ޒުވާނުންގެ މުޒާހަރާގައި އެމްޑީޕީން ބައިވެރިވާން ނިންމައިފި

އައިމިނަތު ޝިޔާޒާ

02 މެއި 2025 - 23:35

0 comments

އިމާރާތެއްގެ މަތިން ވެއްޓުނު ހައްވާ ޔުމްނު ރަޝީދަށް އިންސާފު ހޯދަދިނުމަށް ޒުވާނުން މާލޭގައި ކުރަމުން އަންނަ ސިލްސިލާ މުޒާހަރާގައި ބައިވެރިވާން އެމްޑީޕީން މިރޭ ނިންމައިފި އެވެ.

އެމްޑީޕީގެ ގައުމީ މަޖިލީހުން ހޮވާފައިވާ ލީޑާޝިޕް ރެޕިޑް ރެސްޕޮންސް ޓީމް (އެލްއާރްއާރްޓީ) އިން އެދިގެން ބޭއްވި ކުއްލި ބައްދަލުވުމުގައި ޒުވާނުންގެ މުޒާހަރާއަށް ސަރުކާރުން ހުރަސްއަޅާކަން ފާހަގަކޮށް އެކަން ގައުމީ މަޖިލީހުގެ މެންބަރުން ވަނީ ކުށްވެރިކޮށްފަ އެވެ.

އެ ބައްދަލުވުމުގައި އެމްޑީޕީގެ ޗެއާޕާސަން ފައްޔާޒް އިސްމާއިލް ވަނީ ޒުވާނުން ކުރިއަށް ގެންދާ މުޒާހަރާއަށް އެމްޑީޕީން ދޭން ޖެހޭ އެއްބާރުލުންދީ، އެ މުޒާހަރާގައި ޕާޓީގެ މެންބަރުން ބައިވެރިވުމަށް ގޮވާލައިފަ އެވެ.

"އަޅުގަނޑުމެންގެ ހައްގުތައް ހޯދާ ކަމަށްވަންޏާ ޕާޓީއަކުން ކުރި ކަމުގައިވިޔަސް، ވަކިވަކި ފަރުދުން ކުރި ކަމުގައިވިޔަސް ކޮންމެ ކަމަކީ ވެސް ސިޔާސީ ކަންކަން. ޒުވާނުންގެ މި ހަރަކާތަކީ ސިޔާސީ ޕާޓީއަކުން ހިންގާ ކަމެއް ނޫން،" ފައްޔާޒް ވިދާޅުވި އެވެ.

ޒުވާނުން މުޒާހަރާކުރަނީ ހައްވާ ޔުމްނު ރަޝީދު ވެއްޓުނު މައްސަލައިގައި އިންސާފު ހޯދައިދިނުމަށް ގޮވާލައެވެ. އެ ސިލްސިލާ މުޒާހަރާތަކުގެ ތެރެއިން ރޭ ހައްޔަރުކުރި ދެ ޒުވާނުންގެ ބަންދަށް ކްރިމިނަލް ކޯޓުން މިއަދު ތިން ދުވަސް ވެސް ވަނީ ޖަހައިފައެވެ.

ހައްޔަރުކުރި ދެ މީހުންގެ ތެރޭގައި ހިމެނެނީ އެ މުޒާހަރާތަކުގައި އިސްކޮށް ހަރަކާތްތެރިވާ އައިޝަތު ޝިމަން އަޙުމަދާއި މި ސަރުކާރުގައި ކުރިން ޔޫތު މިނިސްޓްރީގެ ޑެޕިއުޓީ މިނިސްޓަރަކަށް ހުންނެވި އަބްދުﷲ މަހްޒޫމް މާޖިދެވެ.

ފައްޔާޒު ވަނީ އެ ދެ ޒުވާނުން ވަގުތުން ވަގުތަށް ދޫކޮށްލުމަށް ސަރުކާރަށް ގޮވާލާފައިވެ އެވެ.

ރޭ އޮތް މުޒާހަރާގައި ފުލުހުން ވަނީ ބާރުގެ ބޭނުންކޮށް، މުޒާހަރާ ރޫޅާލަން މަސައްކަތް ކޮށްފަ އެވެ. އަދި ފުލުހުންނާއި މުޒާހަރާގެ ބައިވެރިންނާ ދެމެދު ކުރިމަތިލުންތައް ހިނގައި، ބައިވެރިންގެ މޫނަށް ޕެޕާ ސްޕްރޭ ވެސް ޖަހައިފައި ވެއެވެ.

އެއާއެކު މިރޭ ޒުވާނުން އެއްވެ އަޑުއުފުލަމުން އަންނަނީ ކާނިވާ ސަރަހައްދުގަ އެވެ. މުޒާހަރާގައި ފުލުހުން ބާރުގެ ބޭނުން ކުރުމުން އެކަމާ ދެކޮޅަށް ގިނަ ބަޔަކު ދަނީ ފާޑުކިޔަމުންނެވެ.