ގެއަކަށް ގެއްލުންދީ އެ ގޭގެ ވެރިމީހާއަށް ބިރުދެއްކި މައްސަލައެއްގައި ހަތަރު މީހަކު ހައްޔަރުކޮށްފި

މަރިޔަމް އަނާ

09 މާޗް 2025 - 16:05

0 comments

ގަލޮޅުގައި ހުރި ގެއަކަށް ގެއްލުންދީ, އެ ގޭގެ ވެރިމީހާއަށް އިންޒާރުދީ ބިރުދެއްކި މައްސަލައެއްގައި ހަތަރު ދިވެއްސަކު ފުލުހުން ހައްޔަރުކޮށްފި އެވެ.

މީޑިއާތަކަށް ފޮނުވި މެސެޖެއްގައި ފުލުހުން ބުނީ އެ މީހުން ބިރުދައްކާ އިންޒާރު ދިނީ ގަލޮޅުގައި ހުންނަ ގެއެއްގެ ވެރިއަކަށް ކަަމަށެވެ. އެ މައްސަލަ ހުށަހެޅީ ރޭގެ ވަގުތެއްގައި ކަމަށް ފުލުހުން ބުންޏެވެ.

މިފަދަ ހާދިސާއެއްގެ މަންޒަރު ފެންނަ ވީޑިއޯއެއް ވެސް ސޯޝަލް މީޑިއާގައި ދަނީ ދައުރުވަމުންނެވެ. ނަމަވެސް މިއީ އެ ހާދިސާކަން ފުލުހުން ކަށަވަރެއް ނުކޮށްދިނެވެ.

މި މައްސަލައިގައި ހަތަރު މީހަކު ހައްޔަރުކުރީ ހަމަ އެ ގެއަށް ރޭ މެންދަމު 12:45 ހާއިރު ގެއްލުން ދެނިކޮށް އެ ތަނަށް ފުލުހުން ގޮހެވެ.

އެ މައްސަލައިގައި ފުލުހުން ހައްޔަރުކޮށްފައި ވަނީ:

އއ. މާޅޮސް، ރީތިހިޔާ (23)، މުހައްމަދު އަފްލާޙް
ނ. ވެލިދޫ، އެލަސް (21)، އިބްރާހިމް އަހްނަފް
ނ. މަނަދޫ، ހަވޭލި (23)، މުޙައްމަދު އަޒާން
ތ. ގުރައިދޫ، ފަޒާ (21)، އަލީ ނަވާފު

އެ ހަތަރު މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ގެންދިއުމުން އެންމެންގެ ބަންދަށް 15 ދުވަސް ޖަހާފައިވާ ކަމަށާއި މައްސަލަ އިތުރާށް ތަހުގީގުކުރަމުންދާ ކަމަށް ފުލުހުން ބުންޏެވެ.

އަދި މި މައްސަލަ އިތުރަށް ތަހުގީގު ކުރަމުން އަންނަކަމަށް ފުލުހުން ވަނީ ބުނެފަ އެވެ.

މާރާމާރީއާއި މިފަދަ ކުށްތައް އާންމުވެފައި ވާއިރު މިފަދަ މައްސަލަތަކުގައި ގިނައިން ޝާމިލުވަނީ ޒުވާނުންކަން ފާހަގަ ކުރެވެއެވެ. އެގޮތުން މިފަހުން މާލޭގައި ފެންމަތިވި މާރާމާރީތަކުގައި ޒުވާނުންނާއި 18އަހަރުން ދަށުގެ ކުޑަކުދިން ވެސް ހިމެނެއެވެ.