ލޮސް އެންޖެލިސްގެ އަލިފާންގަނޑު އިތުރަށް ވަރުގަދަ ވަނީ

ހަސަން ހަލީމް

23 ޖެނުއަރީ 2025 - 13:49

0 comments

ލޮސް އެންޖަލިސްގައި ރޯވި އަލިފާން -- ފޮޓޯ: އޭއެފްޕީ

އަލިފާނުގެ ހާދިސާތަކުގައި މިހާރުވެސް ބޮޑެތި ގެއްލުންތަކެއް ވެފައިވާ އެމެރިކާގެ ލޮސް އެންޖެލިސްގެ އުތުރުގައި އަނެއްކާ ރޯވެ ހަލުވިކަމާ އެކު ފެތުރެން ފެށުމާ އެކު އެތައް ހާސް ބަޔަކު ގެތަކުން ނެރެފި އެވެ.

މިހާރު އަލިފާންގަނޑު ފެތުރެމުން ދަނީ ލޮން އެންޖެލިސްގެ އުތުރަށެވެ. އެގޮތުން ކެސްޓައިކް ލޭކް ކައިރީގައި ހުރި ފަރުބަދަތަކުގެ މަތިން ފެށުނު އަލިފާންގަނޑު ވަރަށް ބާރަށް ފެތުރެމުން ދިޔައިރު، މަދު ގަޑިއިރުތަކެއްގެ ތެރޭގައި 8،000 އޭކަރު (3،200 ހެކްޓަރު) އަށް ވުރެ ބޮޑު ސަރަހައްދަކަށް ވަނީ ފެތުރިފައެވެ.

އަލިފާނުގެ ސަބަބުން ލޮސް އެންޖެލިސްގެ އުތުރުން ގާތްގަނޑަކަށް 35 މޭލު (56 ކިލޯމީޓަރު) ދުރުގައި އޮންނަ އަދި ސެންޓާ ކްލެރިޓާ ސިޓީއާ ވެސް ކައިރި އޮންނަ ލޭކްގެ ވަށައިގެން އުޅޭ 31،000 މީހުން އެހެން ހިސާބުތަކަށް ގެންދަން މިހާރު ވަނީ އަންގާފައެވެ.

މިފަހަރު ރޯވެފައި މި ވަނީ ލޮސް އެންޖެލިސް ސަރަހައްދުގައި ފެތުރުނު ބޮޑު އަލިފާންގަނޑުގައި އެތައް ހާސް ގެއެއް އަނދައި 25 މީހަކު މަރުވެފައި ވަނިކޮށެވެ.

ލޮސް އެންޖެލިސްގެ އިރުމަތީގައި 14،021 އޭކަރު އަނދާފައިވާ އީޓަން އަލިފާން މިހާރު 91 ޕަސެންޓް ކޮންޓްރޯލްވެފައިވާއިރު، ލޮސް އެންޖެލިސްގެ ހުޅަނގު ފަރާތުގައި 23،448 އޭކަރު އަނދާފައިވާ ޕެލިސޭޑްސް އަލިފާންގަނޑު ގާތްގަނޑަކަށް 70 ޕަސެންޓް ކޮންޓްރޯލް ވެފައިވާ ކަމަށް ކެލް ފަޔާ އިން ހާމަކޮށްފައިވެއެވެ.

ލޮސް އެންޖެލިސް ކައުންޓީ ޝެރިފް ޑިޕާޓްމަންޓްގެ ރޮބަޓް ޖެންސަން ވަނީ "ހިއުސް ފަޔާ" ގެ ނަން ދީފައިވާ އަލިފާނުގެ އާ ހާދިސާ ހިނގި ސަރަހައްދުން ވަގުތުން ނުކުތުމަށް އެދިވަޑައިގެންފަ އެވެ. އޭނާ ވިދާޅުވީ މިފަދަ އެންގުންތަކަށް ތަބާ ނުވުމުގެ ދެރަ ނަތީޖާތައް ކުރިން ފެނިފައިވާ ކަމަށާއި އަލުން އެފަދަ ކަންކަން ތަކުރާރުވާން ނޭދޭ ކަމަށެވެ.