އެމެރިކާގެ ރަސްމީ ސިޔާސަތުގައި އޮންނާނީ ދެ ޖިންސު. އެއީ އަންހެނުންނާއި ފިރިހެނުން،: ޓްރަމްޕް

ހަސަން ހަލީމް

22 ޖެނުއަރީ 2025 - 18:50

0 comments

ޓްރަމްޕް އެމެރިކާގެ ރައީސްކަމާ ހަވާލުވެ ވަޑައިގަތުމަށް ފަހު ތަގުރީރުކުރައްވަނީ. -- ފޮޓޯ: އޭއެފްޕީ

އަންހެނުންނާއި ފިރިހެނުން ފިޔަވައި އިތުރު ޖިންސެއް އޮންނަ ކަމަށް ސަރުކާރުގެ ރަސްމީ ސިޔާސަތުން ބަލައިނުގަންނާނެ ކަމަށް މިއަދު އެމެރިކާގެ ރައީސްކަމާ ދެ ވަނަ ދައުރަކަށް ހަވާލުވެ ވަޑައިގަތް ޑޮނަލްޑް ޓްރަމްޕް އިއުލާނުކުރައްވައިފި އެވެ.

ޓްރަމްޕްގެ މިނިންމުގެ ސަބަބުން ފެމިނިޒަމްގެ ޝިކާރައަކަށް ވެފައިވާ މީހުންނާއި ޖިންސު ބަދަލުކޮށްގެން އުޅޭ މީހުން ނުވަތަ "ޓްރާންސް ޖެންޑާ" ގެ ޝިކާރައަކަށް ވެފައިވާ މީހުންނާ އަދި އެއްޖިންސުން ގުޅުންހިންގާ މީހުން ވަނީ ވަރަށް ރުޅިއައިސްފައެވެ.

"އާންމު ދިރިއުޅުމާއި އަމިއްލަ ދިރިއުޅުމުގެ ހުރިހާ ކަމެއްގައި ނަސްލާއި ޖިންސު އިޖުތިމާއީ ގޮތުން އުފައްދަން ސަރުކާރުން މަސައްކަތް ކުރުމުގެ ސިޔާސަތު ވެސް ނިމުމަކަށް ގެންނާނަން... މިއަދުން ފެށިގެން އެމެރިކާ ސަރުކާރުގެ ރަސްމީ ސިޔާސަތުގައި އޮންނާނީ ދެ ޖިންސު. އެއީ އަންހެނުންނާއި ފިރިހެނުން،" ޓްރަމްޕް ވިދާޅުވި އެވެ.

ޓްރާންސްޖެންޑާގެ ހައްގުތަކަކީ މިފަހަކަށް އައިސް އެމެރިކާގައި ސިޔާސީ ގޮތުން ބޮޑު މައުޟޫއަކަށް ވަނީ ވެފައެވެ. މިދިޔަ އިންތިޚާބުގެ ކެމްޕޭނުގައި ރިޕަބްލިކަން ޕާޓީގެ ގިނަ މެންބަރުން ވަނީ ކުޅިވަރުތަކުގައި ބައިވެރިވާ ޓްރާންސްޖެންޑާ "އަންހެނުންނަށް" ހާއްސަ ސަމާލުކަމެއްދޭ ގާނޫނުތައް ބަދަލުކުރުމަށް ވެސް ވަކާލާތުކޮށްފަ އެވެ.

އެމެރިކާގެ ރައީސްކަމުގެ ފުރަތަމަ ދައުރުގައި ޓްރަމްޕް ވަނީ އަސްކަރިއްޔާގައި ޓްރާންސްޖެންޑާ ސިފައިން އުޅުން މަނާކޮށް، ޓްރާންސްޖެންޑާ ސިފައިން ރެކްރޫޓްކުރުން ހުއްޓުވައިފަ އެވެ. ނަމަވެސް 2021 ވަނަ އަހަރު ޖޯ ބައިޑަން ވެރިކަމާ ހަވާލުވެވަޑައިގަތުމަށް ފަހު އެ ސިޔާސަތު ބަދަލުކުރެއްވި އެވެ.