީސީގެ ކޮރަޕްޝަންގެ މައްސަލަ ބަލަމުންނެވެ.