ވީއައިއޭއަށް ޖެއްސި ޖެޓްތަކުގެ އަދަދު އަށް ޕަސަންޓް އިތުރުވެއްޖެ

ހުމާ ނަސީމް

30 ޑިސެމްބަރ 2024 - 13:28

0 comments

ވެލާނާ އިންޓަނޭޝަނަލް އެއާޕޯޓް (ވީއައިއޭ)އަށް ޖެއްސި ޖެޓްތަކުގެ އަދަދު މިދިޔަ އަހަރަށް ވުރެ މިއަހަރު އިތުރުވެއްޖެ އެވެ.

އެމްއޭސީއެލްގެ އިސް އޮފިޝަލަކު ވިދާޅުވީ، މި ވަގުތު ވެސް އެއާޕޯޓުގައި 30 ޕްރައިވެޓް ޖެޓު ޕާކުކޮށްފައި އެބައޮތް ކަމަށެވެ. އަދި ޖެޓް މޫވްމަންޓުތައް ވެސް މި އަހަރު އިތުރުވިއިރު، މި މަސް ފެށިގެން، އިއްޔެގެ ނިޔަލަށް 148 ޖެޓް މޫވްމަންޓްސް ރެކޯޑުކުރެވިފައިވާ ކަމަށް ވިދާޅުވިއެވެ.

މިއީ މިދިޔަ އަހަރުގެ ޑިސެމްބަރު މަހުގެ 28ވަނަ ދުވަހުގެ ނިޔަލަށް ރެކޯޑުކުރެވުނު 137 މޫވްމަންޓާ އަޅައިކިޔާއިރު، 11 މޫވްމަންޓު އިތުރުވުމެކެވެ. އެެހެންކަމުން މި އަހަރުގެ އަދަދަކީ އަށް ޕަސެންޓުގެ އިތުރުވުމެއް ކަމަށް އޮފިޝަލް ފާހަގަކުރެއްވިއެވެ.

އޮފިޝަލް އިތުރަށް މައުލޫމާތު ދެއްވި ގޮތުގައި މިދިޔަ އަހަރު، ޑިސެމްބަރު 28ވަނަ ދުވަހުގެ ނިޔަލަށް ރެކޯޑުކުރެވިފައިވަނީ 2،107 މޫވްމަންޓް ކަމަށެވެ. ނަމަވެސް މި އަހަރު، މިހާތަނަށް 2،326 ޖެޓު މޫވްމަންޓު ރެކޯޑުކުރެވިފައިވާއިރު މިއީ 10 ޕަސެންޓް އިތުރުވުމެއް ކަމަށް ފާހަގަކުރެއްވިއެވެ.

ވެލާނާ އިންޓަނޭޝަނަލް އެއާޕޯޓްގައި ޖެޓް ޕާކް ކުރުމަށް 68 ޕާކިން ސްލޮޓް ހަދާފައިވެ އެވެ. ރާއްޖެއަށް ޒިޔާރަތް ކުރާ ފަތުރުވެރިންނަށް މަރުހަބާ ކިޔުމަށް ފުރިހަމައަށް ތައްޔާރުވެފައިވާ ކަމަށްވެސް އެމްއޭސީއެލް އިން ބުންޏެވެ.

މިދުވަސްވަރަކީ ރާއްޖެއަށް ކޮންމެ އަހަރަކުވެސް އެންމެ ގިނަ ފަތުރުވެރިން އަންނަ ރާއްޖޭގެ ޓޫރިޒަމްގެ އެންމެ ބާރުބޮޑު ދުވަސްވަރެވެ.

ވެލާނާ އިންޓަނޭޝަނަލް އެއާޕޯޓު ބޮޑުކުރަން މިހާރު ކުރިއަށްދާ މަޝްރޫއު އަންނަ އަހަރު ތެރޭގައި ނިންމާލެވޭނެ ކަމަށް ސަރުކާރުން ވަނީ ބުނެފައެވެ. އެ މަސައްކަތް ނިންމާލެވި، އަންނަ އަހަރު 2.2 މިލިއަން ފަތުރުވެރިން ގެންނަން ސަރުކާރުން ވަނީ އަމާޒު ކަނޑައަޅައިފައެވެ.

ތަފާސްހިސާބުތައް ދައްކާ ގޮތުގައި މި އަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރީ ޗައިނާއިންނެވެ. އެ ގައުމުން 259،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. ދެވަނައިގައި އޮތް ރަޝިއާއިން 214،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. ޖުމުލަ 170،000 އަށްވުރެ ގިނަ ފަތުރުވެރިންނާ އެކު ތިންވަނައަށް އެންމެ ގިނައިން ރާއްޖެއަށް ޒިޔާރަތްކުރީ އިނގިރޭސިވިލާތުންނެވެ.