ފަޒުލްގެ ބޭބެގެ ފޯނު ފުލުހުން ހިފަހައްޓައިފި

ހަސަން ހަލީމް

25 ޑިސެމްބަރ 2024 - 19:31

0 comments

މުހައްމަދު ފަޒީލް ރަޝީދު

ބިންވެރިޔާ ސްކީމާ ގުޅޭގޮތުން ފުލުހުން ތަހުގީގުކުރަމުން އަންނަ މައްސަލައަކާ ގުޅިގެން އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ފޯނު ހިފަހައްޓައިފި އެވެ.

ފުލުހުން ބުނީ ކޯޓު އަމުރެއްގެ ދަށުން ފަޒީލްގެ ފޯނު ހިފެހެއްޓީ މިއަދު ކަމަށެވެ. އެ މައްސަލައާ ގުޅިގެން ފަޒީލް މިވަގުތު ހުރީ މަގާމުން ސަސްޕެންޑްކޮށްފަ އެވެ.

ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ކަމަށްވާ "ބިންވެރިޔާ ސްކީމް"ގެ ބޭރުން ގޯތިތަކެއް ދިން ކަމަށް ތުހުމަތުވާ ކޮރަޕްޝަންގެ މައްސަލަ ފުލުހުންނާއި އޭސީސީ ގުޅިގެން އަންނަނީ ތަހުގީގު ކުރަމުންނެވެ.

އެ ތަހުގީގާއި ގުޅިގެން ގިނަ ބައެއްގެ ޕާސްޕޯޓު ވެސް ފުލުހުން ވަނީ ހިފަހައްޓާފަ އެވެ. އޭގެތެރޭގައި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އާއި ފަޒުލްގެ ބޭބެ، ފަޒީލް ހިމެނެ އެވެ. މި ތަހުގީގުގެ ތެރެއިން ފުލުހުން ދާދިފަހުން ވަނީ ފަޒުލް ދިރިއުޅޭ ގެ ބަލައި ފާސްކޮށް، ބައެއް ތަކެތި ގެންގޮސްފަ އެވެ.