ކޮރަޕްޝަންގެ ތުހުމަތުގައި ފުލުހުން އެޗުޑީސީއަށް ވަދެއްޖެ

މަރިޔަމް އަނާ

18 ޑިސެމްބަރ 2024 - 19:42

0 comments

ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ހުޅުމާލެއިން ގޯތިތަކެއް ދިންކަމަށް ތުހުމަތުވާ މައްސަލައިގެ ތަހުގީގަށް ފުލުުހުންގެ ހާއްސަ ޓީމެއް އެޗްޑީސީގެ ހެޑް އޮފީހަށް ވަދެ ތަހުގީގަށް މައުލޫމާތު އެެއްކުރުމުގެ މަސައްކަތް ފަށައިފި އެވެ.

މިއަދު އިރުއޮއްސެން ކައިރިވެފައި ވަނިކޮށް ފުލުހުންގެ ޓީމެއް ވަނީ އެޗްޑީސީގެ ހެޑް އޮފީހަށް ވަދެ ފާސްކުރަން ފަށާފަ އެވެ.

ބިންވެރިޔާ ސްކީމުގެ ލިސްޓުގައި ނެތް ބަޔަކަށް ގޯތިތަކެއް ދޫކުރި ކަމަށް ބުނާ މައްސަލަ ފެންމަތިވީ އެގޮތަށް ދޫކުރި ގޯތިތަކުގެ އިންފާރު ރޭނުމުގެ ހުއްދައަށް އެދި އެޗްޑީސީ އިން ހައުސިން މިނިސްޓްރީގައި އެދުމުން އެ ގޯތިތަކަކީ ބިންވެރިޔާ ސްކީމްގެ ދަށުން ގޯތި ހޯދަންވެސް އެދުނު ބައެއް ނޫން ކަމަށް ހައުސިން މިނިސްޓްރީ އިން އެޗްޑީސީ އަށް ލިޔުމުން ދިން ޖަވާބު ސޯޝަލްމީޑިއާގައި އާންމުވުމާ ގުޅިގެންނެވެ.

ލިޔުންތަކެއް އަސްލާ އެއްގޮތަށް އުފައްދައިގެން ނުވަތަ ފޯޖުކޮށްފައިވާ ލިޔުންތަކެއް ބޭނުންކޮށްގެން ގޯތި ދޫކޮށްފައިވާ ކަމަށް ބުނާ މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ ފަޒީލް ރަޝީދުވެސް ހިމެނެ އެވެ.

މިމައްސަލައިގައި އެޗްޑީސީ އިން އަދި ވަކި އެއްޗެއް ނުބުނެ އެވެ.