މަޑުއްވަރީ އަށް އުފުލަންދޫ، މީދު އަށް ތާވަތާ ދެނީ

އަލީ ރާޒީ

22 ޖެނުއަރީ 2025 - 18:11

0 comments

ރ. މަޑުއްވަރީއާއި އެ އަތޮޅު އުފުލަންދޫ (ކ): މަޑުއްވަރީއަށް އުފުލަންދޫ ދޭން ވަނީ ނިންމަވާފައި --

ރ. އަތޮޅު މަޑުއްވަރީގެ އިހުތިސާސްގައި އެ އަތޮޅު އުފުލަންދޫ އަދި މީދޫގެ އިހުތިސާސްގައި ތާވަތާ ހިމެނުމަށް ރައީސް ޑރ. މުހައްމަދު މުއިއްޒު މިއަދު ނިންމަވައިފި އެވެ.

އެ މަނިކުފާނު ރ. އަތޮޅަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން މަޑުއްވަރީ ރައްޔިތުންނާ ބައްދަލުކުރައްވާ ވާހަކަދައްކަވަމުން އެ މަނިކުފާނު ވަނީ ކެމްޕޭންގައި ވައުދުވީ ހުރިހާ ކަމެއް ވައުދުވި ގޮތަށް ފުއްދަވައިދެއްވާނެކަމުގެ ޔަގީންކަން ދެއްވައިފައެވެ.

ރައީސް މުއިއްޒު ވިދާޅުވީ، މަޑުއްވަރީގެ ބިން ހިއްކުމުގެ މަސައްކަތް ވެސް އެ ގޮތުގެ މަތިން މި އަހަރު ފެއްޓޭނެ ކަމަށެވެ. އެ މަޝްރޫއުގެ ދަށުން ހައެއްކަ ހެކްޓަރުގެ ބިން ހިއްކޭނެ ކަމަށް އެ މަނިކުފާނު ވިދާޅުވިއެވެ.

އެކަމަކު، އެއީ މަޑުއްވަރީއަށް އެކަށިގެންވާ އަދަދެއް ނޫން ކަމަށް ރައީސް ގަބޫލުފުޅުކުރައްވައެވެ.

"ތިބޭފުޅުންނަށް ދަންނަވަން ބޭނުންވަނީ މި ހުރިހާ މައްސަލައެއް ހައްލުކުރެވޭ ގޮތަށް އުފުލަންދޫ މިރަށުގެ އިހުތިޞާސްގެ ތެރޭގައި ހިމަނައިދޭން ނިންމި ވާހަކަ. އެކަމާ ގުޅޭ ޤާނޫނީ ލިޔެކިޔުމުގެ ކަންތައްތައް ކުރިއަށް ގެންގޮސް އެކަން ހަމަޖެހިގެންދާނެ،" ރައީސް ވިދާޅުވި އެވެ.

މީގެއިތުރުން ރައީސް ވަނީ ރ. މީދުއަށް ވެސް ބިމުގެ ދަތިކަން ދިމާވާތީ، އިގުތިސާދީ ކަންކަން ކުރަން އެ ރަށުގެ އިހުތިސާސްގައި ތާވަތާ ހިމަނުއްވައިދެއްވާނެ ކަމަށްވެސް ވިދާޅުވެފަ އެވެ. މި ރަށުގެ ބޭނުން ހިފައިގެން މީދުގެ ތަރައްގީ އާއި އިގްތިސާދީ މަސައްކަތްތައް ކުރުމަށް ދުރު ރާސްތާއަށް ހަމަޖެއްސުމަށް ރައީސް އެދިވަޑައިގެންނެވި އެވެ.

ރައީސް ރަށްރަށަށް ކުރައްވާ ދަތުރުފުޅުގެ ތެރެއިން އަންނަނީ އެ ރަށްރަށަށް ވެވަޑައިގެންފައިވާ ވައުދުތައް ފުއްދަވާނެކަމުގެ ޔަގީންކަން އަރުވަމުންނެވެ. އެ މަނިކުފާނު ވަނީ މި އަހަރާއި އަންނަ އަހަރަކީ އަމަލީ ގޮތުން ވައުދުތައް ފުއްދަވައިދެއްވާނެ އަހަރުތަކެއް ކަމަށް ވިދާޅުވެފަ އެވެ.