އަލިފާނުގެ ހާދިސާގެ ތަހުގީގަށް އައި އިންޑިއާގެ ޓީމް ފުރައިފި

ހަސަން ހަލީމް

28 ޑިސެމްބަރ 2024 - 14:43

0 comments

ތިން މިނިސްޓްރީއަކާއި ސިޓީ ކައުންސިލުގެ ބައެއް ހިންގަމުން އައި އިމާރާތުގައި ހިނގި އަލިފާނުގެ ހާދިސާ

ތިން މިނިސްޓްރީއަކާއި މާލެ ސިޓީ ކައުންސިލުގެ ބައެއް ހިންގަމުން އައި އިމާރާތުގައި ހިނގި އަލިފާނުގެ ހާދިސާގެ ތަހުގީގަށް ބޭނުންވާ ކަންކަން ދިރާސާ ކުރުމަށް ފަހު އިންޑިއާގެ ފުލުހުންގެ ޓީމް ފުރައިފި އެވެ.

ހައުސިން އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީގައި ހިނގި އަލިފާނުގެ ބޮޑު ހާދިސާގެ ތަހުގީގަށް ރާއްޖެ އައި އިންޑިއާގެ ތަޖުރިބާކާރުންގެ ޓީމް ފުރާފައި ވަނީ، ފުލުހުން ބުނި ގޮތުގައި، މި މަހު 22 ވަނަ ދުވަހު އެވެ.

ފުލުހުން ބުނީ އެ ޓީމުން އަލިފާނުގެ ހާދިސާ ހިނގި ތަންތަން ބަލައި ތަހުގީގު ފުރިހަމަ ކުރުމަށް ބޭނުންވާ އެންމެހާ ކަންކަން ދިރާސާ ކޮށްފައިވާ ކަމަށެވެ. އަދި އެ ހާދިސާ އާ ގުޅޭ ފޮޓޯ އާއި ވީޑިއޯ އަދި ސީސީޓީވީ ފުޓޭޖްގެ އިތުރުން ހާދިސާ އާ ގުޅުންހުރި މުހިންމު މައުލޫމާތުތައް އެ ޓީމާ ހިއްސާ ކޮށްފައިވާ ކަމަށް ފުލުހުން ބުންޏެވެ.

އަލިފާނުގެ ހާދިސާއާ ގުޅިގެން ފުލުހުން ކުރިއަށްގެންދާ ތަހުގީގުގައި އާންމުންގެ އެހީތެރިކަމަށްވެސް ވަނީ މީގެ ކުރިން އެދިފަ އެވެ. އެގޮތުން އަލިފާނުގެ ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ އެކަން މޭޖަރ ކްރައިމް އިންވެސްޓިގޭޝަނާ ހިއްސާކުރުމަށް ދިވެހި ފުލުހުންގެ ހިދުމަތުންވަނީ އެދިފައެވެ.

މި މަހުގެ 12ވަނަ ދުވަހުގެ ހެނދުނު ހިނގި އަލިފާނުގެ ހާދިސާގައި ގެދޮރުވެރިކަމާބެހޭ ވުޒާރާއާއި އިމާރާތް ކުރުމާބެހޭ ވުޒާރާ އަދި ތިމާވެއްޓާބެހޭ ވުޒާރާ ހިންގަމުން އައި އިމާރާތްތައް އެއްކޮށް އަނދާ ހުލިވިއެވެ.

އެ ވުޒާރާތައް މިހާރު ހިންގަމުން އަންނަނީ ވަގުތީ ގޮތުން ދަރުބާރު ގޭގަ އެވެ.