ލައިލަތުލްޤަދްރި

އިބްރާހިމް އާދަމް

21 މާޗް 2025 - 14:08

0 comments

މިއަދުގެ ހުކުރު ހުތުބާގެ މައުޟޫއުއަކީ "ލައިލަތުލްޤަދްރި" މިއެވެ.

މިއަދުގެ ހުކުރު ހުތުބާގައި ބުނީ މިހާރު މިތިބީ ރަމަޟާން މަހުގެ ފަހު ދިހައިގެ ތެރޭގައި ކަމަށާއި ވީމާ ހެޔޮ އަމަލުތައް ގަބޫލުކުރައްވާތޯ މާތްﷲގެ ހަޒްރަތުގައި ދުއާ ދަންނަވަންޖެހޭ ކަމަށެވެ. އެ ދުވަސްތަކާއި ރޭތައް އިހުޔާކުރުމަކީ އެކަމުގެ ދަރުމައާއި ސަވާބުގެ މިންވަރު ހިސާބުކުރާން ނޭނގޭ ވަރަށް އިތުރުކޮށްދެއްވާ ކަމެއް ކަމަށް ހުތުބާގައި ބުންޏެވެ.

"ފަހު ދިހައިގައި ލައްވައިފައިވާ ބަރަކާތްތެރިކަން ބޮޑު ރެއަކީ ލައިލަތުލްގަދުރި އެވެ. އެ ރޭ ކުރާ ހެޔޮކަމުގެ ދަރުމަ އެ ނޫން ވަގުތުގައި، އެއް ހާސް މައްސަރުގައި ކުރާ ހެޔޮކަމަށް ވުރެ މަތިވެރިކުރައްވައިފައިވެ އެވެ. މި މަތިވެރި ރެއަކީ މާތްﷲ އެ ރެއެއްގައި މީހަކަށް މުޅި އުމުރުގައި ދެއްވާނެ އެންމެ މަތިވެރިކަން ހާސިލުކުރެވިދާނެ ރެއެވެ..،" ހުތުބާގައި ބުންޏެވެ.

ލައިލަތުލްޤަދުރީގެ މަތިވެރިކަން ބަޔާންކުރައްވައި މާތް الله ވަޙީކުރައްވައިފައިވާ ބަސްފުޅެއްގެ މާނާގައިވަނީ:

"ليلة القدرވިލޭރޭ، އެއްހާސް މައްސަރަށް ވުރެ ހެޔޮ ކަން ބޮޑެވެ." މި ބަސްފުޅުން އެނގޭ ގޮތުގައި އެ ރޭ، ކުރާ ހެޔޮ ކަމުގެ ދަރުމަ ދެއްވަނީ އެއް ހާސް މައްސަރުގައި ކުރާ ހެޔޮ ކަމާ އެއްވަރުގެ ހެޔޮ ކަމެއްނޫނެވެ. އަދި ކިއެއްތަ! އެއް ހާސް މައްސަރުގައި ކުރެވޭ ހެޔޮ ކަމަށްވުރެ ވެސް އިތުރުކޮށެވެ. އެހެންވީމާ، މި ފުރުޞަތުގެ ބޭނުން ހެޔޮ ގޮތުގައި ހިފާށެވެ!"

ރަމަޟާން މަހުގެ ފަހު ދިހައިގައި އިއުތިކާފަށް އިނުމަކީ ގަދަވެގެންވާ ސުންނަތެއް ކަމަށާއި އިއުތިކާފަށް އިންނަމީހާ، ބޭކާރު ކަންތައްތަކާއި ވާހަކަތަކުން ދުރުހެލިވެ، މާތްﷲ އަށް އަޅުކަންކުރުމާއި ކީރިތި ގުރުއާން ކިޔެވުމާއި ޒިކުރުކުރުމުގައި ވަގުތު ހޭދަކުރާންވާނެ ކަމަށް ހުތުބާގައި ބުންޏެވެ.

"އަދި މިސްކިތުގައި ހޭދަކުރާ ވަގުތުތަކުގައި މިސްކިތުގެ ސާފުތާހިރުކަމަށާއި، މިސްކިތުގެ ހުރުމަތަށް އިސްކަންދޭންވާނެއެވެ. މިސްކިތުގެ ހުރުމަތް ގެއްލޭ ފަދަ އެއްވެސް ކަމެއް ކޮށްގެން ނުވާނެއެވެ. މިސްކިތްތަކަކީ ބިންމަތީގައިވާ އެންމެ މާތް ތަންތަނެވެ. އެއީ މާތްﷲ ގެ ގެކޮޅުތަކެވެ. ވީމާ އެކަން އަބަދުވެސް ހަނދާންކުރާންވާނެއެވެ..،" ހުތުބާގައި ބުންޏެވެ.

ހުތުބާގައި ބުނީ މި ބަރަކާތްތެރި މައްސަރާ ވިދިގެން އަދާކުރާން އަމުރުކުރައްވައިފައިވާ އަޅުކަމަކީ ފިތުރު ޒަކާތް ދެއްކުން ކަމަށެވެ. އެއީ ފިތުރު ޒަކާތަކީ ރޯދަމަހު ރޯދަތައް ހިފި އިރު ކުރެވިފައިވާ އުނި ކަންކަން ފޫބައްދައިދޭ ކަމެއް ކަމަށް ހުތުބާގައި ބުންޏެވެ. އެހެންކަމުން ތިމާއާއި ތިމާގެ ބެލުމުގެ ދަށުގައިވާ މީހުންނާއި ކުދީންގެ ފަރާތުން ފިތުރު ޒަކާތް ނެރުމަށް އަވަސް ވާން ހުތުބާގައި ވަނީ ގޮވައިލާފަ އެވެ.