ވޭޕު އަތުލުމުގެ ބާރު ފުލުހުންނަށް ދީފި

އައިމިނަތު ޝިޔާޒާ

12 ފެބުރުއަރީ 2025 - 15:57

0 comments

ދުންފަތް ކޮންޓްރޯލް ކުރުމާބެހޭ ގާނޫނުގެ ދަށުން މަނާކޮށްފައިވާ ވޭޕްގެ އާލަތްތައް އަތުލައި، ނައްތާލުމުގެ ބާރު ފުލުހުންނަށް ލިބޭ ގޮތަށް ދުންފަތް ކޮންޓްރޯލް ކުރުމާބެހޭ އާންމު ގަވާއިދު މިއަދު އާންމުކޮށްފި އެވެ.

ހެލްތު މިނިސްޓްރީން މިއަދު ގެޒެޓުކުރި ގަވާއިދުގައި ވާގޮތުން އެއްވެސް ތަނެއްގައި ވޭޕެއް، އިލެކްޓްރިކް ސިނގިރޭޓެއް ނުވަތަ ވޭޕް ކުރަން ބޭނުންކުރާ އެއްވެސް އާލާތެއް ގެންގުޅުމަކީ މަނާ ކަމެކެވެ. އަދި އެފަދަ އެއްޗެއް ގެންގުޅޭ ތަން ފެނިއްޖެ ނަމަ، ބޭނުން ނުކުރި ނަމަވެސް، އެ މީހަކު 2000ރ. އިން ޖޫރިމަނާ ކުރެވޭނެ އެވެ. އަދި އެ އެއްޗެއް އަތުލުމުގެ ބާރު ވެސް ތަންފީޒީ އިދާރާތަކަށް އެ ގަވާއިދުގެ ދަށުން ވަނީ ދީފަ އެވެ.

އެ ގަވާއިދުގައިވާ ގޮތުން، އެފަދަ އެއްޗެއް އަތުލުމަށް ފުލުހުން އުޅުމުން، އެކަމަށް ދެކޮޅު ހަދައިފި ނަމަ އެއީ ވަކި ފަރުދެއް ނަމަ، އެމީހަކު 50،000ރ. އިން ޖޫރިމަނާ ކުރެވޭނެ އެވެ. އަދި އެކަމަށް އިންކާރު ކުރީ ވިޔަފާރި ޝަހުސިއްޔަތަކުން ނަމަ އެ ވިޔަފާރިއެއް 100،000ރ. އިން ޖޫރިމަނާ ކުރެވޭނެ ކަމަށް އެ ގަވާއިދުގައި ބަޔާން ކޮށްފައިވެ އެވެ.

މިއަދު އާންމުކުރި ގަވާއިދުގެ ދަށުން ކުރާ ޖޫރިމަނާ ސަރުކާރު ބަންދު ދުވަސްތައް ނުހިމަނައި، 14 ދުވަހުގެ ތެރޭގައި މީރާއަށް ދައްކަންޖެހޭ ކަމަށް ބަޔާން ކޮށްފައިވެ އެވެ. އެ މުއްދަތުގައި ޖޫރިމަނާ ފައިސާ ނުދައްކާ ވިޔަފާރިތަކުގެ ދުންފަތް ވިއްކުމުގެ ހުއްދަ ހިފެހެއްޓޭނެ ކަމަށް ގަވާއިދުގައި ލިޔެފައިވެ އެވެ.

ވޭޕް ބޭނުންކޮށްގެން މިހާތަނަށް 29 މީހުން ޖޫރިމަނާ ކޮށްފައިވާ ކަމަށް ފުލުހުން ވަނީ ބުނެފަ އެވެ.