އެމެރިކާގެ ގާނޫނު ހަދާ މަޖިލީހަށް ވަދެގަތް މީހުންނަށް ޓްރަމްޕް މައާފު ދީފި

ހަސަން ހަލީމް

21 ޖެނުއަރީ 2025 - 12:06

0 comments

ޓްރަމްޕުގެ ސަޕޯޓަރުން ޖެނުއަރީ 6 ވަނަ ދުވަހު ކެޕިޓަލް އަށް ވަދެ ހަމަނުޖެހުން ހިންގަނީ - އޭއެފްޕީ

އެމެރިކާގެ ގާނޫނު ހަދާ މަޖިލީސް ހިންގާ ކެޕިޓަލް އިމާރާތަށް 6 ޖެނުއަރީ 2021ގައި ވަދެގަނެ، ކުށް ސާބިތުވެފައިވާ 1500 ވަރަކަށް މީހަކަށް، ކެމްޕޭންގައި ވައުދުވި ގޮތަށް ވެރިކަމުގެ ފުރަތަމަ ދުވަހު އެމެރިކާގެ އާ ރައީސް ޑޮނަލްޑް ޓްރަމްޕް މައާފު ދެއްވައިފި އެވެ.

"އެއީ ރަހީނުކޮށްފައި ތިބި މީހުން،" އެމެރިކާގެ 47 ވަނަ ރައީސްގެ ހުވާ ކުރެއްވުމަށް ފަހު ޑޮނަލްޑް ޓަރަމްޕް ހޯމަ ދުވަހު ވިދާޅުވި އެވެ. އޭގެ ގާތްގަނޑަކަށް 1500 މީހުންނަށް ފުރިހަމަ އަފޫއާންމެއް ދިނެވެ. އޭގެ ތެރޭގައި ފުލުހުންނަށް ހަމަލާ ދިން މީހުންނާއި ކެޕިޓޯލްގެ މުދަލަށް ގެއްްލުން ދިން އެތައް ސަތޭކަ ބަޔަކު ވެސް ހިމެނެ އެވެ.

ގޭންގުތަކާއި ޓްރަމްޕުގެ ސަޕޯޓަރުން ގާނޫނު ހަދާ މަޖިލީހަށް ވަދެގަތީ، އެ މަނިކުފާނު ގެއްލުނު 2020 ގެ ރިޔާސީ އިންތިހާބުގެ ނަތީޖާ ތަސްދީގު ކުރަން ބޭއްވި ޖަލްސާއަށް ހުރަސް އެޅުމަށެވެ.

އެ ޖަލްސާ ހިނގަމުން ދަނިކޮށް 2000 އަށް ވުރެ ގިނަ މީހުން ކެޕިޓޯލް އަށް ވަދެގަތެވެ. އެކަން ހިނގީ، ކެޕިޓޯލްއާ މާ ދުރު ނޫން ހިސާބެއްގައި ޓްރަމްޕް ބޭއްވި އެއްވުމެއްގައި ކެޕިޓޯލް ވަންނަން ދިޔުމަށް އެމަނިކުފާނު ގޮވައިލެއްވުމުންނެވެ.

އެ ހަމަނުޖެހުމާ ގުޅިގެން ހައްޔަރު ކުރި މީހުންގެ ތެރެއިން 1،580 އަށް ވުރެ ގިނަ މީހުންގެ މައްޗަށް ދައުވާކޮށް، ގާތްގަނޑަކަށް 1،270 މީހުންގެ މައްޗަށް ކުށް ސާބިތުވެފައިވެ އެވެ. ކުށް ސާބިތުވި ބައެއް މީހުންނަށް އިއްވި ހުކުމުން ފުރިހަމަކޮށް މިނިވަން ވެސް ވެފައިވެ އެވެ.

މިހާރު ޖަލުގައި ތިބި މީހުންގެ އަދަދު ލުއިކޮށް ދިނުމާއެކު އެ މީހުން ޖަލުން މިނިވަން ވާނެ އެވެ.

"އެމީހުން މި މީހުންނާ ދޭތެރޭ ކަން ކުރީ ވަރަށް ދެރަކޮށް. އަޅުގަނޑުމެންގެ ގައުމުގެ ތާރީހުގައި ވެސް މިފަދަ ކަމެއް ހިނގާފައި ވަނީ ވަރަށް މަދުން،" ޓްރަމްޕް ވިދާޅުވި އެވެ.

ޓްރަމްޕް ވަނީ 6 ޖެނުއަރީ 2021ގައި ދިން ހަމަލާއާ ގުޅިގެން އުފެދިފައިވާ މައްސަލަތައް ބަލާ ފަނޑިޔާރުންނާއި ދައުވާ އުފުލި ޕްރޮސެކިއުޓަރުންނަކީ އަނިޔާވެރި ބައެއް ކަމަށް ވެސް ޓްރަމްޕް ވިދާޅުވި އެވެ.