ޕީޕިއެމް އުވައިލުމުގެ މަސައްކަތް އިލެކްޝަނުން ފަށައިފި

މަރިޔަމް އަނާ

18 ޑިސެމްބަރ 2024 - 19:35

0 comments

ޕީޕީއެމްގެ ބައެއް އިސްވެރިން - ފައިލް ފޮޓޯ

ވެހިރާއްޖޭގައި 2013 އިން 2018 އަށް ވެރިކަންކުރި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލުމުގެ މަރުހަލާ ނިމުމުގެ ކުރިން ނިންމަން ޖެހޭ ކަމެއް އޮތް ނަމަ، އެކަމެއް އެ ޕާޓީއާ ގުޅިގެން ނިންމަން އިލެކްޝަންސް ކޮމިޝަން (އީސީ) އިން މިއަދު އެދިއްޖެއެވެ.

ރާއްޖޭގައި ކުރިން އެންމެ ނުފޫޒު ގަދަ އެއް ޕާޓީގެ ގޮތުގައި ފާހަގަކޮށްލެވުނު ޕީޕީއެމް އުވާލަން އެ ޕާޓީން ސެނެޓުން މި މަހުގެ ދެވަނަ ދުވަހު ވަނީ ނިންމާފަ އެވެ. މިގޮތަށް ފާސްކުރީ ސެެނެޓް ބައްދަލުވުމުގައި ބައިވެރިވި 42 ސެނެޓަރުންގެ އިއްތިފާގުންނެވެ.

އިލެކްޝަންސް ކޮމިޝަނުން މިއަދު ނެރުނު އިއުލާނެއްގައި ބުނީ ޕީޕީއެމް އުވާލުމަށް އެ ޕާޓީގެ ސެނެޓުން ނިންމާފައިވާތީ، ސިޔާސީ ޕާޓީގެ ޤާނޫނުގެ 30 ވަނަ މާއްދާގެ (ހ) ގެ 2 ވަނަ ނަންބަރުގައިވާ ގޮތުގެމަތީން ޕީޕީއެމް އުވާލުމުގެ މަސައްކަތް ކުރަމުންދާ ކަމަށެވެ.

ޕީޕީއެމް ރަސްމީކޮށް ރަޖިސްޓްރީކުރީ އޮކްޓޫބަރު 27، 2011 ގައެވެ. އެ ޕާޓީއަކީ އެންމެ ކުރު މުއްދަތެއްގައި ވެރިކަމަށް އައި އެއް ޕާޓީއެވެ. މި އަހަރުގެ ސެޕްޓެމްބަރު 19 އާ ހަމައަށް ވެސް އެ ޕާޓީގައި 34،694 މެންބަރުން ތިބި ކަމަށް އިލެކްޝަންސް ކޮމިޝަން (އީސީ)ގެ ވެބްސައިޓުން ދައްކައެވެ.

ޕީއެންސީ އުފެއްދި ނަމަވެސް މި ސަރުކާރު ވެރިކަމަށް އައިއިރު ވެސް އެ ޕާޓީގައި ތިބީ އެންމެ 3،000 އެއްހައި މެންބަރުންނެވެ. ދެ ޕާޓީއެއް ނަމަވެސް، ކޯލިޝަން ހިންގާފައިވަނީ ޖޮއިންޓް ކޯލިޝަނަކުން ދެ ޕާޓީގައި އަބަދު ވެސް އެއް ލީޑަރަކު ހުންނަވައިގެންނެވެ.

ކުރިން އެ ޕާޓީގެ ލީޑަރަކަށް ހުންނެވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ.