ބިން ހިއްކުމުގެ ބަދަލުގައި ދިން ބިންތައް ސަރުކާރަށް ނަގައިފި

އަލީ ރާޒީ

03 މެއި 2025 - 13:24

0 comments

އެކި ބޭނުންތަކަށް ބިން ހިއްކުމުގެ ބަދަލުގައި ބޭރު މީހުންނަށް ކުރީގެ ސަރުކާރުން ދޫކުރި ހުރިހާ ބިންތަކެއް ސަރުކާރަށް މިހާރު ނަގައި އެ އެއްބަސްވުންތައް ވެސް ބާތިލް ކޮށްފައިވާ ކަމަށް ރައީސް ޑރ. މުހައްމަދު މުއިއްޒު ދެންމެ ވިދާޅުވެއްޖެ އެވެ.

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ ބިން ހިއްކުމުން ބަދަލުގައި ބިން ދޭ ގޮތަށް ކުރީ ސަރުކާރުން އެއްބަސްވުންތައް ހަދާފައިވާ ކަމަށެވެ.

ރައީސް ވިދާޅުވި ގޮތުގައި ގިރާވަރުފަޅާއި ހުޅުމާލެ ފޭސް 3 ހިއްކުމުގެ ބަދަލުގެ ގޮތުގައި ކުރީ ސަރުކާރުން ބިންތަކެއް ވަނީ ދީފަ އެވެ.

"މިހާރު ނޯންނާނެ ބިން ހިއްކި އެއްވެސް ބައެއްގެ އަތުގައި އެ މީހުންނަށް ކުރީ ސަރުކާރަކުން ދީފަ އޮތް ބިމެއް،" ރައީސް ވިދާޅުވި އެވެ.

ހުރިހާ ބިން ކެންސަލްކޮށް މިހާރު ސަރުކާރަށް ނަގާފައިވާ ކަމަށް ރައީސް މުއިއްޒު ވިދާޅުވި އެވެ.

ރައީސް ވިދާޅުވީ، އެކިއެކި ކޮންޓްރެކްޓަރުން ހޯދައިގެން، ރަސްމާލެ ހިއްކުމުގެ މަޝްރޫއު ވެސް މި އަހަރު ނިންމޭތޯ މަސައްކަތް ކުރައްވާ ކަމަށެވެ. އެ މަނިކުފާނު ވިދާޅުވީ، އުތުރު ތިލަފަޅު ހިއްކުމުގެ މަސައްކަތް ފެށުމުގެ ތައްޔާރީތައް ވެސް މިހާރު ކުރިއަށް ގެންދާ ކަމަށެވެ.

ސަރުކާރުން ނިންމާފައި ވަނީ އުތުރު ތިލަފަޅުން ހިއްކާ ބިމުގައި ސެންޓްރަލް ޖަލެއް އިމާރާތްކުރާށެވެ.