އެހެން ދީންތަކުގެ ހަރަކާތްތައް ހިންގުމަކީ މަނާކަމެއްކަން ހަނދާންކޮށްދީފި

އިސްމާއިލް ރިޒާ

25 ޑިސެމްބަރ 2024 - 12:43

0 comments

2020 ވަނަ އަހަރު ކްރިސްމަސް ދުވަސް ފާހަގަކުރަން މާފުށީގެ ހޮޓަލެއްގެ ބޭރުގައި ބެހެއްޓި ކްރިމަސް ޓްރީ

ރާއްޖޭގައި އެހެން ދީންތަކުގެ ޝިއާރު ފާޅުކޮށް، ހަރަކާތްތައް ހިންގުމަކީ މަނާކަމެއްކަން ކްރިސްމަސްއާ ދިމާކޮށް އިސްލާމިކް މިނިސްޓްރީން އިއްޔެ ހަނދާންކޮށްދީފި އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ސޮއިކުރައްވައި ހުރިހާ ރަށެއްގެ ކައުންސިލަށް ފޮނުވި ސާކިއުލާއެއްގައި ބުނީ، އެކިއެކި ވަޒީފާތަކަށް ބިދޭސީން ގެންނަ ފަރާތްތަކުންނާއި ޓޫރިސްޓުން ގެންނަ ފަރާތްތަކުން ވެސް ރާއްޖޭގެ ގާނޫނުތަކާއި ގަވާއިދުތަކާ އެއްގޮތަށް އަމަލުކުރުމަށް އެ މީހުންނަށް އިރުޝާދު ދޭން ވާނެ ކަމަށެވެ.

ރާއްޖޭގެ ދީނީ އެއްބައިވަންތަކަން ހިމާޔަތް ކުރުމުގެ ގަވާއިދުގައިވާ ގޮތަށް ބިދޭސީންނާއި ޓޫރިސްޓުންނަށް އިރުޝާދު ދިނުމަކީ އެ މީހުން ރާއްޖެ ގެންނަ ފަރާތްތަތަކުގެ ޒިންމާއެއްކަން މިނިސްޓްރީން ހަނދާންކޮށްދިނެވެ.

ދީނީ އެއްބައިވަންތަކަން ހިމާޔަތް ކުރުމާ ބެހޭ ގަވައިދުގައިވާ ގޮތުން ޣައިރު ދީންތަކުގެ ޝިއާރުތައް ފާޅުކުރުމާއި ޖަމާއަތް ހަދައިގެން އާންމު ތަންތަނުގައި އެފަދަ ދީނީ ހަރަކާތެއް ހިންގުމާއި އަދި އެކަމުގައި ދިވެއްސަކު ބައިވެރިކުރުމަކީ މަނާ ކަމެކެވެ.

ސާކިއުލާގައި ވަނީ ރަށްރަށުގައި ގެސްޓް ހައުސް ހިންގާ ފަރާތްތަކުންވެސް ކަމާ ގުޅޭ ގަވައިދުތަކާ އެއްގޮތަށް އުޅުމަށާއި އާންމު އިޖުތިމާއީ މިންގަނޑަށް ފެތޭ ގޮތަށް ހެދުން އެޅުމަށް ޓޫރިސްޓުން އިރުޝާދު ދިނުމަށް އެދިފަ އެވެ.

ކްރިސްމަސް ފާހަގަކުރުމަށް ކޮންމެ އަހަރަކުވެސް ބައެއް މީހުން އާންމު ތަންތަން ޑެކަރޭޓް ކޮށް ހަދަ އެވެ. ނަމަވެސް ފުލުހުންނަށް އެ މައުލޫމާތު ލިބުމާ އެކު އެފަދަ ތަކެތި ނަގައެވެ.