ބަލިމީހެއްގެ ޒާތީ މައުލޫމާތު ލީކުވި މައްސަލައެއް މިނިސްޓްރީން ބަލަނީ

އަލީ ރާޒީ

05 ފެބުރުއަރީ 2025 - 13:33

0 comments

ހެލްތު މިނިސްޓްރީ - ފޮޓޯ: މިހާރު

ރާއްޖޭގެ ހޮސްޕިޓަލަކުން ބަލިމީހެއްގެ އެކްސް-ރޭ ލީކްކޮށްލި ކަމަށް ބުނާ މައްސަލައެއް ފެންމަތިވެ، އެކަން ބަލަމުންދާ ކަމަށް ހެލްތު މިނިސްޓްރީން މިއަދު ބުނެފި އެވެ.

މިއީ އިއްޔެ ސޯޝަލް މީޑިއާގައި ދައުރު ވެފައިވާ އެކްސް ރޭ އަކާ ގުޅޭ މައްސަލައެކެވެ. އެކްސް-ރޭގެ ފޮޓޯ ސޯޝަލް މީޑިއާގައި ވައިރަލްވެ، އެކަން އާންމުންގެ ސަމާލުކަމަށް ވަނީ އައިސްފައެވެ.

ހެލްތު މިނިސްޓްރީގެ އޮފިޝަލަކު ވިދާޅުވީ ހޮސްޕިޓަލަށް އަމާޒުވާ އެ ތުހުމަތު މިނިސްޓްރީން ބަލަމުންދާ ކަމަށެވެ. ނަމަވެސް މި ތުހުމަތު އަމާޒުވަނީ ކޮން ހޮސްޕިޓަލަކަށް ކަމެއް މިނިސްޓްރީން ނުބުނެ އެވެ.

ދައުރުވަމުންދާ ފޮޓޯއިން ފެންނަ އެކްސް-ރޭއަކީ ފޭކެއް ކަމެއް ނުވަތަ އަސްލެއް ކަމެއް ވެސް އަދި ކަށަވަރެއް ނޫނެވެ. އޮފިޝަލް ވިދާޅުވި ގޮތުގައި، އެކަން ވެސް މިނިސްޓްރީން ބަލާނެ އެވެ.