ރައްޔިތުންގެ ސިއްހަތު ސަލާމަތްކޮށް، ޖީލަކަށް ދުންފަތް މަނާކުރަން މިއަދު ކެބިނެޓުގައި މަޝްވަރާކުރަނީ

އަލީ ރާޒީ

13 އޭޕްރީލް 2025 - 11:10

0 comments

ދުންފަތުގެ އިސްތިއުމާލުކުރުމަށް އަލަށް ވަންނަ ކުދިން އެކަމުން ދުރުކުރުމަށް "ޖެނެރޭޝަން ބޭން"ގެ ގޮތުގައި ފިޔަވަޅު އެޅުމާމެދު މިއަދު ކެބިނެޓުން ވަކި ގޮތެއް ނިންމާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މިހާރު ކުރިއަށްދާ ވަޒީރުންގެ މަޖިލީހުގެ ބައްދަލުވުމަށް ވަދެވަޑައިގަތުމުގެ ކުރިން ރައީސް އޮފީހުގެ ސޯޝަލް މީޑިއާގައި ޕޯސްޓުކުރި ވީޑިއޯއެއް މެދުވެރިކޮށް ރައީސް ވިދާޅުވީ، ރާއްޖޭގައި ގައިންގަޔަށް ނާރާ ބަލިތައް ފެތުރުމުގެ އެންމެ ބޮޑު އެއް ސަބަބަކީ ދުންފަތުގެ އިސްތިއުމާލުކުރުން ކަމަށެވެ. އަދި، މިކަމުން ޒުވާނުން ދުރުކުރަން ޖެހޭ ކަމަށް ވެސް އެމަނިކުފާނު ވިދާޅުވި އެވެ.

"މިއަދުގެ ކެބިނެޓު ބައްދަލުވުމުގަ އިރާދަކުރެއްވިއްޔާ މި ހުރިހާ ކަމެއްގެ އަލީގަ މަޝްވަރާކޮށް އިރާދަކުރެއްވިޔާ ރައްޔިތުންގެ ސިއްހަތު ސަލާމަތް ކުރުމަށްޓަކައި، އަޅުގަނޑުމެންގެ ޖީލު ސަލާމަތްކުރުމަށްޓަކައި، އަޅުގަނޑުމެންގެ މި ކުޑަކުޑަ މުޖުތަމައަކީ ދުންފަތުގެ އިސްތިއުމާލުކޮށްގެން ޖެހޭ ބަލިތައް ޖެހޭ މުޖުތަމައަކަށް ނެހެދުމަށްޓަކައި ގޮތެއް އިރާދަކުރެއްވިޔާ ނިންމާނަން،" ރައީސް ވިދާޅުވި އެވެ.

މި ވީޑިއޯގައި ވާހަކަދައްކަވަމުން ރައީސް ވަނީ މިވަގުތު ރާއްޖޭގެ އާބާދީއަކީ 411،741 ދިވެހިން ކަަން ފާހަގަކުރައްވާފަ އެވެ. އާބާދީގެ 30 އިންސައްތަ އަކީ ޖެނުއަރީ 1، 2007 ގެ ފަހުން އުފަންވެފައިވާ މީހުންނެވެ. މިއީ ޖެނެރޭޝަން ބޭން އަށް ރައީސް ހުށަހެޅުއްވި އެއް ތާރީހެވެ.

ރާއްޖެއަށް "ޖެނެރޭޝަނަލް ބޭން" ތައާރަފް ކުރުމަށް ހެލްތު މިނިސްޓްރީން އެކަމާ ގުޅޭ ގޮތުން ހަދަން ޖެހޭ ދިރާސާތައް ހަދައި، ސިއްހީ ދާއިރާގެ ތަޖުރިބާކާރުންނާއި އެކިއެކި ފަންނީ މީހުންގެ މަޝްވަރާތައް ހޯދުމަށްފަހު އެ މިނިސްޓްރީން ވަނީ ކެބިނެޓަށް ހުށަހަޅަން ވަނީ ކަރުދާހެއް އެކުލަވާލާފަ އެވެ. މިއަދު އެ ކަރުދާސް، ހެލްތު މިނިސްޓަރު އަބްދުﷲ ނާޒިމް ކެބިނެޓަށް ހުށަހަޅުއްވާނެ އެވެ.