ރައީސް މުއިއްޒުގެ މަރުހަބާ އެމެރިކާގެ އާ ރައީސް ޓްރަމްޕަށް

މަރިޔަމް އަނާ

21 ޖެނުއަރީ 2025 - 10:01

0 comments

ދުނިޔޭގައި ސުލްހަ ގާއިމުކުރުމަށް ޓަކައި ރާއްޖެއިން އެމެރިކާއާ ގުޅިގެން މަސައްކަތް ކުރަން ތައްޔާރަށް އޮތް ކަމަށް، ރައީސް ޑރ. މުޙައްމަދު މުއިއްޒު ރޭ ވިދާޅުވެއްޖެ އެވެ.

މިދިޔަ ނޮވެމްބަރު މަހު ބޭއްވި ރިޔާސީ އިންތިހާބުގައި އޭރުގެ ނައިބު ރައީސް ކަމަލާ ހެރިސްއާ ވާދަކުރައްވައި، ކާމިޔާބު ހޯއްދެވި ޓްރަމްޕް ކުރިއަށް އޮތް ހަތަރު އަހަރުގެ ދައުރަށް ރައީސްކަމުގެ މަގާމުގެ ހުވާކުރެއްވުން އޮތީ މިރެ އެވެ.

ޓްރަޕް ހުވާކުރެއްވުމާ އެކު ރައީސް މުއިއްޒު ވަނީ މަރުހަބާ ވިދާޅުވެ އެކްސްގައި ޕޯސްޓެއް ކުރައްވައިފަ އެވެ.

އެ ޕޯސްޓްގައި ވިދާޅުވީ އެ މަނިކުފާނު ވެރިކަމާ ހަވާލުވެވަޑައިގަންނަވަނީ ދުނިޔޭގައި ވަރަށް ބޮޑަށް ނުތަނަވަސްކަން އުފެދިފައިވާ ދަނޑިވަޅެއްގައި ކަމަށެވެ. އެހެންވެ، މި ހާލަތާ ކުރިމަތިލެއްވުމަށް ރައީސްގެ ހިކުމަތާއި ހުޝިޔާރު ކަމަށް އެދިވަޑައިގަންނަވާ ކަމަށް ރައީސް މުއިއްޒު ވިދާޅުވިއެވެ.

މީގެ އިތުރުން ދެ ގައުމުން ވެސް ހާސިލުކުރަން ބޭނުންވާ ލަނޑުދަނޑިތައް ހާސިލުކުރުމަށް ޓަކައި، ރާއްޖެއިން އޮތީ އާ ސަރުކާރާއެކު މަސައްކަތް ކުރަން ތައްޔާރަށް ކަމަށް ރައީސް ވިދާޅުވިއެވެ. އޭގެ ތެރޭގައި ދުނިޔޭގެ ސުލްހައަށް ޓަކައި މަސައްކަތް ކުރުމާއި ދެ ގައުމުގެ ޒަމާންވީ ގުޅުން ވަރުގަދަ ކުރުން ހިމެނޭ ކަމަށް އެ މަނިކުފާނު ފާހަގަކުރެއްވި އެވެ.