ހަމީދުގެ ކުންފުންޏަށް 44 މިލިއަން ރުފިޔާ ދިން މައްސަލައިގެ ތަހުގީގު އަވަސްކުރަން އަންގައިފި

އަހުމަދު ނިހާން

26 ޑިސެމްބަރ 2024 - 19:55

0 comments

މަޖިލީހުގެ އިސްދޫ ދާއިރާގެ ކުރީގެ މެންބަރު އަލީ ހަމީދު

ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެމްބަރު އަލީ ހަމީދުގެ ކުންފުންޏަކަށް ދައުލަތުން 44 މިލިއަން ރުފިޔާ ދިން މައްސަލައެއްގެ ތަހުގީގު އަވަސްކޮށްދޭން ޕްރޮސެކިއުޓާ ޖެނެރަލް (ޕީޖީ) ން އަންގައިފި އެވެ.

ހުޅުމާލޭގައި އާސަންދަ ކުންފުނިން ހަ ބުރީގެ އޮފީސް އިމާރާތެއް އެޅުމަށް، 2016 ވަނަ އަހަރު ހަވާލުކޮށްފައިވަނީ، ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެންބަރު އަލީ ހަމީދުގެ ކުންފުންޏަށެވެ. އެކަމަކު އެއްވެސް ގޮތަކަށް މަސައްކަތް ކުރިއަށް ނުދިޔުމުން، އެމްޑީޕީގެ ސަރުކާރުގައި ވަނީ ކުންފުންޏަށް ލިބުނު ގެއްލުމުގެ ބަދަލުގެ ގޮތުގައި އެއަށް ވުރެ ބޮޑު މަޝްރޫއެއް ހަވާލުކޮށްފަ އެވެ.

ފަހުން ހަވާލުކުރި ޕްރޮޖެކްޓްގެ އެޑްވާންސް ޕޭމަންޓެއްގެ ގޮތުގައި މިދިޔަ އަހަރު ދެ ފަހަރެއްގެ މަތިން ޖުމްލަ 44 މިލިއަން ރުފިޔާ ދޫކުރި އެވެ. އެ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމެޓީން ވެސް ބަލަމުން އަންނައިރު އެ ކޮމިޓީން ވަނީ އެ މައްސަލަ ފުލުހުންނަށް ހުށަހަޅައިފަ އެވެ.

ޕީޖީ އޮފީހުން މިއަދު ބުނީ އެ މައްސަލައަކީ ދިވެހި ދައުލަތާއި އާންމު މަސްލަހަތު މަތީ ދަރަޖައަކަށް އޮތް މައްސަލައަކަށް ވާތީ، އެ މައްސަލައަށް ހާއްސަ ސަމާލުކަމެއް ދީގެން އަދި އެ މައްސަލައަށް ހާއްސަ ތަހުގީގީ ޓީމެއް އެކުލަވާލައި އަވަސް މައްސަލައެއްގެ ގޮތުގައި ބެލުމަށް ފުލުހުންނަށް އަންގާފައިވާ ކަމަށެވެ.

ޕީޖީ އޮފީހުން ބުނިގޮތުގައި އެ މައްސަލާގައި ހިމެނޭ ފަރާތްތަކާ ގުޅޭ އެ ބާވަތުގެ އިތުރު ޕްރޮޖެކްޓެއްގެ އެއްބަސްވުމެއް ހަދާފައިވާނަމަ، އެކަން ވެސް އެ މައްސަލައިގެ ތެރެއިން ތަހުގީގު ކުރުމަށް ވަނީ އަންގައިފަ އެވެ.

މާލިއްޔަތު ކޮމިޓީއަށް އާސަންދައިން ފޮނުވި ސިޓީއެއްގައި ބުނީ އެ ކުންފުނިން ނޯތު ކޯސްޓްރަކްޝަންއަށް ހޮސްޕިޓަލެއް އެޅުމަށް ހަވާލު ކުރުމަށްފަހު، އެ އެއްބަސްވުން ބާތިލް ކުރުމާ ގުޅިގެން ފައިސާ ދޭން ޖެހުނު ކަމަށާއި 2022 ގައި އެ ހޮސްޕިޓަލުގެ ބަދަލުގައި އޮފީސް އިމާރާތެއް އެޅުމަށް އެޑްވާންސް ޕޭމަންޓެއްގެ ގޮތުގައި 44 މިލިއަން ރުފިޔާ ދިން ނަމަވެސް އެ މަސައްކަތް ކުރިއަށް ނުދާ ކަމަށެވެ.

ސައުތު ކޯސްޓަށް އެ މަސައްކަތް ނުކުރެވުނީ އެ ކުންފުނީގައި އެކަން ކުރުމުގެ ގާބިލުކަން ނެތުމުން ކަމަށް ބެލެވޭ ކަމަށް ވެސް އާސަންދައިން ވަނީ ސިޓީގައި ފާހަގަކޮށްފަ އެވެ.

މިދިޔަ ޖުލައި މަހު މާލިއްޔަތު ކޮމިޓީއިން ބޭއްވި ބައްދަލުވުމެއްގައި، މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ އާސަންދަ ކުންފުނީގެ މަސައްކަތް ހުއްޓާލުމުން އެ ކުންފުންޏަށް ގެއްލުންވާނެ ކަމަށް ބެލެވެނީ 18 މިލިޔަން ރުފިޔާ ނަމަވެސް، އޭގެ ބަދަލުގައި 44 މިލިޔަން ރުފިޔާގެ މަޝްރޫއެއް ދިނުމަކީ ބޮޑު މައްސަލައެއް ކަމަށެވެ.