ފެނަކައިން ހިންގަމުންދިޔަ 14 އައިސް ޕްލާންޓް އަލުން މިފްކޯއާ ހަވާލުކޮށްފި

އައިމިނަތު ޝިޔާޒާ

15 ފެބުރުއަރީ 2025 - 17:55

0 comments

ފެނަކައިން ރާއްޖޭގެ އެކި ހިސާބުތަކުގައި ހިންގަމުންދިޔަ އައިސް ޕްލާންޓުތަކެއް ހިންގުން، ގައުމީ މަސް ކުންފުނި، މިފްކޯއާ މިއަދު ހަވާލުކޮށްފި އެވެ.

އައިސްޕްލާންޓްތައް މިފްކޯއާ ހަވާލުކުރުމަށް ބޭއްވި ރަސްމިއްޔާތުގައި އެ އެއްބަސްވުމުގައި ފެނަކައިގެ ފަރާތުން ސޮއިކުރެއްވީ މެނޭޖިން ޑައިރެކްޓަރު މުޙައްމަދު ނަޖާހެވެ. އަދި މިފްކޯގެ ފަރާތުން ސޮއި ކުރެއްވީ ސީއީއޯ ޑރ. ވިޓާލީ ލްޔުބިމޯވް އެވެ.

މިފްކޯއިން މީޑިއާތަކާ ހިއްސާކުރި މައުލޫމާތުގައިވާ ގޮތުން، އެ ކުންފުނިން މިހާރު ވަނީ ރަސްމީކޮށް އެ 14 އައިސްޕްލާންޓާ ހަވާލުވެފައެވެ. އަދި މިހާރު މިފްކޯގެ ފަންނީ އަދި އިންޖިނިއަރިން ޓީމުތަކުން އަންނަނީ އެ އައިސްޕްލާންޓްތަކުގެ ޚިދުމަތްތައް އަލުން ފެށުމުގެ މަސައްކަތްތައް ކުރަމުން ކަމަށް އެ ކުންފުނިން ބުންޏެވެ.

މިފްކޯއަށް ބަދަލުކުރި އައިސްޕްލާންޓްތައް:

– ހއ. އިހަވަންދޫ
– ނ. ޅޮހި
– ރ. އަލިފުށި
– ބ. ތުޅާދޫ
– ފ. ފީއަލި
– ފ. ނިލަންދޫ
– ތ. ހިރިލަންދޫ
– ގއ. ދާންދޫ
– ގއ. ދެއްވަދޫ
– ގއ. ގެމަނަފުށި
– ގއ. ކޮލަމާފުށި
– ގދ. ފަރެސްމާތޮޑާ
– ގދ. ފިޔޯރީ
– ސ. ހިތަދޫ

ރައްޔިތުންގެ މަޖިލީހުގައި ދާދިފަހުން ވާހަކަ ދައްކަމުން ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ ފެނަކައާ އައިސް ޕްލާންޓުތައް ހިންގަން ހަވާލު ކުރިއިރު، އައިސްޕްލާންތައް ހިންގުމުގެ ގާބިލްކަން އެ ކުންފުނީގައި ނެތް ކަމަށެވެ. މި ސަރުކާރުން ވެރިކަމާ ހަވާލުވިއިރު ބައެއް އައިސްޕްލާންޓައް ހުރީ ބޭނުން ނުކުރެވޭ ހާލަތުގައި ކަމަށާއި ނަމަވެސް މިހާރު ގިނަ އައިސްޕްލާންޓްތަކެއް އޮޕަރޭޝަނަށް ގެނެވިފައިވާ ކަމަށްވެސް ޝިޔާމް ވިދާޅުވި އެވެ.

ފެނަކައަށް ގެއްލުން ވާތީ އައިސްޕްލާންޓްތައް ހިންގުން އެ ކުންފުނިން ހުއްޓާލީ މިދިޔަ އަހަރު ތެރޭގަ އެވެ.