އެމްއައިބީ އިން ތުލުސްދޫގައި އޭޓީއެމްގެ ހިދުމަތް ފަށައިފި

މަރިޔަމް އަނާ

26 ޑިސެމްބަރ 2024 - 19:40

0 comments

އެމްއައިބީގެ އިސްވެރިންނާއި ތުލުސްދޫ ކައުންސިލްގެ ނައިބު ރައީސް އޭޓީއެމް ހުޅުވާދެއްވަނީ.

މޯލްޑިވްސް އިސްލާމިކް ބޭންކުގެ އޭޓީއެމްއެއް ކ. ތުލުސްދޫގައި އިއްޔެ ހުޅުވައިފި އެވެ.

އެ ބޭންކުން އެ ރަށުގައި ބެހެއްޓި އޭޓީއެމްތަކުން 24 ގަޑިއިރު ފައިސާ ޖަމާކޮށް، ނެގޭނެ އެވެ. މި އޭޓީއެމްތަކުން އެއްފަހަރާ ދެ ލައްކަ ރުފިޔާ ޖަމާކުރެވޭނެ އެވެ. ވިޔަފާރިތަކަށް ބިޒްނަސް ކާޑު ބޭނުން ކޮށްގެން އިތުރަށް ޖަމާކުރެވޭނެ އެވެ.

އެމްއައިބީ އިން ބުނީ، އެއީ އެންމެ ފަހުގެ އޭޓީއެމްތަކެއް ކަމަށާއި ކާޑު ބޭނުންނުކޮށް ވެސް ފައިސާ ޖަމާކުރެވޭނެ ކަމަށެވެ. ކާޑާއި ނުލައި ފައިސާ ޖަމާކުރެވޭނީ ފޯނު ނަމްބަރު ބޭނުން ކޮށްގެންނެވެ.

މި ގޮތަށް ފައިސާ ޖަމާކުރުމަށް ފޯނު ނަމްބަރު ޖެހުމުން އޯޓީޕީއެއް ލިބޭނެ އެވެ. އޯޓީޕީ ނަމްބަރު ޖަހައި ވެރިފައިކުރުމަށް ފަހު، ފައިސާ ޖަމާކުރަން ބޭނުންވާ އެކައުންޓު ނަމްބަރު ޖެހުމުން ފައިސާ ޖަމާކުރެވޭނެ އެވެ.

އެމްއައިބީ އިން ދަނީ އެ ބޭންކުގެ ހިދުމަތް މުޅި ރާއްޖެ އަށް ފުޅާކުރުމުގެ މަސައްކަތް ކުރަމުންނެވެ. އެގޮތުން އަންނަ އަހަރު ވެސް ގިނަ ރަށްތަކެއްގައި އެ ބޭންކުގެ އޭޓީއެމްތައް ބަހައްޓަން ވަނީ ނިންމައިފަ އެވެ.