މީހާގެ ކަމެއްނެތް ނަމަ، ސަރުކާރު ފަޅިން ހޮވުނަސް މޮޅެއް ނުފެނިދާނެ!

އަލީ އާމިރު

24 ފެބުރުއަރީ 2026 - 23:23

0 comments

ނިމުނު މަޖިލިސް އިންތިހާބު ދުވަސްވަރު ހޯރަފުށި ދާއިރާއިން އިވުނީ ސަރުކާރުން ދައްކާ މީހާއަށް ވޯޓު ދިނުމުން ދާއިރާ ތަރައްގީ ވާނެ ވާހަކަ އެވެ. ރަށަށް އުންމީދާއި ދިރުން ލިބޭނެ ވާހަކަ އެވެ. ސަރުކާރުން ދައްކާ މީހާ ހޮވުމުން ކަންކަންވާ ފަސޭހަ ވާނެ ވާހަކަ އެވެ. ރައްޔިތުންގެ އަޑު އިއްވަން ފަސޭހަ ވާނެ ވާހަކަ އެވެ.

މިވާހަކަ މިހެން ދެކެވުނު އެއް ސަބަބަކީ ހޯރަފުށި ދާއިރާއިން ކުރިން ދެއްކި ސިޔާސީ ހަގީގަތެވެ. ސަރުކާރުން ދެއްކި މީހުން ހޮވުމުން ހޯރަފުށި ދާއިރާ އަށް ކުރިން ވަނީ ލައްކަ ތަރައްގީއާއި ދިރުން ލިބިފަ އެވެ. އެގޮތުން މަޖިލިސް އިންތިހާބުތަކުގައި ސަރުކާރު ފަޅިން ދެއްކި ކެންޑިޓޭޑުން ކަމުގައިވާ އަހުމަދާއި މުހައްމަދާއި ސަލީމް ހޮވުމުން ހޯރަފުށި ދާއިރާ އަށް ސަރުކާރުން ދިން ސަމާލުކަން މިއަދު ހޯރަފުށިން އެހުރީ ފެންނާށެވެ.

މި ހަގީގަތުގެ މައްޗަށް ބަލައިގެން 20 ވަނަ މަޖިލީހަށް ވެސް ހޯރަފުށީ ދާއިރާ އަށް ރައްޔިތުން ވޯޓުދީ އިންތިހާބު ކުރީ "ސަރުކާރުން" ދެއްކި މީހާ އެވެ. ނަމަވެސް މިއަދު ހާލަތު ބަދަލު ވެއްޖެ އެވެ. ކުރިން ފެނުނު ސަރުކާރު މީހާގެ މޮޅެއް ދާއިރާއިން ނުފެނުނެވެ. ދާއިރާގެ އަޑު ކެޑިއްޖެ އެވެ.

ފާއިތުވި ސަރުކާރުތަކުން ހޯރަފުށީގެ ތަރައްގީއަށް ގިނަ މަޝްރޫއުތަކެއް ކުރިއަށް ގެންދިޔަ ނަމަވެސް ރައީސް މުއިއްޒުގެ ސަރުކާރާއިއެކު ހޯރަފުށީ ދާއިރާގެ ތަރައްގީގެ ދުވެލި މަޑުވެއްޖެ ކަމުގެ އަޑު ވަނީ ގަދަވެފަ އެވެ. މިއީ ސަރުކާރުގެ ސިޔާސީ ވަޒީފާއެއްގައި ހުރި "މަދު މީހަކު" ފިޔަވާ މުޅި ދާއިރާގެ ރައްޔިތުންގެ ދުލުން މިހާރު އިވޭ އަޑެވެ. ލިބޭ ޗުއްޓީއެއްގައި ވެސް ދާއިރާ އަށް އައުން މަދު މީހަކަށް ފަހަރުގައި ރައްޔިތުންގެ މި އަޑު ނުއިވި ދާނެ އެވެ.

ރައްޔިތުން މިއަދު ކުރާ ސުވާލަކީ ސަރުކާރު ފަޅިން ހޮވިގެން ތަރައްގީގެ އަޑު މަޑުވީ ކީއްވެ ހެއްޔެވެ..؟ ކުރިން ދާއިރާގެ ތަރައްގީގައި ސަރުކާރު އެމްޕީ ދެއްކި ހިއްވަރާ ފަންވަރު މި ހާރު ނުފެންނަނީ ކީއްވެ ހެއްޔެވެ؟ ސަރުކާރު ލެންސުން ހޯރަފުށި ދާއިރާގެ ތަރައްގީ "ކައްސާލީ" ކީއްވެ ހެއްޔެވެ.؟ މި ސުވާލުތަކުގެ އެއް ޖަވާބަކީ "ރައްޔިތުން ވޯޓު ދީ ހޮވާ މީހާގެ" ކަމެއްނެތް ނަމަ، ސަރުކާރު ފަޅިން ހޮވުނަސް އަދި މޮޅެއް ނުފެނިދާނެ އެވެ.

ދައުލަތުގެ ވެރިން ހަނދާންކުރަން ޖެހެ އެވެ؛ ގާނޫނުއަސާސީގައި ކަނޑައަޅާފައިވާ އިންތިހާބުތަކުގައި ރައްޔިތުން ލާ ވޯޓަކީ ސީދާ ރައްޔިތުން އިއްވާ ހުކުމެވެ. ރައްޔިތުން ވޯޓުލާންވީ ކުލައަކަށް ނޫނީ ފިކުރަކަށް ނޫނެވެ. ގާބިލްކަމަށް ގަބޫލު ކުރެވޭ މީހުންނަށެވެ. ތަރައްގީއާއި ވަޒީފާގެ ފުރުސަތުތައް ރައްޔިތުންނަށް ހޯދައިދޭނެ ބަޔަކަށެވެ. އެގޮތުން އަންނަ އެޕްރީލް މަހުގެ ހަތަރު ވަނަ ދުވަހު ހޯރަފުށީ ދާއިރާއިން ވެސް "ސިޔާސީންނަށް" ހުކުމް އިއްވާނެ އެވެ.

އަދި އެއް ވާހަކަ އެވެ.

ވޯޓުދޭން ޖެހޭނީ ވަކި ޕާޓީއަކަށް ނޫނެވެ. ގާބިލް، އިންތިހާބުކުރި މަގްސަދު ހަނދާން ނައްތާނުލާނެ ކަމުގެ ޔަގީންކަން އޮތް ކެންޑިޑޭޓަކަށެވެ. އެއީ ރައްޔިތުންގެ ކެންޑިޑޭޓެވެ. އެއީ ފަހަރެއްގައި ވެސް "ސަރުކާރު" ކެންޑިޑޭޓެއް ނޫނެވެ. ގޮތް ނިންމާނީ ދިވެހި ރައްޔިތުންނެވެ. އިންތިހާބުގެ މޫސުންތަކުގައި އޮއްސާލާ ސަރުކާރުގެ ވައުދުތަކަށް ރައްޔިތުން މިހާރު ފަރިތަ އެވެ. އޭރެއްގައި އޮންނަ ސަރުކާރަކަށް އިދިކޮޅުން އިލްޒާމް އަޅުވަނީ ކީއްވެކަން ވެސް އެނގެ އެވެ.