ކައުންސިލަރުންގެ އަދަދު މަދުކުރުމާ ގުޅޭ ގަރާރު ބަލައިގަނެފި

އަހުމަދު ނިހާން

18 ޖޫން 2025 - 12:52

0 comments

ރަށްރަށުގެ ކައުންސިލަރުންގެ އަދަދު މަދުކޮށް، ކައުންސިލްތަކުގެ ބަޖެޓު ކުޑަކުރުމަށް ބާރަށު ދާއިރާގެ ޕީއެންސީ މެންބަރު، އިބްރާހިމް ޝުޖާއު ހުށަހެއްވި ގަރާރު މަޖިލީހަށް ބަލައިގެނެ ދިރާސާ ކުރަން ލާމަރުކަޒީ ކޮމިޓީއަށް ކޮޮމިޓީއަށް ފޮނުވައިފި އެވެ.

އެ ގަރާރު މަޖިލީހަށް ބަލައިގަތީ ވޯޓުގައި ބައިވެރިވެވަޑައިގެންނެވި 52 މެންބަރުންގެ ވޯޓުންނެވެ. އެ ގަރާރާ ދެކޮޅަށް 11 މެންބަރަކު ވޯޓު ދެއްވި އެވެ.

މި ގަރާރު ހުށަހަޅުއްވަމުން ޝުޖާއު ވިދާޅުވެފައި ވަނީ ދައުލަތުގެ ހަރަދު ބޮޑުވެ، އިގުތިސޯދު ކުރަން ޖެހިފައިވާ މިފަދަ ދަނޑިވަޅުގައި، ގާނޫނުގައި ބުނާތީ ކޮންމެ ރަށަކަށް މަދުވެގެން ފަސް ކައުންސިލަރުން ކޮންމެހެން ތިބުން ލާޒިމްކޮށްފައި އޮތުމަކީ އެންމެ ރަނގަޅު ކަމެއްތޯ އާއްމުންގެ ތެރެއިން ގިނަ ބަޔަކު ސުވާލުކުރާ ކަމަށެވެ.

އެހެންވެ، އެ ހައްސާސީ މައްސަލައަށް ހައްލު ގެނައުމަށް ކަމާގުޅުން ހުރި ސަރުކާރުގެ އިދާރާތަކާއި ހުރިހާ މުއައްސަސާތަކަށް އެހީތެރިކަން ހޯދުމަށް މެމްބަރުން ދެކެވަޑައިގަންނަވާ ގޮތް ބެލުމަށް އެ ގަރާރު ހުށަހެޅުއްވީ ކަމަށް، އެންމެ ފަހުން ބޭއްވި ލޯކަލް ކައުންސިލްގެ އިންތިހާބުގައި ހުޅުމާލެ ދާއިރާގެ ގޮނޑި ކާމިޔާބުކުރެއްވި ޝުޖާއު ވިދާޅުވި އެވެ.

އޭނާ ވިދާޅުވި ގޮތުގައި އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަކީ މިހާތަނަށް އެންމެ ގިނަ އިސްލާހު ގެނައި އެއް ގާނޫނެވެ.

ރަށު ކައުންސިލްތަކާއި އަތޮޅު ކައުންސިލްތަކަށް އަދި ސިޓީ ކައުންސިލްތަކުގެ މެންބަރުންގެ އަދަދާމެދުވެސް އާންމުންގެ ކަންބޮޑުވުން ހުރި ކަމަށް ގަރާރުގައި ބުނެފައިވެ އެވެ.

"ކުޑަ ރަށެއްގައި އެންމެ 50 މީހުންގެ އާބާދީއަށްވެސް މުނިސިޕަލް ހިދުމަތް ދިނުމަށް އިންތިހާބުކޮށް ދައުލަތުން މުސާރަދޭންޖެހޭ މަދުވެގެން 5 ކައުންސިލަރުން ތިބެންޖެހުން ފަދަ ކަންކަމަކީ ހުރިހާ ގޮތަކުން ބެލި ނަމަވެސް ބޮޑެތި އިސްލާހުތައް ބޭނުންވާ ކަންތައްތަކެއް،" ގަރާރުގައިވެ އެވެ.

ގަރާރުގައި ވަނީ ފުލްޓައިމްކޮށް ފަސް ކައުންސިލަރުން ތިބެންޖެހޭތޯ ސުވާލު އުފައްދާފަ އެވެ.

"އޭގެ ބަދަލުގައި ފުލްޓައިމްކޮށް އެކެއް ނުވަތަ ދެ ކައުންސިލަރުން ތިބެފައި ދެން ތިބި ކައުންސިލަރުންނަކީ ސިޓީން އެލަވެންސްއެއް ދޭ ބަޔަކަށް ބަދަލުކޮށްލެވިއްޖެނަމަ އެތައް ގުނައެއް ހަރަދު ކުޑަކުރެވިގެންދާނެ،" ޝުޖާއު ހުށަހެޅުއްވި ގަރާރުގައިވެ އެވެ.

މި ގަރާރު ހުށަހެޅުއްވީ މިކަމުގައި މަޖިލީހުގެ މެންބަރުން ދެކެވަޑައިގަންނަވާ ގޮތެއް ބެއްލެވުމަށް ކަމަށް ގަރާރުގައި ޝުޖާއު ބަޔާންކޮށްފައިވެ އެވެ.