އަންނަ އަހަރުން ފެށިގެން އަތޮޅުތެރޭގައި ވެސް ވެމްކޯ ބިލާއި ކަރަންޓު ބިލް އެއްކޮށްލަނީ

އައިމިނަތު ޝިޔާޒާ

18 ޑިސެމްބަރ 2024 - 13:32

0 comments

އަތޮޅުތަކުގައިވެސް އަންނަ އަހަރުން ފެށިގެން ކުނީގެ ފީ ބިލް ކުރާނީ ކަރަންޓު ބިލާއެކު ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފި އެވެ.

ދައުލަތުގެ މީޑިއާ، ޕީއެސްއެމްގައި ވާހަކަ ދައްކަވަމުން ވެމްކޯ، ސަދަން އޮޕަރޭޝަންސްގެ މެނޭޖިން ޑިރެކްޓަރު އަހުމަދު ޝާފިއު ވިދާޅުވީ ރަށްތަކުގައި ވެމްކޯގެ ޚިދުމަތް ފަށަނީ، ކުނި މެނޭޖުކުރުމުގެ ޚިދުމަތް ފަށަން އެ ރަށެއްގެ ކައުންސިލުން ވެމްކޯއާއެކު ޕާޓްނާޝިޕް އުސޫލުން ކުރާނެ އިންވެސްޓަށް ވެސް ބެލުމަށް ފަހު ކަމަށެވެ.

އޭނާ ވިދާޅުވި ގޮތުގައި މި ފެށޭ 2025ވަނަ އަހަރު ވެސް ވެމްކޯގެ ޚިދުމަތް އިތުރު ރަށްތަކަށް ފުޅާކުރުމުގެ މަސައްކަތް ކުރިޔަށްދާނެއެވެ. އެހެން ނަމަވެސް މި ވަގުތު އެ ކުންފުނިން އަލަށް ރަށެއްގައި ޚިދުމަތް ފެށުން ބިނާވެފައި އޮތީ ކައުންސިލުން އެކަމަށް އެދޭ މިންވަރަކުން ކަމަށް ވިދާޅުވިއެވެ.

"...ޕާޓްނާޝިޕް އުސޫލަކުން މި ދަނީ. އަޅުގަނޑުމެންނަކަށް ހަމަ ސީދާ ގޮސްފައި، [ޚިދުމަތް] ނުއެއް ފެށޭ. ކައުންސިލްތަކުން ކިހާވަރެއްގެ އިންވެސްޓްމަންޓެއް، ނޫނީ ކިހާ ވަރަކަށް ރެޑީތޯ އަޅުގަނޑުމެން ޝާމިލްކޮށްގެން ޚިދުމަތް އެ ރަށެއްގައި ފަށަން. އެ ކޮންޓްރިބިއުޝަނަށް ވެސް ބޭސްކޮށްފައި އަޅުގަނޑުމެން މި ޚިދުމަތް ފަށަނީ" ޝާފިއު ވިދާޅުވިއެވެ.

މާލެ ސަރަހައްދުގައި ކުނީގެ ބިލާއި ކަރަންޓު ބިލް އެއްކޮށްލީ މިދިޔަ އަހަރު އެވެ. އޭރު ބިލް އެއްކޮށްލީ ބައެއް މީހުން ވެމްކޯއަށް ފައިސާ ނުދައްކާ މައްސަލަ ބޮޑުވެގެން އެކަމަށް ހައްލެއް ހޯދުމަށެވެ.

ގޭބިސީތަކުން ކުނި އުކާލުމަށް ވެމްކޯ އިން މަހަކަށް ނަގަނީ 150 ރުފިޔާގެ ފީއެކެވެ. ކޮމާޝަލް ނުވަތަ ވިޔަފާރިތަކުން ކުނި އުކާލާ ކޮންމެ ދުވަހަކަށް ލީޓަރަކަށް ނަގަނީ 20 ލާރި އެވެ.