އަލިފާނުގެ ހާދިސާގެ ތަހުގީގަށް އާންމުންގެ އެހީއަށް ފުލުހުން އެދިއްޖެ

މަރިޔަމް އަނާ

17 ޑިސެމްބަރ 2024 - 13:31

0 comments

ބުރާސްފަތި ދުވަހު ހިނގި އަލިފާނުގެ ހާދިސާ ހައުސިން މިނިސްޓްރީ އިމާރާތް އަދައިފަ - ފޮޓޯ: އަވަސް

ތިން މިނިސްޓްރީއެއް ހިންގަމުންދިޔަ އިމާރާތުގައި މި މަހުގެ 12 ވަނަ ދުވަހުގެ ހެނދުނު ހިނގި އަލިފާނުގެ ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ ހިއްސާކުރުމަށް ފުލުހުން އެދިއްޖެއެވެ.

މިދިޔަ ބުރާސްފަތި ދުވަހުގެ ހެނދުނު 6:30 ހާއިރު އެންމެ ފުރަތަމަ ރޯވީ ހައުސިން މިނިސްޓްރީގަ އެވެ. އޭގެ ފަހުން، ހުޅުގަނޑު ބޮޑުވަމުން ގޮސް، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އަދި އެ ތަނާ ޖެހިގެން ހުންނަ އެންވަޔަރަންމެންޓް މިނިސްޓްރީގައި ރޯވި އެވެ. ހަތަރު ގަޑިއިރު ފަހުން އަލިފާން ނިއްވާލިއިރު މުޅި ތަން ބޭނުން ނުކުރެވޭ ވަރަށް ވަނީ އަނދައި ހުލިވެފަ އެވެ.

ފުލުހުން މިއަދު ވަނީ އެ ހާދިސާގެ ތަހުގީގަށް އާއްމުންގެ އެހީއަށް އެދިފަ އެވެ. އެ ހާދިސާއާ ގުޅޭ އެއްވެސް މައުލޫމާތެއް އެނގޭ ނަމަ 9911099 އަށް ގުޅަން ފުލުހުން އެދެ އެވެ.

ޓިނު ބިލްޑިންގުގައި ރޯވެ އެ އިމާރާތާ ޖެހިގެން ހުންނަ ގްރީން ބިލްޑިންގަށް އަލިފާން ފެތުރުނީ އެމްއެންޑީއެފްގެ ފަޔާމަނުންގެ އިހުމާލުން ކަމަށް އެމްޑީޕީން ވަނީ ތުހުމަތު ކޮށް، އެ މައްސަލަ މަޖިލީހަށް ވެސް ހުށަހަޅައިފަ އެވެ.

މި ހާދިސާއާ ބެހޭ ގޮތުން މައުލޫމާތު ދިނުމަށް ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި ޝުޖާއު ވިދާޅުވީ، މައްސަލައިގެ ތަހުގީގުގައި ބޭރުގެ ތަޖުރިބާކާރުން ހިމެނޭ ޓީމެއް ވީހާވެސް އަވަހަށް ބައިވެރިކުރުމަށް މަސައްކަތް ކުރަމުން އަންނަ ކަމަށެވެ. އޭނާ ވިދާޅުވީ އުއްމީދަކީ ކުރިއަށް އޮތް ދެތިން ދުވަހެއްގެ ތެރޭގައި އެ ޓީމާ ގުޅިގެން މަސައްކަތް ކުރެވޭނެ ގޮތް ވުން ކަމަށެވެ.

ބުރާސްފަތި ދުވަހު ހިނގި އަލިފާނުގެ ހާދިސާއާ ގުޅިގެން ބޭނުން ނުކުރެވޭ ވަރަށް އެނދި އިމާރާތް ހުރި ބިން ސާފުކުރުމުގެ މަސައްކަތް މިނިސްޓްރީ އޮފް ސިޓީސް, ލޯކަލް ގަވަމެންޓް ޕަބްލިކް ވޯކްސް އިން ވަނީ ފަށައިފަ އެވެ