މީދޫ ކައުންސިލާއި، ޑަބްލިއުޑީސީގެ މެންބަރުންނާއި ރައީސް ބައްދަލުކުރައްވައިފި

އަހުމަދު ނިހާން

22 ޖެނުއަރީ 2025 - 18:42

0 comments

މީދޫ ކައުންސިލާއި، ޑަބްލިއުޑީސީގެ މެންބަރުންނާއި ރައީސް ބައްދަލުކުރެއްވުން

ރައީސް ޑރ މުހައްމަދު މުއިއްޒު، ރ. އަތޮޅަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން، އެއަތޮޅު މަޑުއްވަރިއަށް ވަޑައިގެން، ރ. މީދޫ ކައުންސިލާއި، އަންހެނުން ތަރައްގީއަށް މަސައްކަތްކުރާ (އ.ތ.މ) ކޮމިޓީއާ ބައްދަލުކުރައްވައި ރަށުގެ ތަރައްޤީއަށްޓަކައި ކުރަން ބޭނުންވާ ކަންކަމާ ގުޅޭގޮތުން މަޝްވަރާކުރައްވައިފި އެވެ.

މިއަދުގެ ބައްދަލުކުރެއްވުމުގައި ކައުންސިލްގެ ފަރާތުންވަނީ ރަށުގެ ރައްޔިތުންގެ ކަންބޮޑުވުންތައް ހިއްސާކުރައްވާފަ އެވެ. މިގޮތުން ރަށުގެ ބަނދަރު ތަރައްޤީކުރުމުގެ މަޝްރޫއު ފައްޓަވައިދެއްވުމަށާއި، ރަށުގެ ސިއްހީ މަރުކަޒުގެ ޖާގައިގެ ދަތިކަމާއި، ރަށަށް ދަނާލެއް ބޭނުންވާކަން ފާހަގަކުރެއްވި އެވެ. މީގެ އިތުރުން މީދޫގެ އިހުތިސާސްގެ ތެރެއަށް ރ. ތަވާތާ އިތުރުކޮށްދެއްވުމަށްވެސް ކައުންސިލުން ވަނީ އެދިޑައިގަންނަވާފަ އެވެ.

މި ބައްދަލުކުރެއްވުމުގައި ރައީސް ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވައި އެކަންކަމަށް އެދެވޭ ހައްލެއް ގެނައުމަށް މަސައްކަތް ކުރައްވާނެކަމަށެވެ.

ރައީސް ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގެ ފަހުގެ މަޢުލޫމާތުތައް ހިއްސާކުރައްވާފަ އެވެ.