ސޯލިހު ސަރުކާރުން ބަދަލުދިން މައްސަލައިގައި ޖިނާއީ ތަހުގީގެއް ހިންގުމަށް އަންގައިފި

އަހުމަދު ނިހާން

22 ޑިސެމްބަރ 2024 - 11:00

0 comments

ނިމިދިޔަ އެމްޑީޕީގެ ސަރުކާރުގައި ސެޓަލްމަންޓް ކޮމިޓީއެއް ހަދައިގެން ކޯޓުން ބޭރުން އަމިއްލަ އެކި ފަރާތްތަކަށް ބަދަލު ދިން މައްސަލާގައި ޖިނާއީ ތަހުގީގެއް ހިންގުމަށް ޕްރޮސެކިއުޓަ ޖެނެރަލް (ޕީޖީ)ގެ އޮފީހުން އެންޓި-ކޮރަޕްޝަން ކޮމިޝަން (އޭސީސީ)އަށް މިއަދު އަންގައިފި އެވެ.

ޕީޖީ އޮފީހުން މިއަދު ބުނެފައިވަނީ 7 ނޮވެންބަރު 2018 އިން ފެށިގެން 17 ނޮވެންބަރު 2023 އަށް ދައުލަތުން އެކި ފަރާތްތަކަށް ބަދަލުގެ ގޮތުގައި ދީފައިވާ ފައިސާއާގުޅޭ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާކުރެއްވުމަށްފަހު، އެ ކޮމިޓީއަށް ފާހަގަވާ ކަންކަމުގެ ޕީޖީ އޮފީހަށް ހުށަހަޅާފައިވާ ކަމަށެވެ.

"އެ ރިޕޯޓުގައިވާ ކަންކަމަށް މި އޮފީހުން ރިއާޔަތް ކުރުމަށް ފަހު، އެ ކަންކަމަކީ އެންޓި-ކޮރަޕްޝަން ކޮމިޝަނަށް ތަހުގީގުކުރުމުގެ ބާރު ލިބިފައިވާ ކަންތައްތަކެއް ކަމަށް ފެންނާތީ، ރައްޔިތުންގެ މަޖިލީހުގެ ރިޕޯޓުގައި ފާހަގަކޮށްފައިވާ މައްސަލައިގެ ޖިނާއީ ތަހުގީގެއް ހިންގުމަށް އެންޓި-ކޮރަޕްޝަން ކޮމިޝަންގައި 17 ޑިސެންބަރު 2024ގައި ދަންނަވާފައިވާނެ އެވެ،" ޕީޖީ އޮފީހުގެ ވެބްސައިޓުގައި ދެންމެ ޝާއިއުކުރި ލިޔުމުގައިވެ އެވެ.

ރައީސް މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު ވަނީ، ކުރީ ސަރުކާރުން އެކުލަވާލި ސެޓަލްމަންޓް ކޮމެޓީ އުވާލައްވައިފަ އެވެ. އަދި އޭރު ބަދަލު ދިނުމަށް ހެދި ނުވަ އެއްބަސްވުމަށް އުވާލުމަށް އޮޑިޓާ ޖެނެރަލް (އޭޖީ) އޮފީހުން ނިންމާފައިވެ އެވެ.

އެ ގޮތުން، ލެ ޓްރިވެނި ޖޭވީ އާއި ދީބާޖާ އިންވެސްޓްމަންޓް ޕްރައިވެޓް ލިމިޑެޓަށް އިތުރު 61.2 މިލިއަން ރުފިޔާ ދޭން ކުރީގެ ސަރުކާރުން ފިނޭންސް މިނިސްޓްރީގެ ސިސްޓަމަށް އަޅާފައިވަނިކޮށް، މި ސަރުކާރުން އެ ފައިސާ ދިނުން ވެސް މަޑުޖައްސައިލި އެވެ.

ސެޓުލްމަންޓް ކޮމިޓީ މެދުވެރިކޮށް ސޯލިހުގެ ސަރުކާރުގައި، 2018 ވަނަ އަހަރުން ފެށިގެން 2023 ވަނަ އަހަރާ ދެމެދު 36 ރަށަކާއި ހަ ފަޅެއް އަދި ދެ ބިލިއަން ރުފިޔާއަށް ވުރެ ބޮޑު އަދަދެއް އެކި ފަރާތްތަކަށް ދީފައިވާ ކަމަށް ތުހުމަތުކުރެ އެވެ.