މޯލްޑިވިއަން އިން އެތެރޭގެ އުދުހުންތަކަށް ޕްރިމިއަމް އިކޮނޮމީ ޓިކެޓް ތައާރަފުކުރަނީ

މަރިޔަމް އަނާ

19 މާޗް 2025 - 14:49

0 comments

ރާއްޖޭގެ ގައުމީ އެއާލައިން، މޯލްޑިވިއަން އިން ރާއްޖޭގެ އެތެރޭގެ ދަތުރުތަކަށް ޕްރިމިއަމް އިކޮނޮމީ ކްލާސް ތައާރަފްކޮށްފި އެވެ.

މޯލްޑިވިއަންގެ އެތެރޭގެ އުދުހުންތަކުގައި ޕްރިމިއަމް އިކޮނޮމީގެ ހިދުމަތް ފަށަން ނިންމާފައިވަނީ އެޕްރީލް 13 ވަނަ ދުވަހުން ފެށިގެންނެވެ.

އިކޮނޮމީ ކްލާހުގެ ޓިކެޓްތަކަށްވުރެ ޕްރިމިއަމް އިކޮނޮމީ ޓިކެޓް އަގު ބޮޑު ނަމަވެސް އިތުރު ހިދުމަތްތައް ޕްރިމިއަމް އިކޮނޮމީ އިން ލިބެ އެވެ.

އިކޮނޮމީ ކްލާހުން 20 ކިލޯގެ ބެގޭޖް އެލަވަންސް ލިބުނު ނަމަވެސް ޕްރިމިއަމް އިކޮނޮމީ އިން 25 ކިލޯގެ ބެގޭޖް އެލަވަންސް ލިބޭނެ އެވެ. އަދި އިތުރު ފީއަކާ ނުލައި ފުރާ ދުވަސް އެއް ފަހަރު ބަދަލުކުރެވޭނެ ކަމަށް މޯލްޑިވިއަން އިން ބުނެފައިވެ އެވެ.

އެއާޕޯޓުން ލިބޭ ފަސޭހަތަކުގެ ތެރޭގައި ޗެކިން އަދި ބޯޑިންގައި ޕްރިއޯރިޓީ ލިބުމާއި މާލެ، ދަރަވަންދޫ އަދި އިފުރު އެއާޕޯޓުން ލޯންޖުގެ ހިދުމަތް ހިމެނެ އެވެ.

މީގެ އިތުރުން ޕްރިމިއަމް އިކޮނޮމީ ފަސިންޖަރުންނަށް ހާއްސަ ސީޓުތަކެއް ހަމަޖައްސާފައިވާއިރު ފްލައިޓްގައި ހާއްސަ ކެއިން ބުއިން ލިބޭނެ ކަމަށް މޯލްޑިވިއަން އިން ބުނެފައިވެ އެވެ. މޯލްޑިވިއަން އިން އެންމެ ފުޅާދާއިރާއެއްގައި ހިންގަނީ ޑޮމެސްޓިކް ދަތުރުތައް ކަމަށް ވާއިރު، އެ ދަތުރުތަކުގެ ފެންވަރު ރަނގަޅު ކުރުމަށް ވަރަށް ބޮޑު އިސްކަމެއް ދެ އެވެ.