އޭޑީކޭ އަށް ލިބެން ޖެހޭ ފައިސާގެ މައްސަލަ މަޖިލީހަށް

އައިމިނަތު ޝިޔާޒާ

08 ޖުލައި 2024 - 19:34

0 comments

އޭޑީކޭ ހޮސްޕިޓަލް އިން އާސަންދަ އާއި އެންސްޕާއަށް ފޮނުވާފައިވާ ބިލްތަކަށް 100 މިލިއަނަށް ވުރެ ގިނަ ރުފިޔާ ނުލިބި އެތައް ދުވަސްތަކެއް ވެފައި ވާތީ އެ ފައިސާ ހޯދުމުގައި ރައްޔިތުންގެ މަޖިލީހުގެ މާލިއްޔަތު ކޮމެޓީގެ އެހީތެރިކަމަށް އެ ހޮސްޕިޓަލުން އެދިއްޖެ އެވެ.

މިފައިސާ އަކީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަން ނިމުމާ ހިސާބަށް ސަރުކާރުން އޭޑީކޭ ހޮސްޕިޓަލަށް ދޭން ޖެހޭ، އެހެން ނަމަވެސް ނުދީ އޮތް 144 މިލިއަން ރުފިޔާ އެވެ.

މިއަދު ބޭއްވި މާލިއްޔަތު ކޮމިޓީގެ ޖަލްސާގައި ރިޔާސަތުން އާސަންދަ އާއި އެންސްޕާއަށް ފޮނުވާފައިވާ ބިލްތަކަށް ފައިސާ ނުލިބި ފުނި ޖެހިފައި ވާތީ އެ ހޮސްޕިޓަލުން އެދުނީ އެކަމުގައި މަޖިލީހުގެ މާލިއްޔަތު ކޮމިޓީން ހައްލެއް ހޯދައިދިނުމަށެވެ.

އޭޑީކޭގެ ފަރާތުން މިދިޔަ އަހަރުގެ ނޮވެމްބަރު 6 ވަނަ ދުވަހު މަޖިލީހުގެ މާލިއްޔަތު ކޮމިޓީއަށް ސިޓީއެއް ފޮނުވާފައި ވެ އެވެ. އެ ސިޓީގައި އެހޮސްޕިޓަލުން ކަންބޮޑުވުން ފާޅުކުރީ މިދިޔަ އަހަރުގެ އޮކްޓޫބަރު މަހުގެ ނިޔަލަށް ސަރުކާރުން އޭޑީކޭ ހޮސްޕިޓަލަށް ދައްކަން ޖެހޭ 144،376،112ރ. ތެރެއިން ފައިސާ ނުދައްކާތާ 90 އަށް ވުރެ ގިނަ ދުވަސްވެފައިވާ 78،555،528ރ. ހޯދަން މަޖިލީހަށް ވެވެން އޮތް އެހީތެރިކަމެއް ދިނުމަށް އެ ހޮސްޕިޓަލުން ކޮމެޓީގައި އެދިފައިވެ އެވެ.

ކޮމިޓީން ފާސްކޮށްފައި ވަނީ މިހާރު ނުލިބިވާ ފައިސާގެ އަދަދާއި މިހާރުގެ ހާލަތު ސާފުކުރަން އޭޑީކޭއަށް ސިޓީއެއް ފޮނުވައިގެން ސާފުކުރުމަށެވެ. މީގެ އިތުރަށް އޭޑީކޭގެ ޖަވާބުލިބުމުން މާލީ ވުޒާރާ އާއި އާސަންދަ އަދި އެންސްޕާއިން މައުލޫމާތު ސާފުކުރުމަށް ވެސް ކޮމިޓީން މިއަދު ނިންމި އެވެ.

އެކަމާ ގުޅިގެން މިއަދުގެ ކޮމިޓީގައި ހިޔާލު ފާޅުކުރެއްވި ބައެއް މެންބަރުން ވަނީ ކުރީގެ ސަރުކާރުގައި ކުންފުނިތަކުން ހިދުމަތް ހޯދުމަށް ފަހު ފައިސާ ނުދެއްކުމަކީ އާދައަކަށް ހަދާފައި ވާތީ އެކަމާ ކަންބޮޑުވުން ފާޅުކުރައްވައިފަ އެވެ.