ވިއްސާރައިގެ ގެއްލުންވި 36 ގޭބީސީއެއްގެ 226 މީހަކަށް ވަގުތީ ބޯހިޔާވަހިކަން

އައިމިނަތު ޝިޔާޒާ

04 ޖެނުއަރީ 2025 - 13:53

0 comments

މާލެ އަށް އަށް އިއްޔެ ކުރި ގަދަ ވިއްސާރައިގައި ހާލުގައި ޖެހުނު 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކެއުންބުއިމުގެ އެހީތެރިކަން ފޯރުކޮށްދޭން ފަށާފައިވާ ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެމްޑީއެމްއޭ) އިން މިއަދު ބުނެފި އެވެ.

އިއްޔެ ކުރި ވިއްސާރާގައި މާލޭގެ އެކި ސަރަހައްދުތަކުގައި ފެންބޮޑުވެ އާންމުންގެ މުދަލަށާއި ގޭގެއަށް ބޮޑެތި ގެއްލުންތައްވި އެވެ. ބައެއް ސަރަހައްދުތަކުގައި ފެންބޮޑުވެ، ޕާކުކޮށްފައި ހުރި ވެހިކަލްތަކަށް ވެސް ވަނީ ގެއްލުންވެފަ އެވެ.

އެމްއެންޑީއެފް އިން ބުނީ މާލޭން 30،000 ޓަނަށް ވުރެ ގިނަ ފެން ހިންދި ކަމަށެވެ.

މާލޭގައި ފެންބޮޑުވެގެން އެހީތެރިކަމަށް 774 ތަނަކުން ރިޕޯޓް ކުރިއިރު އޭގެ ތެރެއިން 554 ތަނަކުން އެދުނީ ވެލިބަސްތާ ޖަހައިދޭން ކަމަށް އެމްއެންޑީއެމްއޭ އިން ބުންޏެވެ. ވެލިބަސްތާ ޖަހައި ދިނުމުގެ މަސައްކަތްކުރީ ފުލުހުންނާއި ސިފައިންނާއި ސިޓީ ކައުންސިލާއި ލޯކަލް ގަވަމެންޓް މިނިސްޓްރީ އާއި ސްކައުޓުންނެވެ.

އެމްއެންޑީއެމްއޭގެ ރިޕޯޓަށް ބަލާއިރު މި ވިއްސާރައިގައި މިހާތަނަށް އެންމެ ބޮޑު ގެއްލުމެއްވީ ފ. ނިލަންދޫ އަދި ކ. ހިންމަފުއްޓަށެވެ. ނިލަންދޫގެ 80 ޕަސެންޓުގައި ފެން ބޮޑުވިއިރު ހިންމަފުށީގެ 60 ޕަސެންޓަށް ފެން ބޮޑުވި އެވެ. އަދި ކ. ގުރައިދޫގެ 60 ގެއަކަށް އެކި ވަރުގެ ގެއްލުންތައް ވި ކަމަށް އެންޑީއެމްއޭ އިން ބުންޏެވެ.

މި ވިއްސާރައިގައި ރ. އިނގުރައިދު އާއި ށ. ނަރުދު އަށް ވެސް އިއްޔެ އުދައަރައި ބޮޑެތި ގެއްލުންތަކެއް ވި އެވެ.

މިއަދު ވެސް މެދުރާއްޖެ ތެރެއަށާއި އުތުރުގެ ރަށްތަކަށް ބޯކޮށް ވާރޭވޭނެ ކަމަށް ލަފާކުރި ނަމަވެސް ކުރިއަށް އޮތް ދެ ދުވަސް ތެރޭ މޫސުން މަޑުމަޑުން ރަނގަޅުވާން ފަށާނެ ކަމަށް މޫސުމާ ބެހޭ ގައުމީ އިދާރާ އިން ލަފާކުރެ އެވެ.