އެއް ބިލިއަން ރުފިޔާގެ މަޝްރޫއުއެއްގެ ތެރެއިން މިފްކޯއިން އިހަވަންދޫގައި ބޮޑު މަޝްރޫއެއް ފަށަނީ..!

މަރިޔަމް އަނާ

16 މާޗް 2025 - 13:54

0 comments

ހއ. އަށް މިފަހުން ކުރެއްވި ދަތުރުފުޅުގައި ރައީސް ޑރ. މުހައްމަދު މުއިއްޒު

އިސްލާމިކް ޑިވެލޮޕްމެންޓް ފަންޑު މެދުވެރިކޮށް ލިބުނު 65 މިލިއަން ޑޮލަރު (އެއް ބިލިއަން ރުފިޔާ) ގެ އެހީގައި މަޝްރޫއުއެއް ހިންގުމަށް މިފްކޯއިން އިއުލާނުކޮށްފި އެވެ.

މިފްކޯއިން މިއަދު ނެރުނު ބަޔާނެއްގައި ބުނީ، ސަރުކާރުގެ އެހީއާ އެކު 64.65 މިލިއަން ޑޮލަރުގެ ފައިނޭންސިން ހޯދަން އިސްލާމިކް ޑިވޮލޮޕްމަންޓް ބޭންކަށް ހުށަހަޅާފައިވާ ކަމަށެވެ. އެއީ، ދިވެހި ރުފިޔާއިން ބަލާނަމަ 997 މިލިއަނެއްހާ ރުފިޔާއެވެ.

އޭގެ ތެރޭގައި ހިދުމަތްތައް ރަނގަޅު ކުރުމަށާއި ބައެއް ތަކެތި ގަތުމުގެ އިތުރުން ކޮންސަލްޓިން ހިދުމަތް ވެސް ހިމެނެ އެވެ. އެ މަޝްރޫއުގައި ހަތް ކޮމްޕޯނަންޓެއް ވަނީ ހިމެނިފަ އެވެ.

އެ ފައިނޭންސިންގެ ދަށުން ކުރަން ރާވާފައިވާ ކަންކަން

1. ކޯލްޑް ސްޓޯރޭޖު އިތުރު ކުރުން: ހއ. އިހަވަންދޫގައި 1000 މެޓްރިކް ޓަނުގެ ކޯލްޑް ސްޓޯރޭޖުގެ އިތުރުން 50 މެޓްރިކް ޓަނުގެ ބްރައިން ސްޓޯރޭޖެއް، އައްޑޫ ފިޝަރީސް ކޮމްޕްލެކްސްގައި 500 މެޓްރިކް ޓަނުގެ ކޯލްޑް ސްޓޯރޭޖަކާއި 50 މެޓްރިކް ޓަނުގެ ބްރައިން ސްޓޯރޭޖެއް.

2. ކަނޑުއޮށްގިރީގައި 35 މެޓްރިކް ޓަނުގެ ފިޝް ޕްރޮސެސިން ޔުނިޓަކާއި ޕަވަ ޖެނެރޭޝަން އަޕްގްރޭޑު ކުރުން، ފެލިވަރުގައި 250 ޔުނިޓުގެ ސްޓާފު އެކޮމޮޑޭޝަނާއި ކޫއްޑޫގައި 100 ޔުނިޓުގެ ސްޓާފް އެކޮމޮޑޭޝަން.

3. މިފްކޯގެ ސްޓާފުންނާއި ސްޓޭކްހޯލްޑަރުންނަށް ޓްރެއިނިން ޕްރޮގްރާމު ހިންގުން

4. ޕްރޮޖެކްޓާއި ޕްރޮކިއުމެންޓާއި ފައިނޭންޝަލް މެނޭޖްމެންޓުގައި އެހީތެރިކަން ފޯރުކޮށްދިނުން

5. ކޮންޓިންޖެންސީ އެމަޖެންސީ ރެސްޕޮންސް

6. ފައިނޭންޝަލް އޮޑިޓް ހެދުން

7. އަގުތައް އުފުލުމާއި ދިމާވާ ކުއްލި ހާލަތްތަކުގައި އަމަލުކުރާނެ ގޮތުގެ ޕްލޭން

އެ ކުންފުނިން ބުނީ، މަޝްރޫއު ކުރިއަށް ގެންދާނީ އައިޑީބީގެ އެހީގައި މަޝްރޫއުތައް ކުރިއަށް ގެންދަން ކަނޑައަޅާފައިވާ އުސޫލުތަކުގެ ދަށުން ވާދަވެރި ބިޑިންގެ ތެރެއިން ކަމަށެވެ.

މިފްކޯއިން 64.65 މިލިއަން ޑޮލަރު ހޯދަން އައިޑީބީގައި އެދުނު ކަމަށް ބުނިއިރު، ސަރުކާރުން ބަޖެޓު ކޭޝްފްލޯ ޕްލޭންގައި އަންދާޒާކުރި އަދަދަށް ހިލޭ އެހީއާއި ލޯން އެހީގެ އިތުރުން އާމްދަނީ ވެސް ނުލިބޭކަން މި ފަހުން ވަނީ ހާމަވެފަ އެވެ.

މި ސަރުކާރުން އިހަވަންދޫގެ ތަރައްގީއަށް ގިނަ މަސައްކަތްތަކެއް އަންނަނީ ކުރަމުން ނެވެ.

އެގޮތުން މިހާރު ސަރުކާރުން ވަނީ:

މަސްވެރި ރަށެއް ކަމަށްވާ ހއ. އިހަވަންދޫގައި 474 މިލިއަން ރުފިޔާ ހަރަދުކޮށްގެން ތަރައްގީކުރާ ފިޝަރީޒް ކޮމްޕްލެކްސްގެ ބިންގާ އަޅައިފި
ހއ. އިހަވަންދޫގައި ޑޮކްޔާޑަކާއި ސްލިޕްވޭއެއް އަޅަން އެ ރަށު ކައުންސިލުން މޯލްޑިވްސް ޕޯޓްސް ލިމިޓެޑް (އެމްޕީއެލް) އާއެކު އެމްއޯޔޫއެއްގައި ސޮއިކޮށްފި
ހއ. އިހަވަންދޫގައި ތަރައްގީކުރާ "ފުއްޓަރު އުފާ" މައިޒާނުގެ ބިންގާ މިއަދު ވަނީ އަޅައިފަ
ކިޑްނީ ބަލީގެ މީހުންނަށް ދޭ ޑައިލިސްގެ ހިދުމަތް ހއ. އިހަވަންދޫގައި ރަސްމީކޮށް ދޭން ވަނީ ފަށައިފި
ހއ. އިހަވަންދުއަށް 100 ހައުސިން ޔުނިޓް އޮތް ނަމަވެސް 200އަށް އިތުރުކުރައްވާނެ ކަމަށް ވަނީ ރައީސް ވަނީ ވައުދު ވެފައި
ދިވެހި ރައްޔިތެއްކަން އަންގައިދޭ ކާޑު ޕްރިންޓްކޮށް ދޫކުރުމާއި، ޕާސްޕޯޓު ދޫކުރުމުގެ ހިދުމަތް ހއ. އިހަވަންދޫގައި ފަށައިފި
ހއ. އިހަވަންދޫގައި މޯލްޑިވްސް އިސްލާމިކް ބޭންކް (އެމްއައިބީ)ގެ އޭޓީއެމްއެއް ބެހެއްޓުމަށް އެ ބޭންކާއި ކައުންސިލާ ދެމެދުގައި އެއްބަސްވުމެއްގައި ސޮއިކޮށްފި
ހއ. އިހަވަންދޫގެ ހޮސްޕިޓަލް އިމާރަތް ކުރުމުގެ މަސައްކަތް އާރްޑީސީއާ ވަނީ ހަވާލުކޮށްފަ