އަލިފާނުގެ ހާދިސާގައި ޝައްކު ކުރެވޭ އެތައް ކަމެއް އެބަހުރި: އެމްޑީޕީ

މަރިޔަމް އަނާ

16 ޑިސެމްބަރ 2024 - 12:18

0 comments

ހައުސިން މިނިސްޓްރީ ހިންގަމުން އައި އިމާރާތުގައި ހިނގި އަލިފާނުގެ ހާދިސާ - ފޮޓޯ: އަވަސް

ހައުސިން މިނިސްޓްރީ ހިންގަމުން އައި އިމާރާތުގައި ފާއިތުވި ބުރާސްފަތި ދުވަހު ހިނގި އަލިފާނުގެ ހާދިސާއާ ގުޅިގެން އިދިކޮޅު އެމްޑީޕީން ސަރުކާރަށް އިހުމާލުގެ ތުހުމަތުކޮށްފި އެވެ.

އެ ޕާޓީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދެއްކެވި ބޭފުޅުން ވިދާޅުވީ މި ބޮޑު އަލިފާމުގެ ހާދިސާ އަކީ "ރާވައިގެން" ހިންގާފައިވާ ކަމެއް ކަމަށް ބެލެވޭ އެތައް ކަމެއް ފެނިފައިވާ ކަމަށެވެ. އެގޮތުން އަލިފާން ނިއްވަން މަސައްކަތް ނުކޮށް، ކުޅިވަރު ބަލަން ކަމާބެހޭ އިދާރަކުގެ މީހުންނާއި ސަރުކާރުގެ އިސް ބޭފުޅުން ވެސް ތިއްބެވި ކަމަށް ބުންޏެވެ.

އަދި އަލިފާންގަނޑު ކޮންޓްރޯލްކުރީ އިމާރާތްތައް އަނދައި ހުލިވެ، ދެން އަދާނެ އިތުރު އެއްޗެއް ނެތް ހިސާބަށް ދިއުމުން ހަ ގަޑީއޮރަށް ވުރެ ގިނަ ވަގުތުވީ ފަހުން ކަމަށް ވެސް އެމްޑީޕީން ބުންޏެވެ. އެ ޕާޓީން ބުނީ މި ހާދިސާއާ ގުޅިގެން ދައުރުވެފައިވާ ބައެއް ވީޑިއޯތަކަށް ބަލާ އިރު ވެސް، އަލިފާން ނިއްވަން އެއްވެސް މަސައްކަތެއް ކުރިން ކޮށްފައި ނުވާކަން ފާހަގަވާ ކަމަށެވެ.

ނަމަވެސް މިހާރު މި ހާދިސާ ހިނގައި ދިޔަ ސަބަބުން ދެނެންގަންނަން ބޭރުން ތަޖުރިބާކާރުންތަކެއް ގެނެސްގެން މަސައްކަތް ކުރަން ސަރުކާރުން ނިންމާފައި އިރުި، ހާދިސާ ހިނގި ތަން އޮތީ ސާފުކޮށްފައި ކަމަށާއި ދެން އެތަނުން ތަހުގީގަށް ނެގޭނީ ކޮން މައުލޫމާތުތަކެއްތޯ އެމްޑީޕީން ސުވާލު އުދައްދާފައިވެ އެވެ.

"މިނިސްޓަރު ފާހަގަ ކުރެއްވީ މިނިސްޓްރީން މިހާރު ފައްޓަވާފައި ހުރި މަޝްރޫއުތަކާ ގުޅޭ ހުރިހާ ލިޔެކިޔުންތަކެއް ގެއްލިގެން ގޮސްފައިވާ ކަމަށް. އެ ލިޔުންތަކަކީ އެއީ މި މާއްދާ ބަޔާންކުރާ ގޮތުން އަރުޝީފު ކުރެވެން ޖެހޭ އެއްޗެއް. އެހެންވީމަ އަރުޝީފު ކުރެވެން ޖެހޭ އެއްޗެއް އަރުޝީފު ނުކޮށް ހުރީތޯ ނޫނީ، އަރުޝީފު ކުރެވިފައި ހުއްޓާ އޭގެ ނަކަލުތައް ގެއްލިގެން ދިޔައީތޯ މިކަންކަން ބަލައި ތަހުގީގު ކުރުމަށް އަޅުގަނޑުމެން އަރުޝީފުގެ ޑިރެކްޓަރުގެ އަރިހުން އެދޭނަން،" އެމްޑީޕީގެ ލީގަލް ޑައިރެކްޓަރު މަހްފޫޒް ސައީދު ވިދާޅުވި އެވެ.

އޭގެއިތުރުން މަހްފޫޒް ވިދާޅުވީ މައްސަލަ ތަހުގީގު ކުރުމަށް ބޭރުގެ ތަޖުރިބާކާރުންގެ އެހީ ހޯއްދެވުމަށް ސަރުކާރުން ނިންމިއިރު، ހާދިސާ ހިނގި ސީން ރޫޅާލައި އެތަން ސާފު ކުރުމުން ސުވާލު އުފެދޭ ކަމަށެވެ.

އެގޮތުން އަލިފާނުގެ ހާދިސާއަކީ ބަޔަކު ގަސްތުގައި ކުރި ކަމަކަށްވާނަމަ، އެތަން ސާފު ކުރުމަކީ ހެކި ނައްތާލުމުގެ އަމަލެއް ކަމަށާއި އެކަމާ ގުޅިގެން ކަންބޮޑުވާ ކަމަށް މަހްފޫޒް ފާހަގަ ކުރެއްވި އެވެ.

ބުރާސްފަތި ދުވަހު ހިނގި އަލިފާނުގެ ހާދިސާގައި އަނދައި އަޅިއަށްވީ ހައުސިން މިނިސްޓްރީ، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ އެވެ. އެ ތިން ތަނުގެ ހިދުމަތްތައް ދަރުބާރުގޭގައި އަލުން ވަނީ ފަށާފަ އެވެ.