ހިޔާ ފްލެޓް ލިބުނު ސިފައިންނަށް ސިފްކޯ ފްލެޓް ވެސް ދީފި

އަހުދު ނިހާން

07 ޖެނުއަރީ 2025 - 13:14

0 comments

ސިފްކޯ ފްލެޓްތައް - ފޮޓޯ/ އެމްއެންޑީއެފް

ހިޔާ މަޝްރޫއުން ފްލެޓް ލިބުމުން ސިފްކޯ ފްލެޓް ނުދޭން ނިންމި ނިންމުން ބާތިލްކޮށް ފްލެޓް ހަވާލުކޮށްފި އެވެ.

މި ކަން ހާމަވީ އިއްޔެ ސިވިލް ކޯޓުން ކުރި ހުކުމަކުންނެވެ. ސިފްކޯ ފްލެޓް ނުދޭން ނިންމި ނިންމުންމާ ގުޅިގެން ސިފައިންގެ ދެ މީހަކު ވަނީ ސިފްކޯއާ ދެކޮޅަށް ދައުވާކޮށްފަ އެވެ.

ސިފްކޯއިން ހުޅުމާލޭގައި އިމާރާތް ކުރި 300 ހައުސިން ޔުނިޓުން ފްލެޓު ލިބޭނެކަމަށް އޮކްޓޫބަރު 11، 2014 ގައި އެންގުމަށް ފަހު، ހިޔާގެ ފްލެޓު ލިބިފައިވާ ކަމަށް ބުނެ ފްލެޓު ނުދޭން ސިފްކޯއިން ނިންމީ ޔޫސުފް ނިޝާރު، ހ. ތުލްޒާ އާއި އިސްމާއީލް މުއާޒު، މއ. ހަލްކާ އަށެެވެ.

އެ ދެމީހުންނަށް ސިފްކޯގެ ފްލެޓު ނުދޭން އެ ކުންފުނިން ނިންމިއިރު، އެ ދެމީހުން ވެސް އޮތީ ސިފްކޯގެ ފްލެޓަށް ދައްކަންޖެހޭ ޑައުންޕޭމަންޓު ފައިސާ ދައްކައިފަ އެވެ.

އެގޮތުން, ސިފްކޯގެ ފްލެޓަށް ޑައުންޕޭމަންޓުގެ ގޮތުގައި މުއާޒު 95،000ރ. އަދި ނިޝާރު 91،200ރ. ދައްކާފައިވެ އެވެ.

އެހެންކަމުން އެ ދެ މީހުން ވެސް ސިފްކޯގެ ނިންމުމާ ދެކޮޅަށް ސިވިލް ކޯޓުގައި ދައުވާ ކުރީ ސިފްކޯއިން ކުރިން ނިންމި ގޮތަށް ސިފްކޯއިން އެ ދެމީހުންނަށް ލިބުނު ފްލެޓުތައް ހަވާލު ކުރުމަށް ސިފްކޯގެ މައްޗަށް އަމުރެއް ނެރެދިނުމަށެވެ.

ސިވިލް ކޯޓުގައި ކުރި ދައުވާގައި ބުނެފައިވަނީ ސިފްކޯ ފްލެޓަށް އެދުނުއިރު އަދި ފްލެޓް ލިބޭނެ ކަމަށް ލިޔުން ދޫކުރިއިރު ނެތް ޝަރުތެއް ކުރިމަތިކުރުވައި ފްލެޓް ނުލިބޭނެ ކަމަށް ނިންމި ނިންމުމަކީ ބާތިލްވާނެ ކަމަށެވެ. އެހެންވެ، ސިފްކޯ ފްލެޓްގެ ތަޅުދަނޑި ހަވާލުކޮށް އެއްބަސްވުން ހަދަން އަމުރުކުރަން އެދިފައިވެ އެވެ.

މި ދެ މީހުންނަށް ވެސް ސިފްކޯ ފްލެޓް ނުދޭން ނިންމީ އެ މީހުންގެ އަނބިންނަށް ލިބުނު ހިޔާ ފްލެޓަކީ، އެހެން ބޯހިޔާވަހިކަމެއް ލިބުން ކަމަށް ބަލައިފަ އެވެ.

މި ދައުވާއާ މެދު ގޮތް ނިންމައި ސިވިލް ކޯޓުން ހާމަކޮށްފައިވާ ނިންމުމުގައިވާ ގޮތުން ކޯޓުގައި މައްސަލަ ކުރިއަށް ދަނިކޮށް ސިފައިންގެ ކޯޕަރޭޓިވް (ސިފްކޯ) އިން ވަނީ އެ ދެ މީހުންނަށް ސިފްކޯ ފްލެޓް ދޭން ނިންމައިފަ އެވެ. އަދި މިހާރު ވަނީ ފްލެޓް ހަވާލުކޮށް އެއްބަސްވުމުގައި ސޮއި ވެސް ކޮށްފަ އެވެ.

ސިވިލް ކޯޓުން އިއްޔެ ކުރި ހުކުމުގައި ބުނެފައި ވަނީ ސިފްކޯއިން އެ ދެމީހުން ވެސް ހޯދަން އެދުނު ފްލެޓު ސުލްހަވެރިކަމާއެކު ހަވާލުކޮށްފައި ވާތީ، މައްސަލަ އަނބުރާ ގެންދިޔުމަށް ހުށަހެޅި ހުށަހެޅުމަށް ރިއާއަތްކޮށް ދައުވާ ފޯމުތައް ބާތިލު ކޮށްފައިވާ ކަމަށެވެ.

ސިފައިންގެ އޮފިސަރުންނަށް ޚާއްސަކޮށް ހުޅުމާލޭގައި ތަރައްގީކުރި ސިފްކޯ ހިޔާ ފުލެޓުތަކުގެ ތަޅުދަނޑި ސެޕްޓެމްބަރު 2023 ގައި ވަނީ ހަވާލުކުރަން ފަށައިފަ އެވެ. އެއަށް ފަހު މި ސަރުކާރު އައުމަށް ފަހު ސިފައިންނާއި ފުލުހުންގެ ފުލެޓުތަކުގެ ކުލި ދައްކަން ފަށަން ޖެހޭ ތާރީހު އެއް އަހަރަށް ސަރުކާރުން ވަނީ ފަސްކޮށްދީފަ އެވެ.

ސިފައިންނާއި، ފުލުހުންނަށް ހާއްސަ ހައުސިން މަޝްރޫއެއް ހިންގުމަށް ނިންމައި އެ ފްލެޓުތައް އިމާރާތް ކުރަން ފެށީ 2013 ވަނަ އަހަރު ނޫމަޑިއާ ހަވާލުކޮށްގެންނެވެ. ނަމަވެސް، އެ މަސައްކަތް ނުނިމި ދިގުލައިގެން ގޮސް 2016 ވަނަ އަހަރު އެ އެއްބަސްވުން ވަނީ އުވާލާފައެވެ.

ފަހުން، ސިފައިންގެ ފްލެޓުތައް ނިންމާފައިވަނީ ޗައިނާ ކުންފުންޏަކާ ހަވާލުކޮށްގެންނެވެ.

މި މަޝްރޫއުތަކުގެ ދަށުން އިމާރާތްކުރި ތިން ޓަވަރުގައި ޖުމުލަ 691 އެޕާޓްމެންޓު ހިމެނެއެވެ. އޭގެ ތެރެއިން ސިފައިންނަށް ހާއްސަކޮށްފައިވަނީ 330 ޔުނިޓެވެ. މި މަޝްރޫއުގައި މުޅިން ވެސް ހިމެނެނީ 1100 އަކަފޫޓުގެ ތިން ކޮޓަރީގެ އެޕާޓްމެންޓެވެ.