ޒަކާތު ހައުސްގެ 10 ބުރީގެ އިމާރާތެއް އަޅައި އެތަނުގެ މަންފާ ޒަކާތުގެ ހައްގުވެރިންނަށް ދެނީ

އިސްމާއިލް ރިޒާ

30 ޖެނުއަރީ 2025 - 11:06

0 comments

ރާއްޖޭގެ ޒަކާތު ހައުސްގެ ބިލްޑިން ނުވަތަ ބައިތުއްޒަކާތުގެ ނަމުގައި ހުޅުމާލޭގައި 10 ބުރީގެ އިމާރާތެއް އެޅުމުގެ މަސައްކަތް ކުރަމުން އަންނަ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މީޑިއާތަކާ ހިއްސާކުރި މެސެޖެއްގައި ޒަކާތު ހައުސަށް އިމާރާތެއް އެޅުމުގެ މަސައްކަތް ކުރަމުން އަންނަކަން އިއުލާނުކުރައްވައި މިނިސްޓަރު ޝަހީމް ވިދާޅުވީ، މިއަހަރުތެރޭ މި އިމާރާތުގެ މަސައްކަތް ފެށޭނެ ކަމަށް އުންމީދުކުރާ ކަމަށެވެ.

އެގޮތުން، މި އިމާރާތަކީ ޒަކާތު އިދާރާގެ އިތުރަށް އޮފީސް ބައިތަކަށް ކުއްޔަށް ދެވޭ ޒަކާތު ފަންޑުގެ 10 ފަންގިފިލާގެ ފުރަތަމަ އިންވެސްޓުމަންޓު ކަމަށް މިނިސްޓަރު ވަނީ ވިދާޅުވެފައެވެ،

ކުއްޔަށް ދޭ އޮފީސް ބައިތަކުން ލިބޭ ނަފާ ބެހޭނީ ޒަކާތުގެ ހައްގުވެރިންނަށް ކަން މިނިސްޓަރު ވަނީ ފާހަގަކުރައްވާފަ އެވެ.

މިނިސްޓަރު ވިދާޅުވީ މިިދިޔަ އަހަރަކީ ރާއްޖޭގެ ތާރީހުގައި ވެސް އެންމެ ގިނަ އަދަދަކަށް މުދަލު ޒަކާތް ލިބުނު އަހަރު ކަމަށެވެ. ޒަކާތު ފަންޑަށް 101 މިލިއަނަށް ވުރެ ގިނަ ފައިސާ ލިބުނު ކަމަށް މިނިސްޓަރު ވިދާޅުވި އެވެ.

ޒަކާތުގެ ކަންކަން ކުރިން އިންތިޒާމު ކުރަމުންދިޔައީ އިސްލާމިކް މިނިސްޓްރީގެ ހާއްސަ ޑިޕާޓްމަންޓެއްގެ ދަށުންނެވެ. ޒަކާތު ހައުސްއާ އެކު އެ ޑިޕާޓްމަންޓް ވަކި އިދާރާއެއްގެ ގޮތުގައި އަންނަނީ ހިންގަމުންނެވެ.

ޒަކާތު ހައުސްގެ މަސައްކަތްތަކުގެ ތެރޭގައި ރާއްޖޭގެ ޒަކާތު ފަންޑުގެ މަންފާ ދެމެހެއްޓެނިވި ގޮތެއްގައި ލިބިދިނުމަށްޓަކައި އެ ފަންޑު ތަރައްގީކޮށް ކުރިއެރުވުމާއި ޒަކާތު ފަންޑުން އިންވެސްޓްކުރުމުގެ އަސާސީ މިންގަނޑުތައް ކަނޑައަޅައި އާންމުކުރަން ޖެހެ އެވެ.