ރިސޯޓު މުވައްޒަފުންނަށް ތުނބުޅިމަތިމަސް ބެހެއްޓޭ ގޮތް ހަދަނީ

އައިމިނަތު ޝިޔާޒާ

10 ފެބުރުއަރީ 2025 - 15:28

0 comments

ފަތުރުވެރިކަމުގެ ހިދުމަތް ދޭ ރިސޯޓު އަދި ހޯޓާ ފަދަ ތަންތަނުގެ މުވަޒަފުން ތުނބުޅި މަތިމަސް ބެެހެއްޓޭ ގޮތަށް ހެދުމަށް ގޮވާލައި އިދިކޮޅު އެމްޑީޕީގެ ފަރާތުން މަޖިލީހަށް ހުށަހެޅި ގަރާރު މިއަދު މަޖިލީހުން ބަލައިިގެންފި އެވެ.

ފަތުރުވެރިކަމުގެ ހިދުމަތް ދޭ ތަންތަނުގެ މުވައްޒަފުން ތަބާވާން ޖެހޭ ޑްރެސްކޯޑުތައް އެކުލަވާލާފައިވާ ގޮތުގެ ސަބަބުން އެ މުވައްޒަފުން މަސައްކަތުގެ މާހައުލުމުގައި ބުރުގާ އެޅުމަށާއި ތުނބުޅި މަތިމަސް ބެހެއްޓުމަށް ހުރަސްތަކެއް ހުރި ކަމަށް ބުނެ، އެކަމާ ގުޅޭ ގޮތުން ކަންބޮޑުވުން ފާޅުކުރައްވައި މަޖިލިހަށް ގަރާރެއް ހުށަހެޅުއްވީ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރެވެ.

މެންބަރު މައުރޫފް ވިދާޅުވީ ރާއްޖޭގައި ހިންގާ ޓޫރިސްޓު ރިސޯޓުތަކާއި ހޮޓާތަކާއި އެ ނޫން ވެސް ފަތުރުވެރިކަމުގެ ވިޔަފާރި ކުރާ ތަންތަނުގައި މަސައްކަތްކުރާ މުވައްޒަފުން ތަބާވާންޖެހޭ ޑްރެސްކޯޑުތައް ހުރި ގޮތުން، އެ ތަންތަނުގައި އުޅޭ މުވައްޒަފުންނަށް ބުރުގާ އެޅުމާއި، ތުނބުޅި މަތިމަސް ބެހެއްޓުންފަދަ ކަންކަމަށް ހުރަސްތަކެއް ހުރި ކަމަށް ފާހަގަވާކަމަށެވެ.

އަދި ފަތުރުވެރިކަމުގެ ވިޔަފާރިކުރާ ތަންތަނުގައި މަސައްކަތްކުރާ މުވައްޒަފުން ތަބާވާންޖެހޭ ގްރޫމިން، އަދި ހެދުން އެޅުމުގައި އަމަލުކުރަންޖެހޭ ގޮތުގެ އުސޫލެއް ނުވަތަ އާންމު މިންގަނޑެއް މިހާތަނަށް ވެސް އެކުލަވައިލެވިފައި ނުވާތީ އެ ގަރާރު ހުށަހަޅުއްވަނީ އެ ކަން ކުރުމަށް ސަރުކާރުގެ ކަމާ ބެހޭ އިދާރާތަކަށް ގޮވައިލުމަށް ކަމަށް ވިދާޅުވިއެވެ.

އެ ގަރާރުގައިވަނީ އިސްލާމީ ޝަރީއަތުގައި ނުވަތަ ގާނޫނުގައި ކަނޑައެޅިގެން މަނާ ކަމަށް ކަނޑައަޅައިފައިނުވާ ކޮންމެ ކަމެއް ކުރުމުގެ މިނިވަންކަން ދިވެހި ކޮންމެ ރައްޔިތަކަށް ވެސް ގާނޫނު އަސާސީން ލިބިދީފައިވާ ކަމަށެވެ. އަދި އެ މީހަކު ބޭނުން ވަޒީފާއެއް އިޚްތިޔާރުކުުރުމުގެ މިނިވަންކަން ވެސް ކޮންމެ ރައްޔިތަކަށް ލިބިފައިވާ ކަމަށެވެ.

އެއާއެކު ބުރުގާ އެޅުމާއި ތުނބުޅި މަތިމަސް ބެހެއްޓުމަކީ އިސްލާމްދީނުގެ އެއްވެސް އަސްލަކާ ޚިލާފު ކަމަކަށް ނުވާއިރު އަދި ރާއްޖޭގެ އެއްވެސް ގާނޫނަކުން ވެސް މަނާކަމަކަށް ނުވާއިރު ވެސް ފަތުރުވެރިކަމުގެ ޚިދުމަތްދޭ ބައެއް ތަންތަނުގައި ހެދުން އެޅުމުގެ މިންގަނޑުތައް އެކުލަވައިލެވިފައިވާ ގޮތުން ހުރަސްތައް ކުރިމަތިވާ ކަމަށެވެ. އެގޮތުން މަސައްކަތު މާހައުލުގައި އަންހެނުންނަށް ބުރުގާ އެޅުމަށާއި، ފިރިހެން މުވައްޒަފުންނަށް ތުނބުޅި މަތިމަސް ރަނގަޅު މިންވަރަކަށް ބެހެއްޓުމަށް ހުރަސްތަކެއް ހުރި ކަމަށް އޭނާގެ ގަރާރުގައިވެއެވެ.

އެހެންވެ، އެއީ ފަތުރުވެރިކަމުގެ ދާއިރާގައި މަސައްކަތްކުރަން ބޭނުންވާ މީހުންގެ ތެރެއިން ބުރުގާ އަޅައިގެން ނުވަތަ، ތުނބުޅި މަތިމަސް ބަހައްޓަން ބޭނުންވާ މީހުންގެ މަސައްކަތްކުރުމުގެ ހައްގަށް ހުރަސް އެޅޭ ކަމެއްކަމަށް ފެންނަކަމަށް ގަރާރުގައިވެއެވެ.

އެއާއެކު އެ ފަދަ ތަންތަނުގައި މަސައްކަތްކުރާ މީހުންނަށް ހުރި ހުރަސްތައް ނައްތައިލައި، ޑްރެސްކޯޑާއި ގްރޫމިން މިންގަނޑުތައް އެއްހަމަ ގޮތެއްގައި އެކުލަވައިލުމަށް ވަނީ ސަރުކާރަށް ގޮވައިލައްވައިފައެވެ.

މި ބިލަށް ބަހުސްކުރައްވަމުން މައުރޫފް ވިދާޅުވީ ޓޫރިޒަމް އެމްޕްލޯއީޒް އެސޯސިއޭޝަން އޮފް މޯލްޑިވްސް (ޓީމް)ގެ ފަރާތުން އެ ސިނާއަތުގައި މަސައްކަތްކުރާ 11،000 އަށްވުރެ ގިނަ މަސައްކަތްތެރިންނާ ސުވާލުކުރުމުން 93 ޕަސެންޓު މީހުން ރަނގަޅު މިންވަރަަކަށް ތުނބުޅި ބަހައްޓައިގެން މަސައްކަތް ކުރުމުގެ ފުރުސަތެއް ލިބުން އެދޭކަމަށް ބުނި ކަމަށެެވެ.

"ޖުމްލަ ގޮތެއްގައި ހުރިހާ ރިސޯޓެއްގައި މަސައްކަތް ކުރާ މުވައްޒަފުންވެސް ބޭނުންވޭ ކޮންމެވެސް ވަރެއްގެ ޑީސެންޓްކޮށް އަދި މިއަދު މި ތަހުޒީބީ ޒަމާނުގައި މަޖުބޫރުން އޮބަހައްޓައިގެން މުވައްޒަފުން ލައްވައި ތުނބުޅި ބާލާއިގެން ރިސޯޓުތަކުގައި މަސައްކަތް ކުރުމަކީ އަޅުގަނޑަށް ގަބޫލުކުރެވޭ ކަމަކަށްނުވޭ،" ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވިއެވެ.

މި ގަރާރަށް ވާހަކަ ދެއްކެވި ސަރުކާރަށް ނިސްބަތްވާ ޕީއެންސީގެ ގިނަ މެންބަރުން ވެސް ވަނީ މި ގަރާރަށް ތާއީދުކުރައްވައި ވާހަކަ ދައްކަވާފަ އެވެ.

ގިނަ ރިސޯޓުތަކުގައި މިހާރު ވެސް ތުނބުޅި މަތިމަސް ބެހެއްޓުމަށް ފުރުސަތު ދެެއެވެ. ނަމަވެސް އެ މިންގަނޑު ރަސްމީކޮށް ބަޔާންކުރާ ގައިޑްލައިނެއް އަދި ނޯވެއެވެ.