ޓޫރިޒަމް ވިޔަފާރިތަކަށް ޑޮލަރު މާރުކުރަން ލުއެއް

އަލީ ރާޒީ

28 ޖެނުއަރީ 2025 - 12:06

0 comments

ބޭންކް އޮފް މޯލްޑިވްސް (ބީއެމްއެލް)އިން އިންޓަނެޓް ބޭންކިން މެދުވެރިކޮށް ރިސޯޓު، ހޮޓެލް، ގެސްޓްހައުސް އަދި ފަތުރުވެރިކަމުގެ ދާއިރާއާ ގުޅުންހުރި އެހެނިހެން ވިޔަފާރިތަކުން ބޭރުފައިސާ މާރުކުރުމަށް އެކުލަވާލައިފައިވާ ގާނޫނާއި ގަވައިދާ އެއްގޮތަށް ބޭރު ފައިސާ މާރުކުރެވޭ ޕްލެޓްފޯމެއް ތައާރަފްކޮށްފިއެވެ.

ގައުމީ ބޭންކުން ބުނީ ރިސޯޓްތަކާއި ގެސްޓްހައުސްތަކާއި އެ ނޫން ވެސް ޓޫރިޒަމާ ގުޅުން ހުރި ފަރާތްތަކަށް މި ހިދުމަތް މިހާރު ލިބޭނެ ކަމަށެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލައި މިހާރު އަމަލު ކުރަމުން އަންނަ ބޭރު ފައިސާއާ ބެހޭ ގާނޫނުގައި ވަނީ ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުގެ ގޮތުގައި މީރާގައި ރަޖިސްޓަރީކޮށްފައިވާ ފަރާތްތައް ދެ ކެޓަގަރީއަށް ބަހައިފަ އެވެ.

ކެޓަގަރީ "އޭ" ގައި ހިމެނެނީ ރިސޯޓުތަކާއި އިންޓަގްރޭޓަޑް ޓޫރިސްޓް ރިސޯޓުތަކާއި ޕްރައިވެޓް އައިލަންޑްތަކާއި ރިޒޯޓް ހޮޓާތަކާއި އެނޫންވެސް އެފަދަ ތަންތަނެވެ. އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން ރާއްޖޭގެ ބޭންކަކަށް ޑޮލަރު މާރުކުރަން ލާޒިމުވެ އެވެ.

ކެޓަގަރީ "ބީ" ގައި ހިމެނޭ ގެސްޓް ހައުސްތަކުން ނުވަތަ ޓޫރިސްޓް އުޅަނދުތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

ބީއެމްއެލްއިން ބުނީ އެކަމަށް ހާއްސަ އޮންލައިން ޕްލެޓްފޯމެއް ގާއިމްކުރީ ބޭރު ފައިސާއާބެހޭ ގާނޫނާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާފައިވާ އުސޫލުތަކާ އެއްގޮތަށް، ފަތުރުވެރިކަމުގެ ދާއިރާގެ ވިޔަފާރިތަކަށް ފަސޭހަކަމާ އެކު ބޭރު ފައިސާ މާރުކުރެވޭނެ މަގުފަހިކޮށް ދިނުމަށް ކަމަށެވެ.

އެ ޕްލެޓްފޯމް މެދުވެރިކޮށް، ވިޔަފާރިތަކަށް ބޭރު ފައިސާ މާރު ކުރުމުގެ ހުރިހާ މުއާމަލާތެއް ފަސޭހަކަމާއެކު ޓްރެކްކޮށް، ރިވިއު ކުރުމަށް އެކްޓިވިޓީ ރިޕޯޓުން ފެންނާނެ އެވެ. އަދި އެ ޕްލެޓްފޯމް މެދުވެރިކޮށް ބޭންކުން ޑޮލަރު ގަންނާނީ 15.42 ރުފިޔާ އަށެވެ. އެއީ ބޭންކުން ޑޮލަރު ވިއްކާ އަގެވެ.

ޓޫރިޒަމްގެ ދާއިރާގެ ވިޔަފާރިތަކުން ރާއްޖެ އަށް ވަންނަ ޑޮލަރު ރާއްޖޭގެ ބޭންކުތައް މެދުވެރިކޮށް މާރުކުރަން ލާޒިމްވާ ގޮތަށް އެކުލަވާލި ބޭރު ފައިސާއާ ބެހޭ ބިލް ރައީސް ޑރ. މުހައްމަދު މުއިއްޒު ތަސްދީގު ކުރެއްވީ މިދިޔަ މަހު އެވެ. މިއީ ރާއްޖޭގައި ޑޮލަރުގެ ދަތި ކަމަށް ހައްލެއް ހޯދުމުގެ ގޮތުން ފާސްކުރި ގާނޫނެކެވެ.