ދިވެހި ޑިވެލޮޕްމެންޓް ބޭންކުގެ ސީއީއޯ އިސްތިއުފާ ދެއްވައިފި

އަހުމަދު ނިހާން

23 މާޗް 2025 - 16:41

0 comments

މި ސަރުކާރުން އުފެއްދި މޯލްޑިވްސް ޑިވެލޮޕްމެންޓް ބޭންކުގެ ހިދުމަތް ނުފެށި އުޅެނިކޮށް އެ ބޭންކުގެ މެނޭޖިން ޑިރެކްޓަރު އަދި ސީއީއޯ ގެ މަގާމުގައި ހުންނެވި ނޮއެލް ގްރެގާ ޕެޓަސަން-ޖޯންސް އިސްތިއުފާދެއްވައިފި އެވެ.

ޑިވެލޮޕްމަންޓް ބޭންކުގެ ސީއީއޯ ކަމާއި ޗެއާޕާސަން ކަމަށް ރާއްޖެއިން ބޭރުގެ ދެ ތަޖުރިބާކާރުން، ރައީސް ޑރ. މުޙައްމަދު މުއިއްޒު އައްޔަންކުރެއްވީ އޮގަސްޓު 26ގައެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު(ޕީސީބީ) އިން މިއަދު ބުނީ ޑިވެލޮޕްމެންޓް ބޭންކުގެ ސީއީއޯ ނޮއެލް ގްރެގާ އިސްތިއުފާ ހުށަހެޅުއްވުމުން އެކަން ގަބޫލުކޮށް އޭނާ މަގާމުން ވަކި ކޮށްފައިވާ ކަމަށެވެ.

ނަމަވެސް އޭނާ އިސްތިއުފާ ދެއްވި ސަބަބެއް މިހާތަނަށް ސާފެއް ނުވެ އެވެ.

ރައީސް މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރޭ ހިމެނިގެން ޑިވެލޮމެންޓު ބޭންކެއް ގާއިމްކޮށް، އެ ބޭންކު ހިންގާ އިމާރާތް ރަސްމީކޮށް ހުޅުވީ މިދިޔަ 16 ނޮވެމްބަރުގަ އެވެ.

ބޭންކު ރަސްމީކޮށް ހުޅުވި ނަމަވެސް އެ ތަނުގެ މަސައްކަތްތައް އަދި ފަށާފައެއް ނުވެ އެވެ.

ނަމަވެސް، ޑީބީއެމް ހަދައި އެ ތަނުގެ އިންސްޓިޓިއުޝަނަލް ސެޓްއަޕް ގާއިމް ކުރުމުގެ މަސައްކަތް ތާވަލާ އެއްގޮތަށް ކުރިއަށްދާ ކަމަށް އިކޮނިމިކް މިނިސްޓަރު މުހައްމަދު ސައީދު ވަނީ މިފަހުން ވިދާޅުވެފަ އެވެ.