މޯލްޑިވިއަނުން ދެވަނަ އެއާބަސް ކުއްޔަށް ނަގަން ކުރި އިއުލާނުގެ މުއްދަތު އިތުރުކޮށްފި

މަރިޔަމް އަނާ

07 މާޗް 2025 - 14:39

0 comments

ގައުމީ އެއާލައިން، މޯލްޑިވިއަނުން އިތުރު ވައިޑް ބޮޑީ ބޯޓެއް ހޯދަން ކުރި އިއުލާންގެ މުއްދަތު އިތުރުކޮށްފި އެވެ.

މޯލްޑިވިއަން ހިންގާ އައިލެންޑް އޭވިއޭޝަން ސާވިސަސް (އައިއޭއެސް) އިން މިދިޔަ ފެބްރުއަރީ މަހުގެ ހަވަނަ ދުވަހު ކުރި އިއުލާނެއްގައި ބުނެފައިވަނީ އެއާބަސް އޭ-330 މަރުކައިގެ ބޯޓެއް ކުއްޔަށް ނަގަން ބޭނުންވަނީ ފަސް އަހަރުގެ މުއްދަތަށް ކަމަށެވެ. އަދި ކުއްޔަށް ނަގަން ބޭނުންވަނީ އޮޕަރޭޓިން ލީސް އުސޫލުން ކަމަށް ވެސް ބުނެފައިވެއެވެ.

އެ އިއުލާނުގައި ބުނެފައިވަނީ އެ ބޯޓުގައި އިކޮނޮމީ އަދި ބިޒްނަސް ކްލާސް ކެބިން ހުންނަން ޖެހޭނެ ކަމަށާއި ބިޒްނަސް ކްލާހުގައި މަދުވެގެން 20 ސީޓު ހުންނަން ޖެހޭނެ ކަމަށެވެ. ނަމަވެސް އެ އިއުލާނުގައި އެކަމަށް ޕްރޮޕޯޒަލް ހުށަހެޅުމުގެ ސުންގަނޑި ހިމަނައިފައެއް ނުވެއެވެ.

މޯލްޑިވިއަނުން މިއަދު ކުރި އިއުލާނެއްގައި ބުނީ ޕްރޮޕޯސަލް ހުށަހެޅުމުގެ ފުރުސަތު އަންނަ ހަފުތާގެ ހުކުރު ދުވަހުގެ 23:59ގެ ނިޔަލަށް އިތުރުކޮށްފައިވާ ކަމަށެވެ.

ގައުމީ އެއާލައިނަށް އޭ-330 އެއާކްރާފްޓެއް ފުރަތަމަ ގެނައީ މިދިޔަ ޖެނުއަރީ މަހުގެ ހަވަނަ ދުވަހެވެ. މި އެއާކްރާފްޓުގައި ޗައިނާގެ ބެެއިޖިން، ޝަންގްހާއި އަދި ޗެންގްޑޫއަށް ދަތުރުތައް ކުރެއެވެ. އަދި އޭ-330ގައި ޔޫރަޕަށް ވެސް ދަތުރުތައް ކުރުމަށް ވަނީ ހަމަޖެހިފައެވެ.

މީގެ ދެވަނަ ބޯޓު ރާއްޖެ ގެނެސް، މި އަހަރުގެ އޮކްޓޫބަރުގެ އުދުހުންތައް ފެށޭނެ ކަމަށް ރައީސް ޑރ. މުހައްމަދު މުއިއްޒުވަނީ މީގެ ކުރިން ވިދާޅުވެފައެވެ.