އޭޑީކޭގެ ފުރަތަމަ އިންޓާންޝިޕް ދަރިވަރުންގެ ތަމްރީނުތައް ފަށައިފި

މަރިޔަމް އަނާ

22 ޖެނުއަރީ 2025 - 12:49

0 comments

އޭޑީކޭ ހޮސްޕިޓަލުން 20 ޑޮކްޓަރުންނާއެކު މެޑިކަލް އިންޓާންޝިޕް މިއަދު ފަށައިފި އެވެ.

މިކަން ހާމަކުރީ އޭޑީކޭ އިން މިއަދު ކުރި ސޯޝަލް މީޑިއާ ޕޯސްޓެއްގަ އެވެ. އެގޮތުން، މި ތަމްރީނުތަކުގައި 20 ދަރިވަރުން ބައިވެރިވެ އެވެ.

ތަފްސީލް - އޭޑީކޭ އިން ބުނީ ގައުމީ ޔުނިވަސިޓީން ކިޔަވާ ދަރިވަރުން ހަދަނީ މޯލްޑިވްސް މެޑިކަލް އެންޑް ޑެންޓަލް ކައުންސިލް (އެމްއެމްޑީސީ)ން ފާސްކޮށްފައިވާ އެއް އަހަރުގެ ޕްރޮގްރާމެއް ކަމަށެވެ.

އޭޑީކޭ އިން ބުނީ މެޑިކަލް ކައުންސިލުން ގަބޫލުކުރާ އެއް އަހަރުގެ އެ ޕްރޮގްރާމްގައި ސްޓްރަކްޗާޑް އެކަޑެމިކް ލެކްޗާ އާއި ވޯކްޝޮޕް އަދި ކްލިނިކަލް ބައިތައް ދަސްކޮށްދޭނެ ކަމަށެވެ.

"އަޅުގަނޑުމެންގެ އަމާޒަކީ ހުނަރުވެރި އަދި ގާބިލު ލައިސަންސް ލިބިފައިވާ ޑޮކްޓަރުން ތަމްރީނު ކުރުމަށް އެހީތެރިވުން،" އޭޑީކޭ އިން ބުންޏެވެ.

އޭޑީކޭގައި އިންޓާންޝިޕް ފުރިހަމަކުރަން ކޮންމެ ޑޮކްޓަރަކު މަހަކު 14،500ރ. ދައްކަންޖެހެ އެވެ. އެއީ އަހަރަކަށް ބަލާނަމަ 174،000ރ. އެވެ.

މޯލްޑިވްސް މެޑިކަލް ކައުންސިލްގެ ގަވާއިދު އޮންނަ ގޮތުން ޕްރެކްޓިސް ކުރުމަށް ޑޮކްޓަރުންނަށް ލައިސެންސް ދެވޭނީ 5-6 އަހަރުގެ ކިޔެވުމަށް ފަހު އެއް އަހަރުގެ އިންޓާންޝިޕެއް ފުރިހަމަ ކުރުމުންނެވެ.

އައިޖީއެމްއެޗްގައި އިންޓާންޝިޕް ޑިމާންޑު ބޮޑުވުމުން، އޭޑީކޭގައި އިންޓާންޝިޕް ޕްރޮގްރާމް ފަށައިދިނުމަށް އެދުނީ ހެލްތު މިނިސްޓްރީންނެވެ. އެހެންވެ، އެ ހޮސްޕިޓަލުން ވަނީ އިންޓާންޝިޕް ކުރިއަށް ގެންދަން ދާނެ ހަރަދުތަކުގެ ތަފްސީލުތައް މިނިސްޓްރީއަށް ފޮނުވައި، އަދި އެބައި ދައުލަތުން ދެއްކުމަށް އެދިފަ އެވެ. ނަމަވެސް، އެއަށް މިނިސްޓްރީން އަދި ޖަވާބެއް ނުދެ އެވެ.

ސަރުކާރުގެ މައި ހޮސްޕިޓަލުގައި އިންޓާންޝިޕް ހަދަން ފެށީ ޖެނުއަރީ، 2018 ގަ އެވެ. މިވަގުތު ވެސް އެ ހޮސްޕިޓަލުގައި 60 ޑޮކްޓަރުން އަންނަނީ އިންޓާންޝިޕް ހަދަމުންނެވެ.