ޗައިނާގައި ފެތުރެނީ މޫސުމީ ބައްޔެއް: އެޗްޕީއޭ

މަރިޔަމް އަނާ

05 ޖެނުއަރީ 2025 - 16:34

0 comments

ޗައިނާގައި ފެތުރޭ ނޭވާލާ ނިޒާމުގެ ބައްޔަކީ މޫސުމީ ބައްޔެއް ކަމަށާއި އެ ގައުމުގެ ހާލަތު މޮނިޓާކުރަމުން އަންނަ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން މިއަދު ބުނެފިއެވެ.

މި ދުވަސްވަރު ޗައިނާގައި ނޭވަލާ ނިޒާމުގެ ބަލިތައް އާދަޔާ ހިލާފަށް ގިނަވަމުންދާ ކަމަށާއި އިމަޖެންސީ ހާލަތު އިއުލާނުކޮށްފައިވާ ކަމަށް ފެތުރެމުންދާ ހަބަރާ ގުޅިން އެޗްޕީއޭ އިން މީޑިއާތަކަށް ފޮނުވި މެސެޖެއްގައި ބުނީ އެ ގައުމުގައި އިމަޖެންސީ ހާލަތު އިއުލާނުކޮށްފައި ނުވާ ކަމަށެވެ.

ދުނިޔޭގެ ސިއްހަތު ޖަމްއިއްޔާ، ޑަބްލިއުއެޗްއޯއާ ހަވާލާދީ އެޗްޕީއޭ އިން ބުނީ، ޗައިނާގެ އެކި ހިސާބުތަކުގައި މިދިޔަ 2 ނޮވެމްބަރުން ފެށިގެން ނޭވާލާ ނިޒާމުގެ ބަލިތައް އިތުރުވަމުންދާ ކަމަށް ފާހަގަކުރެވިފައިވާ ކަމަށެވެ.

ފިނި މޫސުމާ ދިމާކޮށް ޗައިނާ އަދި ފިނި މޫސުން އަންނަ އެހެން ގައުމުތަކުގައި ނޭވާލާ ނިޒާމުގެ ބަލިތައް އިތުރުވާ ކަމަށާއި މިދިޔަ އަހަރާއި އަޅާބަލާއިރު ޗައިނާގައި މި މޫސުމުގައި ނޭވާލާ ނިޒާމުގެ ބަލިތައް ފެންނަ މިންވަރާއި ބަލީގައި ބޮޑުވަރުވާ މީހުންގެ ނިސްބަތް މަދު ކަމަށް ތަފާސްހިސާބުތަކުން ފާހަގަކުރެވޭ ކަމަށް އެ ގައުމުގެ ސީޑީސީއާ ހަވާލާދީ ޑަބްލިއުއެޗްއޯ އިން ބުނެފައިވެ އެވެ.

އެޗްޕީއޭއިން ބުނީ، މި ހާލަތު މޮނިޓާކުރަމުން އަންނަ ކަމަށެވެ.

މި ދުވަސްވަރަކީ ވަރަށް ގިނަ މީހުން ޢުމްރާއިންނާއި އެކި ސަރަހައްދުތަކަށް ދަތުރުކުރުމަށް ފަހު އެނބުރި އަންނަ ދުވަސްވަރުކަމުން، ނޭވާލާ ނިޒާމުގެ ބަލިތައް މި ދުވަސްވަރު ރާއްޖޭގައި ވެސް އިތުރުވެދާނެ ކަމަށް އެޗްޕީއޭއިން ވަނީ ލަފާކޮށްފައެވެ.

އެހެންކަމުން ސަމާލުކަންދިނުން މުހިންމު ބައެއް ކަންކަން:

ރޯގާ އަދި ކެއްސުން ފަދަ އަލާމާތްތައް ހުންނަ ފަރާތްތަކުން އާއްމު ތަންތަނަށް ނުކުންނައިރު މާސްކް އަޅައިގެން އުޅުމާއި، އުމުރުން ދުވަސްވީ މީހުންނާއި، ތުއްތު ކުދިންނަށް ޒިޔާރަތްނުކުރުން
ނޭވާލަން އުނދަގޫވުން، މޭގައި ރިއްސުން، އާދަޔާ ޚިލާފަށް ވަރުބަލިވުން، ނުވަތަ އަލާމާތްތައް ގިނަ ދުވަހަށް ދެމިގެންދާނަމަ ޑޮކްޓަރެއްގެ ލަފާ ހޯދުން
ބަލިޖެހިގެން ބޮޑުވަރު ވެދާނެ މީހުން (ނޭވާހިއްލުންފަދަ ނޭވާލާ ނިޒާމުގެ ބަލި ހުންނަ މީހުން، ދިފާއީ ބާރު ބަލިކަށި މީހުން، އުމުރުން ދުވަސްވީ މީހުން، ކުޑަކުދިން، މާބަނޑު މީހުން) ބަލީގައި ބޮޑުވަރު ނުވިކަމުގައި ވިޔަސް އަވަހަށް ސިއްހީ ފަރުވާ ހޯދުން