އާސަންދައިގެ ޑިޕާޓްމަންޓެއް އުވައިލާތީ މުވައްޒަފުންގެ ކަންބޮޑުވެއްޖެ

އަހުމަދު ނިހާން

26 ޖެނުއަރީ 2025 - 14:35

0 comments

އާސަންދަ ކުންފުނީގެ ކޭސް ޕްރޮސެސިން ޑިޕާޓްމެންޓު އަންނަ މަހުން ފެށިގެން އުވާލަން ނިންމާފައިވާ ކަން އިއުލާން ކުރުމުން އެކަމާ ދެކޮޅަށް އެ ކުންފުނީގެ ބައެއް މުވައްޒަފުން ރައީސް އޮފީހާއި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑަށް ޕެޓިޝަނެއް ހުށަހަޅައިފަ އެވެ.

އާސަންދައިގެ މެނޭޖްމަންޓުން އެ ކުންފުނީގެ ކޭސް ޕްރޮސެސިން ޑިޕާޓްމަންޓާއި ސުޕަވައިޒަރުންގެ މަގާމު އުވައިލަން ނިންމި ނިންމުމަށް އަމަލުކުރަން ފަށާނީ އަންނަ ފެބްރުއަރީގަ އެވެ.

އެ ނިންމުން ބަދަލުކުރަން އެދި އެ ކުންފުނީގެ 50 މުވައްޒަފުން ސޮއިކޮށް، ރައީސް އާއި ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު އަދި އާސަންދަ ކުންފުނީގެ ޑިރެކްޓަރުންގެ ބޯޑަށް މިއަދު ޕެޓިޝަނެއް ވަނީ ހުށަހަޅާފަ އެވެ.

ކުންފުނީގެ ނިންމުމާ މެދު ކަންބޮޑުވުން ފާޅުކޮށް އެ ޕެޓިޝަންގައި ބުނީ، އެއީ 60 އަށްވުރެ ގިނަ މުވައްޒަފުންގެ ދިރިއުޅުމަށާއި ކުންފުނީގެ އޮޕަރޭޝަންތަކުގެ ހަރުދަނާކަމާއި އިތުބާރާއި ޔަގީންކަމަށް ނޭދެވޭ އަސަރު ފޯރާނެ ނިންމުމެއް ކަމަށެވެ.

މުވައްޒަފުންގެ ފަރާތުން ހުށަހެޅި ޕެޓިޝަނުގައިވަނީ، އެ ކުންފުނީގެ މެނޭޖްމެންޓުން ނިންމާ ނިންމުންތަކާއި ކޮށި ލީޑަޝިޕާއި، ކްރިޓިކަލް އޮޕަރޭޝަންތަކުގައި ބައިވެރިނުވުމުގެ ސަބަބުން ކުންފުންޏަށް ބޮޑެތި ގެއްލުންތަކާ ކުރިމަތިލާންޖެހިފައިވާ ކަމަށެވެ.

އެ ޕެޓިޝަނުގައިވަނީ ކަސްޓަމާ ސާވިސް ޑިޕާޓްމެންޓުގައި، މުވައްޒަފުންގެ ދަތިކަމާއެކު ހެވީ ލޯޑުގައި މަސައްކަތްކުރި ނަމަވެސް، މެނޭޖިން ޑިރެކްޓަރު ޒީނިޔާވަނީ ސިސްޓަމެޓިކް މައްސަލަތަކަށް ހައްލު ހޯދުމުގެ ބަދަލުގައި އެ ޑިޕާޓްމެންޓު ކުށްވެރިކޮށް، ބަދަލުތައް ގެންނަންޖެހޭ ކަމަށް ބުނެފައެވެ.

އެ މުވައްޒަފުންގެ ބުނެފައިވަނީ ކުންފުނީގައި ދިގުދެމިގެންދާ ގޮންޖެހުންތަކަކީ މެނޭޖްމަންޓުގެ ނާގާބިލްކަމާއި، ގޯސް ނިންމުންތަކުގެ ސީދާ ނަތީޖާއެއް ކަމުން، ކަސްޓަމާ ސާވިސް ޑިޕާޓްމަންޓަށް ދުވަހުން ދުވަހަށް ދިމާވާ އުނދަގޫތަކާ ކުރިމަތިލާން ޖެހެނީ އެކަށީގެންވާ ސަޕޯޓެއް ނުވަތަ ޒަމާނީ ހައްލުތަކެއް ނެތި ކަމަށެވެ.

މިކަންކަން ބިނާކުރަނިވި ގޮތެއްގައި ހައްލުކުރުމުގެ ބަދަލުގައި، ބަދަލުތަކެއް ގެންނަން ޖެހޭކަން ނިސްބަތްކޮށްފައިވަނީ ޑިޕާޓްމަންޓުން ކޭޕީއައި ފުރިހަމަ ނުކުރުމުން ކަމަށް އެ ޕެޓިޝަނުގައިވެއެވެ.

އެ ކުންފުނީގެ މުވައްޒަފުން ހުށަހަޅާފައިވާ ކަންތައްތަކުގެ ތެރޭގައި:

ކޭސް ޕްރޮސެސިން ޑިޕާޓްމެންޓް އުވައިނުލުން
ސުޕަވައިޒަރުންގެ ރޯލު އުވައިނުލުން
ތަޖުރިބާހުރި މުވައްޒަފުންގެ މަސައްކަތް ބަލައިގަތުން
ސުޕަވައިޒަރީ އެލޮވެންސްގެ ގޮތުގައި ދޭ 1000 ރުފިޔާ ކަނޑައިނުލުން
މަސައްކަތުގެ ވޯކްލޯޑު މުވައްޒަފުންގެ މެދުގައި ހަމަހަމަކަމާއެކު ބަހައިލުން
ނިންމުންތައް ނިންމުމުގައި ދެ ފުށް ފެންނަ ގޮތަށް މުވައްޒަފުންނާ މަޝްވަރާ ކުރުން

މި ޕެޓިޝަނުގައިވަނީ ރައީސުލްޖުމްހުރިއްޔާއާއި ކަމާގުޅުންހުރި އިދާރާތަކުން މި މައްސަލަތަކަށް ހައްލު ހޯދައިދިނުމަށް އެދިފައެވެ.

މުވައްޒަފުންގެ ޕެޓިޝަނުގައި ވަނީ ކުންފުނީގެ މެނޭޖްމަންޓުން އަމަލުކުރަމުންދާ ގޮތުގެ ސަބަބުން ވަޒީފާ މަތިން ފޫހިވެ، ބައެއް މުވައްޒަފުން ވަޒީފާއިން ވަކިވެފައިވާ ކަން ވެސް ފާހަގަކޮށްފަ އެވެ. އަދި އެކަމުގެ ސަބަބުން މިހާރު ތިބި މުވައްޒަފުންނަށް ދަތިތަކާ ކުރިމަތިވެ، މެނޭޖުމަންޓަށް އިތުބާރު ކުޑަވެފައިވާ ކަމަށް ބުނެފައިވެ އެވެ.

މި ބަދަލުތައް ފަހަތަށް ޖައްސައި، އިންސާފުވެރި ލީޑަޝިޕް ސްޓްރަކްޗަރތައް އަލުން ގާއިމްކޮށް، މުވައްޒަފުންގެ ޙިއްސާ ދެނެގަނެ، އާސަންދައަކީ ސްޓޭބަލް، އެފިޝަންޓް، އަދި ފައިދާހުރި އާންމު ޚިދުމަތްތައް ފޯރުކޮށްދޭ ފަރާތެއްގެ ގޮތުގައި މެނޭޖްމަންޓުން އަވަސް ފިޔަވަޅުތަކެއް އެޅުމަކީ ވަރަށް މުހިންމު ކަމެއް ކަމަށް ވެސް ވަނީ ބުނެފަ އެވެ.